قازاقستاندا بۇرىن-سوڭدى بولماعان ءبي جارىسى وتەدى
اتالعان بايقاۋ حالىقارالىق ءبي جارىسىنىڭ ورتا ازيا اۋماعىنداعى العاشقى نۇسقاسى بولماق.
بۇل تۋرالى حابار ارناسى حابارلايدى.
باعدارلاما قىتاي، اۋستراليا، ۇلى بريتانيا سىندى الەمنىڭ 37 ەلىندە كورسەتىلىپ، ەڭ جوعارعى رەيتينگتەرگە يە بولعان. ال ەلىمىزدە وتەتىن ءبي جارىسىنا 10 جاستان اسقان كەز كەلگەن ازامات قاتىسا الادى. «باستى تالاپ - جەڭىسكە دەگەن ۇمتىلىس پەن ونەرگە قۇشتارلىق»، - دەيدى ۇيىمداستىرۋشىلار.
«بۇل جوبانىڭ پايداسى زور. ويتكەنى ءبىزدىڭ ەلدە بيمەن اينالىساتىن ءارتۇرلى قالالاردا، اۋدانداردا، ءبيدىڭ ءتۇرلى جانرىن مەڭگەرگەن تالانتتى جاستار وتە كوپ. ءبىز وسى وتاندىق ءبي قوزعالىسىن دامىتامىز دەگەن ماقسات قويىپ وتىرمىز جانە جوبانىڭ باستى ماقساتى ول سالاۋاتتى ءومىر سالتىن، سپورت، بۇقارالىق سپورتتى كەڭىنەن ناسيحاتتاۋ»، - دەيدى «حابار» ارناسىنىڭ ديرەكتورى رينات كەرتايەۆ.
«بيلە، قازاقستان!» جوباسىنا قاتىسۋشىلارعا ايگىلى بيشىلەر باعا بەرەدى. قازىلار القاسىنىڭ قۇرامىنا شەتەلدەن ارنايى مامان شاقىرتىلعان. بايقاۋ قاتىسۋشىلارى تورەشىلەردىڭ نازارىنا ءتۇرلى جانرداعى بيلەردى ۇسىنادى. جارىسقا سونداي-اق تاياۋ جانە الىس شەت ەلدەرىنىڭ وكىلدەرى ءۇشىن دە ەسىك اشىق.
«ازاماتتار، ازاماتشالار ءوزىنىڭ ءبيىنىڭ قانشالىقتى شىنىققانىن جالعىز عانا ءوزىنىڭ تۋعان-تۋىستارىنا ەمەس، جالپى ەلگە دە كورسەتە الادى. ونىڭ ىشىندە بالەتتەن باستاپ حيپ-حوپپەن اياقتاۋعا بولادى. جالپى ەگەر ادامنىڭ ءوزىنىڭ بويىندا ءبىر جاڭا ويلاپ تاپقان ءبيى بولسا، ونى دا كورسەتۋگە بولادى.
قازاقستان بويىنشا بۇل بايقاۋعا ىرىكتەۋ كەزەڭدەرى استانادا شىلدەنىڭ 23 ءى مەن 24 ءى ارالىعىندا، ال الماتىدا 30- جانە 31- شىلدەدە وتەدى. ەستەرىڭىزگە سالايىق، «بيلە، قازاقستان!» شوۋى ارنانىڭ ەفيرىنەن كۇزگى تەليەۆيزيالىق ماۋسىمنىڭ باسىندا كورسەتىلەتىن بولادى»، - دەيدى قازىلار القاسىنىڭ مۇشەسى داستان ورازبەكوۆ.
