قاراعاندىلىق شەنەۋنىكتەرگە جەمقور ارىپتەستەرى تۋرالى فيلم كورسەتىلدى

كەڭەيتىلگەن جينالىس ق ر سىبايلاس جەمقورلىققا قارسى ءىس-قيمىل ۇلتتىق بيۋرو ءتوراعاسىنىڭ ورىنباسارى اليك شپەكبايەۆتىڭ قاتىسۋمەن ءوتتى. ول سىبايلاس جەمقورلىققا قارسى كۇرەس تۋرالى زاڭنىڭ ەگجەي- تەگجەيىن تۇسىندىرەتىن بايانداما جاسادى.

شپەكبايەۆ ق ر بۇرىنعى پرەمەر-ءمينيسترى سەرىك احمەتوۆتىڭ جانە قاراعاندى وبلىسىنىڭ بۇرىنعى جوعارى لاۋازىمدى شەنەۋنىكتەرىنىڭ داۋلى جەمقورلىق ىستەرىن ەسكە سالدى. جانە وسى پروتسەسستەردىڭ ايماقتاعى مەملەكەتتىك قىزمەتكەرلەرگە ساباق بولماعانىن ايتتى.

 «وبلىستاعى جەمقورلىق قۇقىق بۇزۋشىلىق بويىنشا ءبىرىنشى ورىندا جەرگىلىكتى اتقارۋ ورگاندارى تۇر. جەمقورلىقتان بولەك، مەملەكەتتىك قىزمەتكەرلەر قىلمىس جاساۋعا دەيىن بارعان. بۇل مەملەكەتتىك بيلىكتىڭ بەدەلىنە نۇقسان كەلتىرەدى»، - دەدى ا. شپەكبايەۆ.

ايماقتاعى جەمقورلىق قۇقىق بۇزۋشىلىقتىڭ الدىن الۋ جانە ەسكەرتۋ جۇمىستارى تۋرالى قاراعاندى وبلىسى اكىمى اپپاراتىنىڭ جەتەكشىسى جانات ىسقاقوۆ مالىمدەدى.

«مەملەكەتتىك قىزمەتكەرلەر - «نۇر وتان» پارتياسىنىڭ مۇشەلەرى جىبەرگەن قۇقىق بۇزۋشىلىقتار پارتيالىق باقىلاۋ كوميسسياسىندا جانە فيليالداردىڭ ساياسي كەڭەسى بيۋروسىندا قارالادى.

2015 -جىلدىڭ ەكىنشى جارتىسىن قورىتىندىلاي كەلە، پارتيانىڭ 9 مۇشەسى پارتيالىق جاۋاپكەرشىلىككە تارتىلدى. ونىڭ ىشىندە 6 مۇشە جەمقورلىق قۇقىق بۇزۋشىلىق جاساعان. بارلىق 9 تۇلعا «نۇر وتان» پارتياسىنان شىعارىلدى»، - دەپ حابارلادى ج. ىسقاقوۆ.

جينالىس قاتىسۋشىلارىنا سىبايلاس جەمقورلىققا قارسى قىزمەت تۇسىرگەن بەينەروليكتەر كورسەتىلدى. فيلمدەردىڭ بىرىندە ايماقتاعى جەمقورلىق فاكتىسىمەن ۇستالعانداردىڭ، ايىپتالعانداردىڭ اتى-ءجونى ايتىلدى. كادر سىرتىنداعى ماتىندە مەملەكەتتىك ساتىپ الۋلار مەن جەر قاتىناستارى سالالارىنىڭ ءباز باياعىداي جەمقورلىققا باتقانى ايتىلدى.

«ىشكى ىستەر ورگاندارى دا جەمقورلىقتان ادا ەمەس. 2014-2016 -جىلدارى قىزمەتىن اسىرا پايدالانۋ مەن جەمقورلىق 143 قىلمىس تىركەلىپ، 59 قىزمەتكەر قىلمىستىق جاۋاپكەرشىلىككە تارتىلدى. قىلمىستىق ىستەردىڭ كوپشىلىگى پارا الۋمەن بايلانىستى»، - دەپ ايتىلادى فيلمدە.

سودان سوڭ فيلمدە سىبايلاس جەمقورلىق ءۇشىن سوتتالىپ، اباقتىدا جازاسىن وتەپ جاتقان قاراعاندىلىقتار ءسوز سويلەدى.

«بۇل ءبىزدىڭ ايماقتىڭ اتقارۋشى ورگاندارىنا ەش ابىروي اپەرمەيدى. ءبىراق، وسىنداي فورماتتا اقپارات الۋ ارقىلى ءبىزدىڭ ارىپتەستەر جەمقورلىقتان بويىن اۋلاق ۇستايدى دەگەن ۇمىتتەمىن»، - دەدى قاراعاندى وبلىسىنىڭ اكىمى نۇرمۇحامبەت ابدىبەكوۆ.

ول ا. شپەكبايەۆقا كەزدەسۋ ءۇشىن العىس ءبىلدىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى