قازاقستاننىڭ اسكەري وركەسترى ماسكەۋدەگى فەستيۆالدە كورەرمەن كوزايىمىنا اينالدى - فوتو، كەسكىن
2016 -جىلدىڭ 27 -تامىزى مەن 4 -قىركۇيەك ارالىعىندا وتەتىن قازاقستان رەسپۋبليكاسى مەملەكەتتىك كۇزەت قىزمەتىنىڭ قۇرمەت قاراۋىل روتاسى مەن پرەزيدەنتتىك وركەستردىڭ اسكەري قىزمەتشىلەرى ماسكەۋ قالاسىندا وتەتىن توعىزىنشى حالىقارالىق اسكەري- مۋزىكالىق «سپاسسك مۇناراسى» فەستيۆالىنە قاتىسۋدا.
اتالعان فەستيۆالگە قاتىسۋ مەملەكەتتىك كۇزەت قىزمەتىنىڭ اسكەري قىزمەتشىلەرى ءۇشىن داستۇرگە اينالدى، سوندىقتان دا تۇراقتى كورەرمەندەرىن ەرەكشە قويىلىمدارمەن تاڭ قالدىرۋ ءۇشىن ولار تىڭعىلىقتى دايىندىقپەن كەلگەن.
ماسكەۋدە اتالمىش فەستيۆالگە ارناپ ۇلكەن دەكوراتسيالار ورناتقان.
شوۋ بارىسىندا اسكەري وركەستردىڭ ورىنداۋىندا مۋزىكالىق چارتتاردىڭ تانىمال ولەڭدەرىن ەستىگەن كەزدە تريبۋناداعى حالىق زور شاتتىققا بولەنىپ، ەكى ساعاتتىق قويىلىم بارىسىندا تىنباستان قول سوقتى.
قازاقستاندىق اسكەريلەر قىزىل الاڭعا بارشا الەمگە ايگىلى «تاقتار ويىنى» فيلمىنىڭ ساۋندترەگىمەن شىقتى. كەيىن No Limits ولەڭىنىڭ سۇيەمەلدەۋىمەن ساپ تۇزەپ، امەريكالىق حيتتەگى ءرەپتى ناقىشىنا كەلتىرىپ ورىندادى. كورەرمەن جۇرت قازاقستاندىق وركەستردىڭ بۇل ونەرىنە ءتانتى بولدى. قازاق اسكەريلەردىڭ ونەرى ماسكەۋلىكتەردىڭ دەلەبەسىن قوزدىرعانى سونشالىق، دي- دجەي Smash-تىڭ «موسكۆا» ولەڭى ورىندالعان كەزدە، تريبۋناداعى بارشا حالىق سمارتفوندارىنداعى جارىقتى جاعىپ، قوسىلىپ ءان ايتتى. سونىمەن قاتار قازاقستاندىق اسكەريلەر 2016 -جىل رەسەيدە «كينو جىلى» ەكەندىگىن تاعى ءبىر ەسكە ءتۇسىردى. ولاردىڭ ورىنداۋىندا ءبىرقاتار تانىمال فيلمدەردىڭ ساۋندترەكتەرى ورىندالدى.
مەملەكەتتىك كۇزەت قىزمەتىنىڭ قۇرمەت قاراۋىل روتاسى جانە پرەزيدەنتتىك وركەسترى 2009 -جىلدان بەرى ۇزدىكسىز فەستيۆالدىڭ ارنايى شاقىرىلعان قۇرمەتتى قوناعى رەتىندە رەسەيدىڭ باستى الاڭىندا ونەر كورسەتىپ كەلەدى. پارادتتىق پلاتس- كونتسەرتتە ەكپىندى اۋەنىمەن، سىمداي تارتىلىپ ساپ تۇزەگەن اسكەري قىزمەتشىلەردىڭ قارۋمەن ءتۇرلى ەلەمەنتتەردى كورسەتۋدەگى شەبەرلىكتەرى مەن بىلىكتىلىكتەرى، قايسارلىقتارى مەن قۋاتتىلىعى حالىقارالىق ارىپتەستەردى تاڭ قالدىرسا، جينالعان كورەرمەننىڭ كوزايىمىنا اينالدى.
فەستيۆالدىڭ قۇرمەتتى قوناعى تەڭدەسى جوق ميرەي ماتە فەستيۆالدەردىڭ بىرىندە قازاقستاندىڭ اسكەري قىزمەتشىلەردىڭ ديناميكالىق اۋەنى مەن كوزتارتار ونەرى تاڭداي قاقتىراتىنىن تىلگە تيەك ەتە وتىرىپ، ولاردىڭ كورسەتىلىمىن «لەگيون شابۋىلى» دەپ اتاپ، وزىندىك باعاسىن دا بەرگەن بولاتىن.
قازاقستان رەسپۋبليكاسى مەملەكەتتىك كۇزەت قىزمەتىنىڭ اسكەري قىزمەتشىلەرىنىڭ مۋزىكالىق رەپەرتۋارى ارنايى فەستيۆال باعدارلاماسىنا لايىقتالىپ جازىلدى. باعدارلامانى ازىرلەۋ بارىسىندا مەملەكەتتىك كۇزەت قىزمەتىنىڭ باسشىلىعى جان- جاقتىلىق تانىتىپ، ءتىپتى، بيىلعى 2016 -جىل رەسەيدە «كينو جىلى» ەكەندىگى ەسكەرىلدى.
«سپاسسك مۇناراسى» («سپاسسكايا باشنيا» ) حالىقارالىق اسكەري- مۋزىكالىق فەستيۆال الەمنىڭ ۇزدىك شىعارماشىلىق جانە مۋزىكالىق ۇجىمدارىن توعىستىراتىن شارا. ونىڭ ءداستۇرلى قاتىسۋشىلارى - ءتۇرلى مەملەكەت باسشىلارىنىڭ قۇرمەت قاراۋىلدارى مەن جەتەكشى اسكەري- وركەسترلىق جانە شىعارماشىلىق ۇجىمدارى. «سپاسسك مۇناراسى» فەستيۆالىنىڭ تاريحي جىلناماسىندا 40 ەلدىڭ 140-قا جۋىق مۋزىكالىق ۇجىمدارى قولتاڭباسىن قالدىرعان. اتالعان فەستيۆالدى رەسەيدىڭ ەڭ ۇزدىك حالىقارالىق مادەني جوباسى دەپ ايتۋعا تولىق نەگىز بار.
اۆتور: جاسۇلان جولدىبايەۆ
