سۋ تاسقىنىنان موڭعوليا قازاقتارى باسپاناسىز قالدى - فوتو

وقيعا 10 - شىلدە كۇنى بولعان. جاڭبىر سالدارىنان بولعان سۋ تاسقىنى كەسىرىنەن 130 ءۇي قۇلاپ، 700 شاقتى ادام باسپاناسىز قالعان. ادام شىعىنى دا بار كورىنەدى.

بايان- ولگي قالاسىنىڭ تۇرعىنى مۇراتبەك بادەي ۇلىنىڭ ايتۋىنشا، 15 مينۋتتاي عانا جاۋىپ وتكەن بۇرشاقتىڭ سوڭى وسىنداي اپاتقا ۇلاسقان.

- شىلدەنىڭ 10 ى شامامەن كەشكى ساعات بەس مولشەرىندە 15 مينۋتتاي بۇرشاق جاۋدى. بۇرشاقتان سوڭ قالانىڭ ءبىر جاق شەتىندە كوشكىن بولىپ، 200 گە جۋىق ءۇيدى قورا- قوپسىسىمەن قوسا شايىپ كەتتى. قۇلاعان ءۇي استىندا ءتورت جاسار بالا قالىپ قويعان. سەلدەن كەيىن قۇلاعان باعانداعى ەلەكتر سىمىنا سوعىلىپ تاعى ءبىر ادامنىڭ مەرت بولعان، - دەيدى ول ازاتتىققا.

قالا تۇرعىندارىنىڭ ايتۋىنشا، قالانىڭ ورتاسىن جارىپ اعاتىن قوبدا وزەنىنىڭ سول جاق جاعالاۋىنداعى ۇيلەردىڭ ءبىر بولىگى تاسقىن كەزىندە سۋ استىندا قالعان.

موڭعوليالىق بلوگەر جاناربەك اقىبي « ءۇش كۇننەن بەرى سۋ شايعان اۋماقتى ارالاپ، جاعدايدى باقىلاپ جۇرگەنىن» ايتادى.

- جىلدام ءارى قاتتى بولعانى سونشا، 10 نەشە مينۋت ىشىندە تۇسكەن بۇرشاق قالىڭدىعى بەس سانتيمەتردەن اسىپ كەتتى. قالا ماڭى تاۋ بولعاندىقتان، [ەرىگەندە سۋى] جەرگە سىڭبەي كوشكىنگە ۇلاسىپ، قالانىڭ التىنشى، توعىزىنشى بولىكتەرىن سۋ الىپ كەتتى. كوشكىن قاتتى بولعانى سونشا، ۇيلەردىڭ توبەسى ورتاسىنا ءتۇسىپ، قابىرعالارى قاقىراپ كەتكەن. ءتىپتى سۋ شايعان جەرگە قايتادان ءۇي تۇرعىزۋ مۇمكىن ەمەس، - دەيدى جاناربەك اقىبي.

بلوگەر « ءۇيىن سۋ شايىپ كەتكەن تۇرعىنداردىڭ كەيبىرى كيىز ءۇي تىگىپ، ۋاقىتشا پانالاپ وتىرعانىن » ايتتى.

- ولگەيدىڭ (قالانى ايتادى - رەد. ) ۇستىندە قارا بۇلت ءالى سەيىلگەن جوق. كوشكىن قايتالانۋى مۇمكىن دەگەن كۇدىكپەن كولىگى بارلاردىڭ ءبارى تاۋدا ءجۇر. ايماق اكىمشىلىگى مەن كوميسسيا مۇشەلەرى دە كوشكىن قاۋپى بولادى دەگەن تاۋلى ايماقتاعى جولداردى باقىلاۋمەن شەكتەلىپ وتىر. جاپا شەككەندەرگە ءۇي سالۋعا جەر ءبولىنىپ بەرىلدى. باسقا كومەك كورسەتە العان جوق، - دەيدى اقىبي.

