باۋىرجان بايبەك: ەل قاۋىپسىزدىگىن قورعاۋدا ەرلىك كورسەتكەن باۋىرلارىمىزدىڭ ءومىر جولى - كەيىنگى ۇرپاققا ۇلگى
بالۋان شولاق اتىنداعى سپورت سارايىندا ءوتىپ جاتقان قارالى جيىنعا الماتى قالاسىنىڭ اكىمى باۋىرجان بايبەك، مەملەكەت جانە قوعام قايراتكەرلەرى، الماتى قالالىق ءى ءى د، ت ج د، ۇلتتىق ۇلان جانە باسقا دا مەملەكەتتىك ورگانداردىڭ وكىلدەرى، سونداي-اق، مارقۇمداردىڭ دوستارى مەن ارىپتەستەرى جانە قالا جۇرتشىلىعى كەلىپ، مارقۇمنىڭ وتباسى مەن تۋعان تۋىستارىنا قايعىرىپ كوڭىل ايتتى.
«ارداقتى اعايىن، قۇرمەتتى قاۋىم. تۋعان حالقىنا بەرگەنىنەن بەرەرى مول، ەلىمىز ءۇشىن جاساعانىنان جاسارى ارتىق ارىستاي ازاماتتارىمىز كۇتپەگەن جەردەن باقيلىققا اتتاندى. ورنى تولماس بۇل قازا بارشامىزدى كۇيزەلتتى. قابىرعامىزدى قايىستىردى. ەل قاۋىپسىزدىگىن قورعاپ جۇرگەن بىرنەشە تۇلعانىڭ بەيبىت كۇندە اينالاسى 25 مينۋت ىشىندە مەزگىلسىز كەتۋى، ءومىر وزەگىنىڭ ءۇزىلۋىنىڭ قاس قاعىمداي ەكەندىگىن، جالعاندا تىنىشتىق پەن تاتۋلىقتان اسقان قۇندىلىق جوق ەكەنىن تاعى دا ءبىر ەسكە سالدى. بۇگىن اقتىق ساپارعا اتتانىپ بارا جاتقان ازاماتتار قوعامدىق ءتارتىپتى قامتاماسىز ەتىپ، تۇرعىندار تىنىشتىعىن قورعاۋ جولىندا، ياعني بابامىز ايتقانداي قۇل بولماۋ، كەرىسىنشە ەل بولۋ جولىندا مەرت بولدى. وسىندا تۇرعان ءاربىرىمىزدىڭ بەيبىت عۇمىرىمىز ءۇشىن وزدەرىنىڭ ومىرلەرىن قيىپ، جاندارىن پيدا ەتتى. بۇل وقيعا، ىشكى ىستەر ورگانى قىزمەتكەرلەرىنىڭ ءار كۇنى، ءار ساعاتى بولجاۋسىز ەكەنىن، سوندىقتان دا ەرلىككە پارا- پار بولاتىنىن تاعى ءبىر دالەلدەدى. قامشىنىڭ سابىنداي قىسقا عۇمىردا حالقىنا ادال ەڭبەك ەتىپ، ەرەن ەرلىك كورسەتكەن باۋىرلارىمىزدىڭ جارقىن بەينەسى ءبىزدىڭ جادىمىزدا ماڭگى ساقتالماق. ولاردىڭ ءومىر جولى - كەيىنگى ۇرپاققا ۇلگى، ونەگە. ولاردىڭ ەسىمدەرى ەل مەن قالا تاريحىندا قاشاندا التىن ارىپپەن جازىلادى»، - دەدى ءوز سوزىندە الماتى اكىمى باۋىرجان بايبەك.
قارالى جيىنعا جينالعان حالىقتىڭ سانى شامامەن 2000 عا جۋىقتايدى. ولاردىڭ ىشىندە ىشكى ىستەر ورگاندارىندا ىستەيتىن قىزمەتكەرلەردىڭ سانى 1000 نان اسادى.
اۆتور: ايبوتا جاپپاربەرگەن
