احمەتوۆ ءىسى: سوتتالعانداردىڭ تاعى ءبىرى ۇلگىلى ءتارتىبى جانە العان ماراپاتتارى ءۇشىن بوساتىلدى
ول قاراعاندى وبلىسىنىڭ اباي اۋداندىق سوتىنىڭ شەشىمىمەن جالپى رەجيمدەگى كولونيادان بوساتىلدى. بۇل تۋرالى BNews.kz تىلشىسىنە وبلىستىق سوتتىڭ اقپاراتتىق قامتاماسىز ەتۋ ءبولىمىنىڭ باسشىسى گۇلبارشىن جىتىكوۆا ءمالىم ەتتى.
«ۇلگىلى ءتارتىبى ءۇشىن ەرنار دارىبەكوۆ جالپى رەجيمدەگى كولونيادان شارتتى تۇردە مەرزىمىنەن بۇرىن بوساتىلدى. ونى بوساتۋ جونىندەگى قاۋلى بيىلعى جىلدىڭ 20- ماۋسىمىندا شىعارىلىپ، ارادا 15 كۇن وتكەن سوڭ دارىبەكوۆ بوستاندىققا شىقتى. ول قاراعاندى وبلىسىنىڭ اباي اۋداندىق سوتىنىڭ شەشىمىمەن بوساتىلدى»، - دەدى گ. جىتىكوۆا.
قاراعاندى قالاسىنىڭ جەر قاتىناستارى ءبولىمىنىڭ بۇرىنعى باسشىسى ەرنار دارىبەكوۆ ەلىمىزدىڭ بۇرىنعى پرەمەر-ءمينيسترى سەرىك احمەتوۆتىڭ ءىسى بويىنشا سوتتالىپ، جالپى رەجيمدەگى كولونيادا 3 جىل مەرزىمىن وتەپ جاتقان. تۇزەتۋ مەكەمەسىندە دارىبەكوۆ ءوزىن جاقسى جاعىنان كورسەتىپ، كولونيا باسشىلىعى تاراپىنان گراموتالارمەن ماراپاتتالعان.
ەستەرىڭىزگە سالا كەتەيىك، 6- ماۋسىمدا قاراعاندى وبلىسىنىڭ بۇرىنعى اكىمى باۋىرجان ابدىشەۆ ا ك 159/1 تۇرمەسىنەن شارتتى تۇردە مەرزىمىنەن بۇرىن بوساپ شىققان بولاتىن.
باۋىرجان ابدىشەۆتى شارتتى تۇردە مەرزىمىنەن بۇرىن بوساتۋ جونىندەگى شەشىم 19- مامىردا قازىبەك اۋداندىق سوتىندا وقىلدى. قاراعاندى وبلىسىنىڭ بۇرىنعى اكىمى كەسىلگەن جازانىڭ جارتىسىنان استامىن وتەدى. ول دا جاقسى تارتىبىمەن كوزگە تۇسكەن.
بۇعان دەيىن ايتىلعانداي، باۋىرجان ابدىشەۆ مۇلكى تاركىلەنىپ، ءۇش جىل باس بوستاندىعىنان ايىرىلعان ەدى. ول سونداي-اق 5 جىلعا دەيىن مەملەكەتتىك لاۋازىمدى قىزمەتتە ىستەي المايدى.
جالپى سەرىك احمەتوۆ ءىسى بويىنشا پرەمەر- ءمينيستردىڭ ءوزىن قوسقاندا 21 ادام كۇدىكتى دەپ تانىلدى. ولاردىڭ بارلىعى جەمقورلىق ارەكەتتەرى ءۇشىن ايىپتالدى. سەرىك احمەتوۆكە 8 جىلعا بوس بوستاندىعىنان ايىرۋ جازاسى كەسىلدى. قازىر ول قاراعاندى وبلىسىنىڭ قاراباس كەنتىندەگى تۇرمەدە جازاسىن وتەپ جاتىر.