جاناربەك اقىبيدىڭ ءسوزىن بايان- ولگي ايماعى اكىمى دارمەن قۇزىكەي ۇلى دا راستادى.

- 170 ءۇي كوشكىن جولىندا قالىپ قويدى. سونىڭ 100 ءى تۇرۋعا مۇلدەم جارامسىز بولىپ، 700 ادام باسپاناسىز قالدى. قازىر مۇمكىندىگى بارلار ايماق اكىمى تاراپىنان بولىنگەن جەرلەرگە ۋاقىتشا كيگىز ءۇي تىگىپ وتىر. ال مۇمكىندىگى جوقتار مەكتەپ جاتاقحانالارىنا ورنالاستى. ازىرگە ايماق اكىمدىگى تاراپىنان كورسەتىلگەن كومەك وسى عانا. ەندى ۇكىمەتتەن ءۇي سالۋعا قارجىلاي كومەك سۇراپ جاتىرمىز، - دەيدى اكىم.

ءتورت جاسار بالانىڭ ءۇي استىندا قالىپ قويعانى تۋرالى دەرەكتى راستاعان دارمەن قۇزىكەي ۇلى «مال- مۇلىك شىعىنى ءالى تولىق ەسەپتەلمەگەنىن» ايتتى.

ال، جاناربەك اقىبي «سەلدەن زارداپ شەككەندەر ءۇيسىز قالامىز با دەپ قاتتى الاڭداپ وتىرعانىن» ايتادى.

- زارداپ شەكەندەرگە قايتا ءۇي سالۋ ماسەلەسىن ازىرگە ەشكىم شەشە قويعان جوق. حالىقتىڭ الاڭداۋىنا مەنىڭشە ءۇش ۇلكەن سەبەپ بار، - دەيدى ول.

جاناربەك اقىبي «ەڭ ءبىرىنشى سەبەپ» رەتىندە جاقىندا وتكەن (ماۋسىمنىڭ 29 ى) موڭعوليا پارلامەنتى سايلاۋىن اتادى.

- زاڭ بويىنشا سايلاۋدا كەيىن بيلىك 30 كۇن ىشىندە ەشقانداي قارجىعا بۇيرىق شىعارا المايدى. سوندىقتان جاڭا باسشىلار (پارلامەنتتە جاڭادان قۇرىلاتىن ۇكىمەتتى ايتادى - رەد. ) جۇمىسىنا تەز كەلگەنى دۇرىس، - دەيدى اقىبي.

ول «زارداپ شەككەن جۇرتقا قارجىلىق تۇرعىدان ازىرگە جەكە تۇلعالار عانا كومەكتەسە الاتىنىن» ايتادى.

موڭعوليا قازاقتارىنىڭ تابيعات اپاتىنان زارداپ شەككەنى تۋرالى دۇربەلەڭ بۇل ەلدەن ورالماندار كوشىپ كەلىپ جاتقان قازاقستانعا دا جەتكەن. قازاقستاندىق بەلسەندىلەر Facebook جەلىسىندە بۇگىن جىلۋ جيناي باستاعاندارىن حابارلادى. سونىڭ ءبىرى اياتجان احمەتجان:

- قازىر ول جاقپەن امانگەلدى قۇرمەت ۇلى دەگەن ازامات حابارلاسىپ، قانداي كومەك كەرەگىن ۇعىسىپ جاتىر، كەلەسى دۇيسەنبى اۋدارىلعان اقشا [بولسا] جانە باسقا دا كومەكتەردى الىپ امانكەلدى ەكەۋىمىزدىڭ ءبىرىمىز جول تارتامىز، - دەيدى.

سانى 150 مىڭ دەپ شامالاناتىن جانە كورشىلىگى بايان- ولگي ايماعىندا تۇراتىن ەتنيكالىق قازاقتار موڭعوليا حالقىنىڭ 5 پايىزى بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى