ق ر ىشكى ىستەر ءمينيسترى ەلباسى تاپسىرماسىمەن الماتىعا ۇشادى
بۇل تۋرالى مەملەكەت باسشىسىنىڭ قاتىسۋىمەن ءوتىپ جاتقان قاۋىپسىزدىك كەڭەسىنىڭ جەدەل وتىرىسىنا قاتىسقان ق ر پرەمەر-ءمينيسترى كارىم ءماسىموۆ تۋيتتەردەگى اككاۋنتىندا جازدى.
«مەملەكەت باسشىسى ىشكى ىستەر ءمينيسترى قاسىموۆقا الماتىعا ۇشۋدى تاپسىردى»، دەلىنگەن جازبادا.
ەسكە سالا كەتسەك، بۇگىن بەلگىسىز بىرەۋلەر الماتىنىڭ بىرنەشە اۋدانىندا وق اتقان - قازىر قالادا ۇ ق ك د عيماراتى، ابىلايحان كوشەسى تولىعىمەن جانە اباي داڭعىلى قورشاۋعا الىندى.
قارۋلى قاقتىعىس ناتيجەسىندە 7 پوليتسيا قىزمەتكەرى اۋرۋحاناعا ءتۇستى. وكىنىشكە قاراي، وسى اتىس سالدارىنان ءبىر بەيبىت تۇرعىن مەن ءۇش پوليتسيا قىزمەتكەرى قازا تاپقانى حابارلانىپ وتىر.
شابۋىلشىلاردىڭ ءبىرى دەرەۋ قۇرىقتالدى، ەكىنشىسى كەيىنىرەك ۇستالدى. سونداي-اق الماتى قالاسىنىڭ اۋماعىندا تەرروريستىك قاۋىپتىلىكتىڭ «قىزىل» دەڭگەيى بەلگىلەندى.
