الماتىدا ءسابي ساتقان پەرزەنتحانا قىزمەتكەرلەرى سوت ۇكىمىن ەستىپ تالىپ قالدى
جاڭا تۋعان شاقالاقتاردى ساتىپ، ۇزاق ۋاقىت بويى قىرۋار قارجى تاۋىپ كەلگەن پەرزەنتحانا قىزمەتكەرلەرى ەندى كەمى 2 جىلىن تۇرمەدە وتكىزۋى ءتيىس.
ايىبىن سوڭىنا مويىنداماعاندارعا سۋديا بۇگىن ءتىپتى 9 جىل كەستى. بۇعان قوسا، بارلىعىنىڭ مۇلىكتەرى تاركىلەنەتىن بولدى، - دەپ حابارلايدى ك ت ك ارناسى.
ءسابي ساۋداسىمەن تانىلعان الماتى وبلىستىق اۋرۋحاناسى پەرزەنتحانا ءبولىمىنىڭ قىزمەتكەرلەرى مۇنداي قاتال ۇكىم كۇتپەسە كەرەك، سوت زالىندا شەتىنەن تالىپ قالدى.
بالالاردى ءتىرى تاۋارعا اينالدىرعاندارعا قاتىستى اتىشۋلى سوت 5 ايدان استام ۋاقىتقا سوزىلدى. سەبەبى، ايىپتالۋشىلار سانى 32 ادام. ولاردىڭ قاتارىندا پەرزەنتحانا قىزمەتكەرلەرى، تۋعان بالاسىن ساتۋعا كەلىسكەن 4 ايەل جانە ءسابيدى زاڭسىز جولمەن اقشاعا ساتىپ العاندار بار. كەشەگى ۇكىم الدىندا كوبى اشۋلى. ءتىپتى زالعا كىرگەن جۋرناليستەردى دە جاعادان الۋعا دەيىن باردى.
كەشە وسى شۋلى ىسكە اقىرى سوت سوڭعى نۇكتەسىن قويىپ، 32-ايىپتالۋشىعا ۇكىم كەستى.
«كىنالى دەپ تانىلىپ، وعان ق ر قىلمىستىق كودەكسىنىڭ 135 -بابىنىڭ 2 -تارماعىمەن مۇلكى تاركىلەنىپ، 9 جىل باس بوستاندىعىنان ايىرۋ جازاسى تاعايىندالسىن»، - دەيدى سۋديا.
سۋديا وسىلاي ءار دارىگەردىڭ جازاسىن جەكە-جەكە وقىپ بەردى. ياعني، ەندى الماتى وبلىستىق اۋرۋحاناسى پەرزەنتحانا ءبولىمىنىڭ قىزمەتكەرلەرى 2 جىلدان 9 جىلعا دەيىنگى ۋاقىتتارىن تۇرمەدە وتكىزبەك. 2 جىل مەرزىم كىنالارىن بىردەن مويىنداپ، سوت ءىسىنىڭ جۇرگىزىلۋىنە كومەكتەسكەندەرگە بەرىلدى.
ال سوڭىنا دەيىن قارسىلاسىپ مويىنداماعانداردىڭ جازاسى اۋىر. سونداي-اق ولاردىڭ مۇلىكتەرى تاركىلەنەدى. جانە سوت شىعىندارىن وتەۋلەرى ءتيىس. مۇنى ەستىگەن، بۇرىنعى اكۋشەرلەر شەتىنەن تالىپ جاتىر.
ءسابي ساۋداسىن قىزدىرعانداردىڭ بىلىعى بىلتىر اشكەرەلەنگەن. اق حالاتتىلار بۇل ارەكەتتەرىن 8 جىل بويى جۇزەگە اسىرىپ كەلگەن ەكەن. وسى ۋاقىت ىشىندە 15 شاقالاق ساتىلىپ كەتىپتى. ايىپتالۋشىلار بۇعان دەيىن قولحاتپەن جانە مۇلىكتەرىن كەپىلگە قويىپ بوستاندىقتا جۇرگەنىن دە ايتا كەتەيىك. بۇگىن ولاردىڭ بارلىعىنىڭ قولىنا سوت زالىندا كىسەن سالىپ تىكەلەي تۇرمەگە الىپ كەتتى.
