الماتىدا تۇرمىسى تومەن وتباسىلارعا تەگىن ءۇي بەرىلەدى
«بەرەكە» مادەني- ءبىلىم قورى» مەن الماتى قالاسى اكىمدىگى اراسىنداعى كەلىسىم بويىنشا جۇزەگە اساتىن بۇل شارا - ەلىمىزدىڭ وڭتۇستىك استاناسىندا تۇراتىن ءبىراز وتباسىنى باسپانامەن قامتۋى مۇمكىن - دەيدى BAQ.kz ءتىلشىسى.
الماتى قالاسىنىڭ اكىمى باۋىرجان بايبەكتىڭ مالىمدەۋىنشە تۇرمىسى تومەن وتباسىلاردى باسپانامەن قامتاماسىز ەتۋ بويىنشا «بەرەكە» قورىمەن جاساسقان كەلىسىم شارت نەگىزىندە قالانىڭ الاتاۋ اۋدانىنان ءتورت قاباتتى 6 تۇرعىن ءۇيدىڭ قۇرىلىسى باستالماق. سونىمەن قاتار 120 ورىندىق بالاباقشا دا وسى اۋداننان بوي كوتەرەدى دەپ جوسپارلانۋدا.
«كاسىپكەرلەردىڭ قولداۋى ارقاسىندا قالادا 158 سپورت الاڭدارى پايدا بولدى. م ج ءا اياسىندا بالاباقشالار كوپتەپ اشىلۋدا، سونىمەن قاتار 4 مەكتەپ پەن 1 ەمحانانىڭ، وزگە دە وبەكتىلەردىڭ قۇرىلىستارى باستالدى. وتكەن جىلى جالپى قۇنى 40 ميلليارد تەڭگەدەن استام مەموراندۋمعا قول قويىلدى»، - دەدى قالا اكىمى.
اكىمشىلىكپەن مەموراندۋمعا قول قويعان «بەرەكە» قورىنىڭ پرەزيدەنتى باعداش سۇلەيمەنوۆ بۇل قوعامداعى قوردالانىپ قالعان باسپانا ماسەلەسىن شەشۋدەگى ەڭ ءبىر تىڭ قادام ەكەنىن ايتادى.
«بۇل مەموراندۋم مەملەكەت باسشىسىنىڭ بيزنەستىڭ الەۋمەتتىك جاۋاپكەرشىلىگى جونىندەگى ساياساتىن جۇزەگە اسىرۋ بولىپ تابىلادى. بۇل ءىستىڭ باستى ماقساتى - تۇرمىسى تومەن وتباسىلارعا قول ۇشىن سوزۋ. جاعدايى تومەن جانۇيالار مۇنداي ۇيلەردە تەگىن تۇرا الادى. جالپى، ءبىزدىڭ قورىمىز كومەككە مۇقتاج جانداردى ولارعا كومەك بەرۋشىلەرمەن بايلانىستىرادى»، - دەيدى قور پرەزيدەنتى.
