تاۋەلسىزدىكتەن بەرى قانشا قازاق بالاسى وليمپيادانى باعىندىردى؟
بۇل، ارينە وتانداستارىمىز قاتىسقان وليمپيادانىڭ سانىمەن سالىستىرعاندا جوعارى جەتىستىك. بيىل تاۋەلسىزدىگىمىزدىڭ 25 جىلدىعىنا تۇسپا-تۇس كەلىپ وتىرعان ريو وليمپياداسىندا تاعى قانشا مەدال الاتىنىمىزدى الداعى ۋاقىت كورسەتە جاتار.
ءبىز بۇگىن وسى 5 جازعى ويىنداردا قانشا قازاق بالاسى وليمپ تۇعىرىنا قول جەتكىزگەنى تۋرالى ايتىپ وتكەندى ءجون سانادىق. ناقتىراق ايتساق، 52 مەدالدىڭ قانشاسى قازاق ازاماتتارىنىڭ ەنشىسىندە دەگەن سۇراققا جاۋاپ بەرمەكپىز.
نەگىزى سپورت - ۇلتقا، رۋعا بولىنبەيدى. سپورت - جالپى دوستىق پەن بەرەكە بىرلىكتىڭ سيمۆولى! ءبىز بۇل جەردە وسىعان دەيىنگى قازاقستان نامىسن ابىرويمەن قورعاعان سپورتشىلارىمىزدىڭ ءار قايسىسىن الالاۋدان اۋلاقپىز. ءبارىنىڭ دە ەڭبەگى ۇشان-تەڭىز. دەسەدە، وقىرماندارىمىز قانشا قازاق بالاسىنىڭ وليمپيادانى باعىندىرعانىن بىلە جۇرگەنى ارتىقتىق ەتپەس دەگەن ويمەن وسى تاقىرىپقا قىسقاشا توقتالدىق.
اتلانتا وليمپياداسى (1996)
ءوز الدىنا دەربەس ەل بولىپ تۇڭعىش قاتىسقان اتلانتا وليمپياداسىندا سپورتتىڭ بارلىق تۇرىنەن 4 قازاق ازاماتى جۇلدەگەرلەر قاتارىنان كورىنە ءبىلدى. وكىنىشكە قاراي بىردە- ءبىر قازاق بالاسى جەڭىس تۇعىرىنىڭ ەڭ بيىك ساتىسىنا شىعا المادى.
جەڭىس تۇعىرىنىڭ ەكىنشى ساتىسىنان تەك دارىندى بوكسشىمىز بولات ءجۇمادىلوۆتىڭ (51 كەلى) جەڭىسىنە تۋىمىزدى جەلبىرەتكەنى ەسىمىزدە. سونداي-اق، وسى وليمپيادادا تاعى ەكى بوكسشىمىز جەڭىس تۇعىرىنان كورىندى. ولار: بولات نيازىمبەتوۆ (بوكس، 63,5 كەلى) پەن ەرماحان يبرايىموۆ (71 كەلى).
ال ءتورتىنشى مەدالى ەركىن كۇرەستەن ماۋلەن مامىروۆ (52 كەلى) جەڭىپ الىپ، جەڭىس تۇعىرىنىڭ 3 ساتىسىنان قول بۇلعادى.
سيدنەي وليمپياداسى (2000)
سيدنەي وليمپياداسى ەلىمىز ءۇشىن دە، قازاق ازاماتتارى ءۇشىن دە ەڭ ءساتتى ويىنداردىڭ ءبىرى بولدى. وندا ءتورت قازاق بالاسى جۇلدەگە ىلىكتى. ونىڭ ەكەۋى التىن. ءبىر قىزىعى تورتەۋى دە جۇلدەنى سپورتتىڭ ءبىر تۇرىنەن جەڭىپ الدى.
