الماتىداعى ەلدى دۇرلىكتىرگەن شابۋىل: وقيعانىڭ بارىسى - فوتو، كەسكىن
قارۋلى ادام قارۋ كەزەنىپ باسقا ءبىر كولىكتى توقتاتىپ، سوعان وتىرىپ ءىزىن سۋىتقان.
وسى وقيعاعا كۋا بولعان ەر ادامعا جەدەل مەديتسينالىق جاردەم قاجەت بولدى. دارىگەرلەردىڭ ايتۋىنشا، ول قاتتى ۇرەيلەنگەن. ال پوليسيا قىزمەتكەرلەرى دەرەۋ قارۋلى ادامنىڭ ىزىنە ءتۇستى.
كۋاگەرلەردىڭ ايتۋىنشا، وسىدان سوڭ قىلمىسكەر اينالاداعى ادامدارعا وق جاۋدىرعان. جارالانعاندار جانە زارداپ شەككەندەر بار.
جالپى، اتىستان 14 ادام جاراقات الدى. قىلمىسكەر نيكولسكي بازارى ماڭىندا جانە تولە ءبي- ابىلاي حان كوشەلەرىنىڭ قيىلىسىندا بىرنەشە ادامدى جاراقاتتادى. ءدال وسى ماڭدا «بۋران» پاترۋلدىك ەكيپاجىنىڭ ماشيناسىنا وق اتىپ، سونىڭ سالدارىنان 2 قىزمەتكەر جارالاندى.
جارالى ادامداردى الماتى اۋرۋحانالارىنىڭ بىرىنە جەتكىزىپ جاتقان ءسات. فوتو الەۋسەتتىك جەلىدەن الىندى
«كوشەدە قان سۋشا اقتى. پوليسيا جانە قاراپايىم ادامداردىڭ كولىكتەرىنە وق اتىلدى. ەكى ادام جارالاندى، پوليتسەيدىڭ موينىنا وق ءتيدى. ول ءتىرى مە، جوق پا، بىلمەيمىن. تاعى ءبىر كۇزەت قىزمەتكەرى جاراقاتتاندى» ، - دەپ باياندادى تولە ءبي- ابىلاي حان كوشەلەرى قيىلىسىندا بولعان اتىستىڭ كۋاگەرى.
قالا ىشىمەن قاشقان قىلمىسكەردىڭ ىزىنە ءتۇسۋ كەزىندە جاراقات العاندار كوبەيدى، ول تۋرالى ناقتى مالىمەت جوق. قىلمىسكەرلەر بەيبىت تۇرعىنداردىڭ كولىكتەرىنە وق اتىپ، پوليتسەيلەردى جارالادى. قاندى قولدىڭ ءبىرىن پوليتسەيلەر «قازاقكونتسەرت» اق اۋدانىندا قولعا ءتۇسىردى. ونىڭ كىم ەكەنى بەلگىلى بولىپ وتىر.
«وكىنىشكە قاراي، قىلمىسكەر قالا تۇرعىنى تىزگىندەگەن كولىكتى يەلەنۋگە ارەكەت ەتىپ، جۇرگىزۋشى العان جاراقاتىنان كوز جۇمدى. العان جاراقاتتارىنان ءۇش پوليتسيا قىزمەتكەرى قايتىس بولدى» ، - دەپ ءمالىم ەتتى ءى ءى م باسپا ءسوز قىزمەتى.
الدىن الا مالىمەتتەر بويىنشا، ۇستالعان ادام بۇرىن سوتتالعان 27 جاستاعى قىزىلوردانىڭ تۋماسى، ول وتكەن دەمالىستا ورىن العان ايەل ولىمىنە كۇدىكتەلىپ وتىر.
قالادا «سيرەنا» جەدەل جوسپارى ەنگىزىلدى، بارلىق پوليتسيانىڭ قىزمەتكەرلەرى ۇستالعان قىلمىسكەردىڭ سىبايلاستارىن ۇستاۋعا جۇمىلدىرىلدى.
سونداي- اق «پەرەحۆات» ارنايى جوسپارى جۇرگىزىلىپ جاتىر. پوليتسەيلەرگە وق اتقان ەكىنشى ادام ىزدەستىرىلۋدە.
ساۋدا ورتالىقتارى، قالا بازارلارى، قارۋ- جاراق دۇكەندەرى جابىق.
«الماتى قالاسىندا «پەرەحۆات» ارنايى جوسپارى ەنگىزىلدى. پوليتسيا قىزمەتكەرى اراسىندا وپات بولعاندار بار. شابۋىل جاساعانداردىڭ ءبىرى ۇستالدى، تاعى بىرەۋى - ىزدەۋدە» ، - دەدى الماتى قالالىق تەرروريزممەن كۇرەس جونىندەگى جەدەل شتاب.
الماتىنىڭ اۋەجايى مەن ۆوكزالىندا قاۋىپسىزدىك شارالارى كۇشەيتىلدى، الايدا ءبىرى شتاتتىق كەستەگە ساي جۇمىس ىستەپ تۇر.
تەكسەرىلمەگەن مالىمەتتەر بويىنشا، قاسكويلەر قاپشاعايداعى اسكەري بولىمگە باسا- كوكتەم كىرمەكشى بولعان. الايدا قورعانىس مينيسترلىگى قاپشاعايداعى اسكەري بولىمگە شابۋىل جاسالعانى تۋرالى سىبىستى جوققا شىعاردى.
«اسكەري بولىمدە ءبارى تىنىش، قالىپتى» ، - دەدى قورعانىس ۆەدومستۆوسىنداعى دەرەككوز.
"استانا ۋاقىتىمەن ساعات 12:20-دا الماتى قالاسى اۋماعىندا تەررورلىق قاۋىپتىڭ «قىزىل» دەڭگەيى ەنگىزىلدى. وسىعان بايلانىستى قالا تۇرعىندارى مەن قوناقتارىن جوعارىدا اتالعان دەڭگەي كەزىندەگى تالاپتاردى بۇلجىتپاي ورىنداۋعا شاقىرامىز"، - دەپ جازادى الماتى ءى ءى د.
مۇنان سوڭ ىلە- شالا الماتىدا انتيتەررورلىق وپەراتسيا جۇرگىزىلەتىندىگى تۋرالى جاريالاندى.
ق ر ق م ەلىمىزدىڭ قك اسكەري بولىمدەرىندە جانە مەكەمەلەرىندە ءتارتىپتى كۇشەيتتى.
«الماتىدا تەرروريستىك قاۋىپتىڭ قىزىل دەڭگەيى ەنگىزىلۋىنە بايلانىستى ق ر ق ك اسكەري بولىمدەرى مەن مەكەمەلەرى قىزمەت ەتۋدىڭ كۇشەيتىلگەن رەجيمگە كوشىرىلدى. قارۋ- جاراق جانە وق- ءدارىنى ساقتاۋ نىساندارىن كۇزەتۋ قوسىمشا كۇشەيتىلدى. سونىمەن قاتار الەۋمەتتىك جەلىلەردە، WhatsApp-مەسسەندجەرىندە تاراتىلعان قاپشاعاي قالاسىنداعى اسكەري بولىمگە شابۋىل جاسالعانى تۋرالى اقپارات شىندىققا جاناسپايدى» ، - دەپ ءمالىم ەتتى ق ر ق م باسپا ءسوز قىزمەتى.
