جايىقتا كەمەمەن قىدىرتاتىن تۋريستىك باعىت اشىلدى
ساياحاتتاۋشىلاردى تاسىمالداۋ ءۇشىن ورالدا ارنايى كەمە جاسالعان. وتىز ورىندىق سۋ كولىگى جەرگىلىكتى مەكەمەلەردىڭ ەنشىسىندە. ساياحاتشىلار ءۇشىن ارنايى جابدىقتالعان كەمە دەمالۋشىلارعا ىڭعايلى ەتىپ جاسالعان. سوڭعى 20 جىلدا مۇلدە توقتاپ قالعان تۋريستىك باعىت قايتا قولعا الىندى. - ءبىز دەمالۋشىلاردى كۇنىنە 1,5 ساعاتتان 4 رەت تاسىمالدايمىز. جايىق وزەنىنىڭ بويىمەن ونداعان شاقىرىم ءجۇرىپ وتەمىز. ءىستى جاڭا باستادىق، ازىرگە حالىق كوپ بىلە بەرمەيدى. بولاشاقتا تانىمال بولامىز دەگەن ۇمىتتەمىز، دەيدى تاسىمالداۋشى كومپانيا وكىلى ءجانيا بوراشيەۆا.
بۇل باعىت تۋريستەرگە قىزمەت كورسەتۋشى كومپانيا وكىلدەرىنىڭ كوڭىلىنەن شىقتى. بولاشاقتا ەكى جاق بىرىگىپ قىزمەت ەتپەك نيەتتە. الدىمەن جەرگىلىكتى وقۋ ورىندارىندا مۇنايلى مەكەننىڭ كورىكتى جەرلەرىن تانىستىرۋشى ارنايى ماماندار دايىندالماق.
- سۋدا جۇرەتىن باعىت بۇل قاشان دا كوپشىلىكتى وزىنە تارتادى. كەز كەلگەن قوناق نەمەسە شەتەلدىكتەر كەلگەن جەرىنىڭ تاريحىن بىلگىسى كەلىپ تۇراتىنى انىق. سوندىقتان ىشكى تۋريزمدى دامىتۋدا بۇل باعىتتىڭ بولاشاعى زور دەپ ەسەپتەيمىن، دەيدى كاسىپكەرلىك جانە يندۋستريالدى-يننوۆاتسيالىق دامۋ باسقارماسى باسشىسىنىڭ ورىنباسارى قارلىعاش بەكبايەۆا.
الداعى اپتادان باستاپ العاشقى گيد- ماماندار كوپشىلىككە قىزمەت كورسەتە باستايدى. «بۇل جاي عانا سۋ كولىگىمەن قىدىرۋ ەمەس، كەلۋشىلەردىڭ كوڭىلىن اۋلاپ، وزىنە باۋرايدى، - دەيدى ماماندار. تۋريستىك وپەراتورلار دا ەندى ءوز تىزىمدەرىنە وسى باعىتتى ەنگىزبەك.
