حونگيەن پيە: سولتۇستىك كورەيانى قازاقستاننىڭ باستامالارىن ورىنداۋعا شاقىرامىن
بۇل تۋرالى بۇگىن استاناداعى سەمەي يادرولىق سىناق پوليگونىنىڭ جابىلۋىنا 25 جىل تولۋىنا ارنالعان «يادرولىق قارۋسىز الەم قۇرۋ» حالىقارالىق كونفەرەنسيادا كورەيا رەسپۋبليكاسىنىڭ بىرىگۋ جونىندەگى ءمينيسترى حونگيەن پيە ءمالىم ەتتى.
وسى رەتتە ول سولتۇستىك كورەيا 21 - عاسىردا ءتورت يادرولىق سىناق وتكىزگەن جالعىز مەملەكەت ەكەنىن، ال قازىرگى كەزدە تاعى ءبىر سىناق كەزەڭىن وتكىزۋ قاۋپىن تۋدىرىپ وتىرعانىن اتاپ ءوتتى.
«وسى ءتورت سىناق تا پۋنگەري دەپ اتالاتىن پوليگوندا ءوتتى. بۇل سىناق الاڭىنان وتىز شاقىرىم عانا جەردە قالا ورنالاسقان. بۇل تۇرعىدا وسى قالانىڭ تۇرعىندارى قاۋىپسىزدىكتە مە؟ وكىنىشكە قاراي، ادامدار قاۋىپسىزدىكتە ەمەس. رادياتسيا سالدارىنان تۋىنداعان زارداپقا قاتىستى رەسمي زەرتتەۋ جۇرگىزىلمەگەن، الايدا سولتۇستىك كورەيادان قاشقان ادامداردىڭ مالىمەتىنشە، تۇرعىنداردىڭ كوپشىلىگى قاتەرلى ىسىك، جۇرەك- قان تامىرلارى اۋرۋى جانە باسقا دەرتتەرگە شالدىققان. اتاپ ايتقاندا، سولتۇستىك كورەيانىڭ بيلىگى ەشقاشان دا يادرولىق سىناقتاردىڭ سالدارى تۋرالى ادامدارعا ءتۇسىندىرۋ شارالارىن جۇرگىزبەگەن. وتكەن عاسىردا قازاقستاندا كەڭەستىك رەجىم دە ءدال وسىلاي ىستەگەن. پحەنياندىق رەجىم بۇنداي قادامدار كورەي حالقىنىڭ ومىرىنە قاتەر تۋدىرىپ وتىرعانىن، جەردى ءبۇلدىرىپ جاتقانىن ءتۇسىنۋى ءتيىس»، - حونگيەن پيە.
بۇل تۇرعىدا ول سولتۇستىك كورەيانىڭ يادرولىق زەرتتەمەلەرىنە توقتاۋ سالۋ كەرەكتىگىن قاداپ ايتتى.
«قازاقستان ءوز ەركىمەن يادرولىق قارۋىنان باس تارتتى. شىن مانىندە بۇل دۇرىس تاڭداۋ بولدى. ناتيجەسىندە، قازاقستان شەتەلدىك سەرىكتەستەرى تاراپىنان جوعارى سەنىمگە يە. بۇل تۇرعىدا ەلدەرىڭىزگە اۋقىمدى ينۆەستيتسيالار تارتىلۋدا. قازاقستان ورتالىق ازيادا نەگىزگى ەكونوميكالىق دەرجاۆاعا اينالدى. جالپى، پحەنيان تاراپى قازاقستاننىڭ باستامالارى مەن تاجىريبەسىنە ەرەكشە ءمان بەرىپ، ۇلگى الۋى ءتيىس»، - دەدى مينيستر.
ءسوز سوڭىندا سولتۇستىك كورەيا ءوزىنىڭ يادرولىق ارسەنالىنان باس تارتسا، وندا جاڭا مۇمكىندىكتەر اشىلىپ، وڭتۇستىك كورەيا بەيبىتشىلىك پەن گۇلدەنۋدە ءوز قولداۋىن جاساۋعا ءازىر ەكەنىن جەتكىزدى.
اۆتور: رۋسلان عابباسوۆ
