قازاقستاندىق ازاماتتار بايان ولگەي قالاسىندا سەلدەن جاپا شەككەن قانداستارعا قايىرىمدىلىق شاراسىن باستادى - فوتو
فەيسبۋكتەگى جەكە پاراقشاسىندا بەلسەندى ازامات اياتجان احمەتجان جۇرتشىلىققا جار سالىپ، قايىرىمدىلىققا قارجى جيناۋ باستالعانىن حابارلاپ وتىر.
«قادىرلى اعايىن!
«ءار قازاق - مەنىڭ جالعىزىم» دەپ اقىن سابىر اداي ايتپاقشى، جەر بەتىندەگى بار قازاقتىڭ تىلەۋى دە، نيەتى دە ءبىر عوي. كەشەگى بايان ولگەيدەگى سەل ءبارىمىزدىڭ جانىمىزدى اۋىرتتى. ەل قينالعاندا قول ۇشىن بەرمەسەك، ەلدىگىمىز قايسى؟! سول ءۇشىن سەلدەن جاپا شەككەن اعايىنعا كومەك بەرۋدى ءجون كوردىك!
قازاقتىڭ وسىندايدا «كوپ تۇكىرسە - كول» دەيتىنى تاعى بار عوي. سونى ەسكە الىپ، ءوز اتىمىزداعى ەسەپ شوتتى پايدالانىپ، ەلدەگى قازاقتىڭ جۇرەگى سىرتتاعى قازاق ءۇشىن قاشان دا اۋىراتىنىن، كۇيەتىنىن كورسەتپەك نيەتىمىز بار.
كوپ ەكەنىمىزدى، ەل ەكەنىمىزدى كورسەتەلىك:
حالىق بانك:
4402577501801032
ي ن ن: 860718399050
ال، قولداپ جىبەرەيىك، ءبىر تيىن بولسا دا، سول ەلگە جەتكىزۋدى ازاماتتىق بورىش ەتتىك!
شوت جەكە مەنىڭ ءوز اتىمدا، ءار تۇسكەن تيىن موڭعولياداعى قازاقتارعا جول تارتادى!
اعايىن، قولداپ ءبولىسىپ جىبەرىڭىزدەر! بۇل مەنىڭ عانا ەمەس، وسىنداعى كوپ جىگىتتەردىڭ بىرىگىپ كوتەرىپ جاتقان شارۋاسى، ءبىر جاعىنان شىعىسالىق!
كەلەسى دۇيسەنبى جولعا شىعامىز، سوعان دەيىن جابىلىپ، قول ۇشىن بەرەيىك!» دەلىنگەن حابارلامادا.
ەسكە سالا كەتەيىك، موڭعوليانىڭ قيىر باتىسىندا ورنالاسقان، نەگىزىنەن قازاقتار مەكەندەيتىن بايان ولگەي قالاسىندا كۇنى كەشە قاتتى سەل ءجۇرىپ، 80 ءۇي قيراعان. ءبىر ەرەسەك ادام جانە بىرنەشە بالا قازا تاپقان. ودان بولەك، مال شىعىنى بار. بۇل تەك الدىن الا مالىمەتتەر ەكەنىن ەسكەرتە كەتكەن ءجون، سوندىقتان جاپا شەككەندەر سانى ءوسۋى بەك مۇمكىن.