التىندى العاش بولىپ جاپ-جاس قازاقتىڭ قاراتورى ۇلى بەكزات ساتتارحانوۆ (57 كەلى) ەنشىلەسە، ەكىنشى التىندى اتلانتادا قولا مەدال جەڭىپ العان ەرماحان باۋىرىمىز جەڭىپ الدى. ال بولات ءجۇمادىلوۆ پەن مۇحتارحان دىلدابەكوۆ (91+ كەلى) قانجىعالارىنا كۇمىس جۇلدەنى بايلاپ قايتتى. وسىلايشا مۇحتارحان تۇڭعىش جۇلدەگەر اتانسا، ءجۇمادىلوۆ وليمپيادا ويىندارىنىڭ ەكى مارتە كۇمىس جۇلدەگەرى دەگەن اتقا قول جەتكىزدى.
افينى وليمپياداسى (2004)
2004-جىلى افينى وليمپياداسىندا ەكى قازاق بالاسىنا جۇلدە بۇيىردى. ءبىرى التىن، ءبىرى قولا مەدال. بۇل ەكى مەدالدى دا بوكستان الدىق. التىندى باقتيار ارتايەۆ (69 كەلى) جەڭىپ السا، قولا مەدالدى سەرىك ەلەۋوۆ (60 كەلى) قانجىعاسىنا بايلادى.
بەيجىڭ وليمپياداسى (2008)
بەيجىڭ وليمپياداسى قازاق ۇلاندارى ءۇشىن ەڭ كوپ مەدال العان وليمپيادا ويىندارى بولدى. وندا التى بىردەي قازاق بالاسى جەڭىس تۇعىرىنان كورىنە ءبىلدى. ونىڭ بىرەۋى التىن الىپ، ءانۇرانىمىزدى شىرقاتتى.
التىن مەدال بوكسشىمىز باقىت سارسەكبايەۆقا (69 كەلى) بۇيىردى. دزيۋدو كۇرەسىنەن اسقات جىتكەيەۆ (100 كەلى) قانجىعاسىنا كۇمىس مەدال بايلادى. ال بوكسشى ەركەبۇلان شىناليەۆ (81 كەلى)، گرەك-ريم كۇرەسىنەن ەكى بالۋانىمىز نۇرباقىت تەڭىزبايەۆ پەن (60 كەلى) اسەت مامبەتوۆ (96 كەلى) جانە تاەكۆوندوشىمىز ارمان شىلمانوۆ (80 كەلى) جەڭىس تۇعىرىنىڭ ءۇشىنشى ساتىسىنان كورىندى.
لوندون وليمپياداسى (2012)
قازاقستان قورجىنىنا التىن جاۋعان لوندون وليپياداسىندا قازاقتىڭ ءۇش باتىرى مەدالدىڭ ءۇش تۇرىنەن جەڭىس تۇعىرىنا كوتەرىلدى.
جەڭىستىڭ ەڭ بيىك ساتىسىنان كورىنگەن ساڭلاعىمىز بوكسشى سەرىك ساپيەۆ (69 كەلى). ەكىنشى جۇلدەنى جەڭىس تۇعىرىنىڭ ەكىنشى ساتىسىنان كورىنگەن تاعى ءبىر بوكسشىمىز ادىلبەك نيازىمبەتوۆ ولجالادى. ال ءۇشىنشى قولا جۇلدەنى ەركىن كۇرەس شەبەرى اقجۇرەك تاڭاتاروۆ (66 كەلى) ەل قورجىنىنا سالدى.
مىنە، قازىرگى 5 وليمپيادا ويىندارىندا چەمپيون بولعان قازاق ساڭلاقتارى مەن جۇلدەگەرلەرى وسىلار. الدا ساناۋلى كۇننەن كەيىن، ريو وليمپياداسىنىڭ الاۋى تۇتانادى. وندا قانشا قازاق بالاسى جەڭىس تۇعىرىنا كوتەرىلەر ەكەن؟ ونى الداعى ۋاقىت كورسەتە جاتار. ال ءبىز جالپى وليمپياداعا باراتىن سپورتشىلارىمىزعا ساتتىلىك تىلەيمىز.
كۇنسۇتان وتارباي
