مىسىرداعى سۋداعى تاكسي قالا تۇرعىندارىنىڭ دا، تۋريستەردىڭ دە قىزىعۋشىلىعىن تۋعىزىپ وتىر
تالايعا تاڭسىق كورىنگەنىمەن، تابىس اكەلەتىن ءتيىمدى كاسىپ قازىر كوپشىلىكتىڭ قىزىعۋشىلىعىن تۋعىزۋدا، دەپ حابارلايدى 24.kz.
جىل باسىنان بەرى كايردە 10 سۋداعى تاكسي قولدانىسقا بەرىلگەن. قازىر جەرگىلىكتى تۇرعىندار كولىكتىڭ بۇل ءتۇرىن بەلسەندى تۇردە قولدانىپ ءجۇر. حالىق ونىڭ ارقاسىندا دىتتەگەن جەرىنە تەمىر تۇلپارمەن جۇرگەننەن گورى تەزىرەك جەتىپ، جولداعى كەپتەلىستەردى ەداۋىر جەڭىلدەتۋگە بولاتىنىن ايتادى. ونىڭ ۇستىنە كەمەلەر گازبەن قوزعالاتىندىقتان، قالانىڭ ەكولوگياسىنا دا كەرى اسەرى از بولادى ەكەن.
جەرگىلىكتى تۇرعىن احماد فارۋكتىڭ ايتۋىنشا ءنىل وزەنى ۇستىمەن جۇيتكيتىن سۋداعى تاكسي كەرەمەت يدەيا. «مەن ادەتتە جۇمىسقا جەتۋ ءۇشىن كولىكپەن 40 مينۋت ءجۇرىپ باراتىنمىن. ال مىنا كەمەمەن نەبارى 12 مينۋت قانا جۇمسايمىن. ونىڭ ۇستىنە جول- جونەكەي ادەمى پەيزاجدى تاماشالاپ بارامىز»، - دەيدى ول.
Nile Taxi كومپانياسىنىڭ يەسى ماگدي گالي الەم بويىنشا جولداعى كەپتەلىستەردىڭ %68 ى جەكەمەنشىك كولىكتەردىڭ كوپتىگىنەن تۋىندايتىندىعىن ايتادى. «سوندىقتان ءبىز تاسىمالدىڭ وزگە ءتۇرى جايلى تەرەڭ زەرتتەپ-زەردەلەي باستادىق. سول كەزدە ءنىل وزەنى كولىك پوتەنتسيالىنىڭ ۇلكەن ەكەنىنە كوز جەتكىزدىك». حالىقتى قىزىقتىرىپ وتىرعان تاعى ءبىر جايت - سۋداعى تاكسي قىزمەتىنىڭ اقىسى. جۇرتتىڭ سوزىنە قاراعاندا، ولاردىڭ باعاسى كادىمگى تاكسيدەن گورى الدەقايدا ارزان.
يمام مۇحاممەد، جەرگىلىكتى تۇرعىن: - ءنىل وزەنىندە تاڭسىق تاكسيدىڭ پايدا بولعانى قانداي جاقسى. ءبىز قالانىڭ ءبىر قاناتىنان ەكىنشى بولىگىنە جەتۋ ءۇشىن كەپتەلىپ، جولدا تۇرامىز. سايكەسىنشە، جول شىعىنى دا ارتا تۇسەدى. ال مىنا كەمەلەرمەن ەڭ الىس دەگەن جەردىڭ وزىنە ارى كەتسە 4 ا ق ش دوللارىن جۇمسايسىز. ال ول قاشىقتىقتى تەمىر تۇلپارمەن ەڭسەرەتىن بولساڭىز، ەكى ەسەگە ارتىق اقشا تولەۋىڭىزگە تۋرا كەلەدى. جالپى، بۇل جوبانىڭ ىسكە اسىرىلۋى التى جىلدان بەرى كەيىنگە ىسىرىلىپ كەلگەن. وعان مىسىرداعى ساياسي جانە ەكونوميكالىق داعدارىس قولبايلاۋ بولدى. ەندى باستاما اۆتورلارى بۇل قىزمەتتى تەك كايردە عانا ەمەس، ەلدىڭ وزگە دە قالالارىندا ىسكە قوسۋدى دىتتەپ وتىر.
