مىسىردى سوڭعى ءجۇز جىلدا بولماعان الاپات قۋاڭشىلىق جايلادى
الايدا حالىقتىڭ وعان سەنگىسى جوق.
اسىىرەسە، ەگيپەتتىڭ سولتۇستىگىندەگى داكاحليا پروۆينتسياسىندا ورنالاسقان ەل-اراب ماگۋب اۋىلىنىڭ تۇرعىندارى سۋعا ءزارۋ. تۇرعىندار تىرشىلىك ءنارىن وزدەرى قازعان قۇدىقتان الادى. الايدا ولار سۋدى جۋىنۋعا بولماسا، ىشۋگە، اس ازىرلەۋگە جارامسىز ەكەنىن ايتادى، دەپ حابارلايدى 24- ارناسىنىڭ ءتىلشىسى.
«ءبىز بيلىكتىڭ قولىنان كەلمەيتىن زاتتى سۇراپ وتىرعان جوقپىز. ءبىز اۋىز سۋعا ءزارۋمىز. بۇعان دەيىن تالاي مارتە جەرگىلىكتى بيلىككە تالاپتارىمىزدى ايتقان بولاتىنبىز. ولار جۋىق ارادا بۇل ماسەلەنى شەشىپ بەرەمىز دەپ ۋادە ەتكەنىمەن، ەش ناتيجە جوق. بۇگىندە سۋ تاپشىلىعىنان داكاحليا پروۆينتسياسىنداعى تاعى ءبىر ەلدى مەكەن جاپا شەگىپ وتىر»، - دەيدى جەرگىلىكتى تۇرعىن ۆاگي مۇحاممەد.
ال ەل حافەر شەباب اۋىلىنداعى فەرمەرلەر قۋاڭشىلىق كەسىرىنەن تاۋىپ جۇرگەن ءناپاقالارىنان ايىرىلىپ وتىرعاندارىن قىنجىلا جەتكىزدى.
سۋعا ءزارۋ بولعان جەرگىلىكتى حالىق بۇل جاعدايدى «ەفيوپيانىڭ قايتا وركەندەۋىنىڭ ۇلى دامباسى» جوباسىمەن بايلانىستىرىپ وتىر. سۋدانمەن اراداعى شەكاراعا جاقىن ورنالاسقان نىساننىڭ قۇرىلىسى 2011-جىلى باستالعان بولاتىن. مىسىرلىقتار «ءنىل وزەنىندەگى سۋ دەڭگەيىنىڭ تومەندەۋىنە سونىڭ كەسىرى ءتيدى» دەگەن پىكىردە. ال سۋ رەسۋرستارى مينيسترلىگىنىڭ وكىلى حاني ءدابيستىڭ ايتۋىنشا، بۇل جاعدايعا ەفيوپيانىڭ قايتا وركەندەۋىنىڭ ۇلى دامباسىنىڭ قاتىسى جوق. ول كليماتتىڭ وزگەرۋىنەن تۋىنداعان ماسەلە.
بۇل سوڭعى 103 جىل ىشىندەگى ەڭ الاپات قۇرعاقشىلىق. ول ازداي، شارۋالار سۋدى كوپ تالاپ ەتەتىن كۇرىش سەكىلدى داقىلداردى وسىرەدى. بۇل دا جاعدايدى ءورشىتىپ وتىرعانى ءسوزسىز.
جالپى حالىق سانىنىڭ وسۋىنە بايلانىستى 2025-جىلعا دەيىن مىسىرلىقتار اراسىندا سۋدى تۇتىنۋ مولشەرى ەكى ەسەگە ارتۋى مۇمكىن. ساراپشىلار وسىلاي دەپ توپشىلايدى. سوندىقتان 9 جىلدان كەيىن ەلدەگى ەگىس القاپتارىنىڭ %60 كۇيىپ كەتۋى عاجاپ ەمەس.
