الماتى وبلىسىندا مال ازىعىن دايارلايتىن زاۋىت اشپاق - فوتو

ول ەگىنشىلەرمەن جانە مالشىلارمەن سويلەسۋ بارىسىندا وبلىس ەكونوميكاسىنداعى اۋىل شارۋاشىلىعىنىڭ ءرولى، ساپالى ءارى ءتيىمدى باعادا ەت پەن ءسۇت ءوندىرۋ، ەگىس القاپتارىنان مول ءونىم الۋ، تۇتىنۋ نارىعىنىڭ اياسىن تاياۋ شەت ەلدەرگە قاراي كەڭەيتۋدىڭ ماڭىزى جايلى كەڭىنەن ايتتى، دەپ حابارلايدى وڭىرلىك اكىمدىكتىڭ باسپا ءسوز قىزمەتى.

وبلىس اكىمى العاش بارعان نىسان - جولامان اۋىلدىق وكرۋگىندەگى «شاديەۆ» ج ش س- نىڭ مال بورداقىلاۋ الاڭى. جوبا قازاق- وزبەك بىرلەسكەن ينۆەستيتسيالىق جوباسىنىڭ نەگىزىندە جۇزەگە اسىرىلعان. جالپى قۇنى ءبىر ميللياردقا جۋىق تەڭگەنى قۇرايدى. شارۋاشىلىق باسشىسى فازىل شادييەۆتىڭ ايتۋىنشا، ينۆەستيتسيا قارجىسى ءتيىستى ينفراقۇرىلىمى بار التى ءىرى سيىر قورا سالۋعا جانە ءبىر جارىم مىڭ باس انالىق، بەس انگۋس ەتتى تۇقىمدى بۇقالار مەن قاجەتتى تەحنيكا ساتىپ الۋعا جۇمسالعان. ەتتى وزبەكستانعا ەكسپورتتاۋ، تانىمال «بەككەر» شۇجىق كومپانياسىنا وڭدەۋگە وتىكىزىپ، ءوز فيرمالىق دۇكەندەرى ارقىلى ساتۋ كوزدەلىپ وتىر.

سونىمەن قاتار سەرىكتەستىككە تيەسىلى ءتورت ءجۇز مىڭ گەكتاردا جاقىن ارادا ءىرى قارانى بوس جىبەرەتىن ورىن، جەم ازىعى تۇيىرلەرىن شىعاراتىن شاعىن زاۋىت سالۋ دا جوسپاردا بار.

وبلىس باسشىسى مۇنداي جاقسى باستامالارعا قاشاندا قولداۋ كورسەتىلەتىنىن جەتكىزدى.

مۇنان سوڭ وبلىس اكىمى اماندىق باتالوۆ « قىزىلشوقى» ج ش س- نىڭ ەگىس القابىن ارالادى. القاپتا جيىن-تەرىن جۇمىستارى باستالىپ تا كەتكەن. شارۋاشىلىق باسشىسى يبەن ماشاربەتوۆ كەلگەن دەلەگاتسياعا جۇمىستىڭ جاي- كۇيىن بايانداپ بەردى. جىل سايىن مۇندا گەكتارىنان 24-25 سەنتنەردەن ءونىم الىنادى. بيدايدان بولەك مۇنداعى 1500 گەكتار جەرگە ارپا، زىعىر ءوسىرىلىپ وتىر. شارۋالار وبلىس باسشىسىنا بيىلعى جىلى مول جينالعالى تۇرعان ءونىمدى وتكىزۋ ماسەلەسىنە جاردەمدەسۋدى سۇرادى. اماندىق باتالوۆ سول جەردە ءتيىستى لاۋازىمدى ازاماتتارعا وسى ماسەلەگە بايلانىستى تاپسىرما بەردى. كومباين جانە تراكتور جۇرگىزۋشىلەرىمەن ەمەن- جارقىن اڭگىمەلەسىپ، قيىن دا جاۋاپتى ءىس اتقارىپ جۇرگەن ەڭبەكتەرىنە ريزاشىلىعىن ءبىلدىردى.

سونداي-اق، بۇل كۇنى «ارقارلى» شارۋا قوجالىعىنىڭ القابىندا بولىپ، ءشوپ جيناۋ ناۋقانىنىڭ بارىسىمەن تانىستى. جانە «اقباسوۆ» ج ك- نىڭ سارىوزەك كەنتىندەگى ەت كومبيناتىنا بارىپ كوردى.

مۇندا شۇجىق، قىسقا شۇجىقشا، ۇنتاقتالعان ەت دايىندالىپ، وبلىستاعى ساۋدا ورىندارىنا جونەلتىلەدى. كومبينات ءبىر كۇندە وتىز ءىرى قارانىڭ ەتىن وڭدەي الادى. كومبيناتتىڭ اشىلعانى جەرگىلىكتى مال وسىرۋشىلەرگە ءتيىمدى بولعان. ولار مۇندا بۇگىنگە دەيىن التى جۇزدەن استام باس مال وتكىزىپ ۇلگەرىپتى. ال كاسىپورىن 17,5 توننا دايىن ءونىمىن ساۋدالاعان. وبلىس اكىمى ساپارىن قورىتىندىلاي كەلە، ۇساق شارۋاشىلىقتاردى ىرىلەندىرۋدىڭ تيىمدىلىگىنە تاعى ءبىر توقتالىپ، كووپەراتسيانىڭ الماتى ماڭىندا ازىق- تۇلىك بەلدەۋىن دامىتۋ، حالىقتىڭ ءال- اۋقاتىن كوتەرۋ، تۇرعىنداردى ساپالى دا ءتيىمدى باعاداعى ازىق- تۇلىكپەن قامتۋ ماسەلەلەرىندەگى ماڭىزىن اتاپ ءوتىپ، وسى باعىتتا ءتيىستى ورگاندارعا تاپسىرمالار بەردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى