مۇحتار شاحانوۆ قىرعىزدىڭ جاس قىزدارىنا جانى اشىعان قازاق مينيسترىنە اراشا ءتۇستى
ونىڭ ايتۋىنشا، قىرعىزدار قازاق ءمينيسترىنىڭ ءسوزىن بۇرمالاپ اكەتكەن دەپ حابارلايدى Skifnews.kz باسىلىمى.
«مۇحتار اعا، ءسىز قىرعىز ەلىندە 10 جىل قاتارىنان قازاقستان رەسپۋبليكاسىنىڭ توتەنشە جانە وكىلەتتى ەلشىسى بولىپ قىزمەت اتقاردىڭىز. قىرعىزدىڭ ماناستان كەيىنگى بۇكىل الەم مويىنداعان داڭقتى پەرزەنتى شىڭعىس ايتماتوۆپەن بىرلەسىپ «قۇز باسىنداعى اڭشىنىڭ زارى» (عاسىر ايرىعىنداعى سىرلاسۋ) اتتى ەسسە، «سوكراتتى ەسكەرۋ ءتۇنى» اتتى دراما جازدىڭىزدار. بۇگىنگى تاڭدا بۇكىل قىرعىز ەلى سىزگە ۇلكەن قۇرمەتپەن، سەنىممەن قارايدى. جۋىردا قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلىنىڭ «ماسكەۋدە قىرعىز قىزدارى دارەتحانا جۋىپ ءجۇر» دەگەن سوزىنە كورشى ەلدىڭ باسشىلارىنان باستاپ حالقىنا دەيىن رەنىشىن ءبىلدىردى. قىرعىز اعايىنداردىڭ وكپەسى ورىندى ما؟»، - دەگەن ساۋال تاستايدى باسىلىم.
«قىرعىزدىڭ ءۇش باسىلىمى ماعان دا تەلەفون سوقتى. ولارعا مەن: «قازىرگى ماتەريالدىق بايلىق ءبىرىنشى ورىنعا شىققان كۇنكورىس زامانىندا ماسكەۋدە دە جانە باسقا قالالاردا دا، سان ءتۇرلى قيىن جاعدايدا جۇرگەن قىرعىزدىڭ دا، قازاقتىڭ دا، وزبەكتىڭ دە قىزدارى از ەمەس ەكەندىگىن ۇعىندىردىم. مينيستر ارىستانبەكتىڭ قىرعىز باۋىرلارىمىزدىڭ الەۋمەتتىك جاعدايىنا الاڭداۋشىلىق بىلدىرگەن ءبىر اۋىز ءسوزىن ءىلىپ اكەتىپ، گۋ-گۋلەتە تەرىس ءتۇسىندىرىپ جۇرگەندەرگە توسقاۋىل بولۋىمىز كەرەك. مەنىڭ مىناداي ولەڭىم بار:
«شىندىق كەيدە قالىڭ ارپا ىشىندەگى ءبىر بيداي،
نەگە ادىلدىك كۇرەسىندە جۇرتتىڭ كوبى «تىمپيباي؟»
رۋحسىزدىققا كىم شىن مىنەز كورسەتپەسە قىرعيداي،
وندايلاردىڭ بۇگىنگى اتى «ىربيكۇل» مەن «جىربيباي!»
سوندىقتان، مادەنيەت ءمينيسترىنىڭ بۇرمالانعان پىكىرىن كەيبىر «ىربيكۇلدەر» مەن «جىربيبايلاردىڭ» جەل سوزىنەن قورعاپ قالۋ ازاماتتىق مىندەتىمىز ەمەس پە؟»، - دەيدى شاحانوۆ.
ەستەرىڭىزگە سالايىق، ناۋرىز ايىندا حالىققا ەسەپ بەرگەن ارىستانبەك مۇحامەدي ۇلى رەسەيدە ەدەن جۋىپ جۇرگەن قىرعىزدىڭ جاس قىزدارىنا جانى اشيتىنىن ايتقان بولاتىن.
دەرەككوز: Nur.kz
