باتىس قازاقستاندىقتار ريو وليمپياداسىنىڭ قولا جۇلدەگەرى ە. لاريونوۆانى اۋەجايدان قارسى الىپ، قۇرمەت كورسەتتى - فوتو
ورالعا ە. لاريونوۆامەن بىرگە وليمپياداعا قاتىسقان باسقا دا سپورتشىلار، اتاپ ايتقاندا، حالىقارالىق دارەجەدەگى سپورت شەبەرلەرى، ەسكەكشىلەر الەكسەي دەرگۋنوۆ پەن اندرەي ەرگۋچيەۆ، سپورتتىق جۇرىستەن سىنعا تۇسكەن گريگوري شەيكو مەن پولينا رەپينا ورالدى.
باتىس قازاقستان وبلىسىنىڭ اكىمى التاي كولگىنوۆ ريو وليمپياداسىندا قازاقستاندىق سپورتشىلاردىڭ ۇلكەن تابىسقا قول جەتكىزگەنىن، سونىڭ ىشىندە جەرلەسىمىز دانيار ەلەۋسىنوۆتىڭ بوكستان چەمپيون اتانعانىن ايتا كەلىپ، قولا جۇلدەنى يەلەنگەن ەكاتەرينا لاريونوۆانى جەڭىسىمەن قۇتتىقتادى. وعان كىيا اۆتوكولىگىنىڭ كىلتىن تابىس ەتىپ، سونىمەن قاتار پاتەر دە بەرىلەتىنىن جاريا ەتتى. ە. لاريونوۆانىڭ جەكە باپكەرى، اكەسى الەكسەي لاريونوۆقا 2 ميلليون تەڭگەنىڭ سەرتيفيكاتى تابىس ەتىلدى. باسقا دا وليمپياداشىلارعا باعالى سىيلىقتار تاپسىرىلدى.
ءوڭىر باسشىسى مەملەكەت تاراپىنان بۇدان بىلاي دا سپورتشىلارعا قولداۋ- كومەك كورسەتىلەتىنىن جەتكىزدى.
ريو وليمپياداسىنىڭ قولا جۇلدەگەرى ەكاتەرينا لاريونوۆا ءوزىن قۇرمەتپەن قارسى العانى ءۇشىن باتىس قازاقستاندىقتارعا العىسىن ءبىلدىرىپ، الداعى ۋاقىتتا دا ەل نامىسىن ابىرويمەن قورعاۋعا دايىن ەكەندىگىن ءبىلدىردى. سونداي- اق سپورت ارداگەرى، ەركىن كۇرەستەن ك س ر و سپورت شەبەرى، قازاقستاننىڭ ەڭبەك سىڭىرگەن جاتتىقتىرۋشىسى امانگەلدى مۇسابەكوۆ ورال قالاسىندا دانيار ەلەۋسىنوۆ پەن ەكاتەرينا لاريونوۆانىڭ تابىسىنا وراي پالۋاندار مەن بوكسشىلار دايارلايتىن ارنايى سپورت مەكتەبى اشىلسا دەگەن تىلەگىن ايتتى.
بۇدان كەيىن ەكاتەرينا لاريونوۆا باستاعان وليمپياداشىلار قالا كوشەلەرىمەن سالتاناتتى تۇردە ءجۇرىپ ءوتتى.
ايتا كەتەيىك، بۇدان بۇرىن باتىس قازاقستان وبلىسى اتىنان سىنعا تۇسكەن تايمۋراز تيگيەۆ ەركىن كۇرەستەن بەيجىڭ وليمپياداسىندا كۇمىس، دانيال گادجيەۆ گرەك- ريم كۇرەسىنەن لوندوندا قولا جۇلدەنى ەنشىلەگەن ەدى. دەگەنمەن ولاردىڭ ەكەۋى دە شەتتەن كەلگەن سپورتشىلار ەدى. ال ريو وليمپياداسىندا باتىس قازاقستان وبلىسىنان تۇلەپ ۇشقان، قازىر استانا قالاسىندا تۇراتىن بوكستان قازاقستان ۇلتتىق قۇراماسىنىڭ كاپيتانى دانيار ەلەۋسىنوۆ التىننان القا تاقسا، ورالدا تۋىپ- وسكەن ەكاتەرينا لاريونوۆا قولا جۇلدەگە قول جەتكىزدى.
