دانيار ەلەۋسىنوۆ: ريوعا تەك التىن الۋ ءۇشىن بارا جاتىرمىن - فوتو

بۇل تۋرالى قازاقپارات ح ا ا تىلشىسىنە بەرگەن سۇحباتىندا بوكستان قازاقستان قۇراماسىنىڭ كاپيتانى دانيار ەلەۋسىنوۆ مالىمدەدى.

قازىر بوكستان قازاقستان ۇلتتىق قۇراماسى استانادا سوڭعى وقۋ- جاتتىعۋ جيىندارىن وتكىزىپ جاتىر. ءبىز ارنايى بوكسشىلارىمىز جاتتىعىپ جاتقان سپورت زالىنا بارىپ، دانيار ەلەۋسىنوۆتى اڭگىمەگە تارتتىق.
- دانيار دايىندىق قالاي ءوتىپ جاتىر؟

- وتە تاماشا! مىنە، وزدەرىڭىز كورىپ تۇرعانداي، بىزگە بارلىق جاعداي جاسالعان. نە كەرەك، ءبارى بار. ءبىز الاڭسىز جاتتىعىپ جاتىرمىز. دايىندىعىم دا جامان ەمەس.

- بۇيىرتسا، ريودا جەڭىس تۇعىرىنان كورىنەم دەيسىز عوي.. .

- اللا قالاسا، مەدال اكەلەمىن. جاي مەدال ەمەس، تەك التىن الۋىم كەرەك. سەبەبى، 69 كەلى - قازاقتىڭ سالماعى. وسىعان دەيىنگى 3 وليمپيادادا وسى سالماقتا اعالارىم باقتيار ارتايەۆ، باقىت سارسەكبايەۆ، سەرىك ساپيەۆ التىن الىپ كەلدى. ەندىگى كەزەك مەندە ەكەنىن بىلەمىن. وسى اتى اتالعان اعالارىم سالعان جولدى جالعاۋ - مەنىڭ مىندەتىم ءارى ارمانىم. سول ءۇشىن بار كۇش- جىگەرىمدى جيناپ، ەلگە التىن جۇلدەمەن ورالۋدى وزىمە باستى مىندەت ەتىپ وتىرمىن.

- كوماندا كاپيتانى رەتىندە قاسىڭداعى ارىپتەستەرىڭ تۋرالى نە ايتاسىڭ؟ وزىڭنەن باسقا كىمدەر ەلىمىزگە جۇلدە سىيلاۋى مۇمكىن؟

- وليمپياداعا ەشكىم جەڭىلەم دەپ بارمايدى. ءبارىنىڭ ارمانى - جەڭىس تۇعىرىنان كورىنۋ. سوندىقتان بارلىعى دا ەل نامىسى ءۇشىن ايانىپ قالماسى انىق. وسىندا ريوعا باراتىن بوكسشىلار بىرگە جاتتىعىپ جاتىرمىز. دايىندىعىمىز دا جاقسى. ەندى «باق شابا ما، باپ شابا ما» دەگەندەي بۇيىرعانىن كورەمىز. ءبىراق، قازاق بوكسشىلارىنان ەل ۇلكەن ءۇمىت ارتىپ وتىرعانىن جاقسى بىلەمىز. ءبىز ءبىر ءۇيدىڭ بالاسىنداي بىرىگىپ، سول ءۇمىتتى اقتايمىز دەپ ايتا الامىن.

- اڭگىمەڭىزگە راحمەت! ارمانىڭا جەتىپ، التىن جۇلدەمەن ورالۋىڭا تىلەكتەسپىز.

 اۆتور: كۇنسۇلتان وتارباي 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى