ريوعا باراتىن زىلتەمىرشىلەردەن دوپينگ انىقتالسا ۇلتتىق دەڭگەيدە قاتاڭ جازا قولدانىلادى
بۇل تۋرالى ۇلتتىق وليمپيادا كوميتەتىنىڭ باسپا ءسوز قىزمەتىنەن حابارلادى.
كوميتەت اقپاراتىنا قاراعاندا، بۇگىن ق ر ۇلتتىق وليمپيادا كوميتەتىنىڭ پرەزيدەنتى تيمۋر قۇلىبايەۆ پەن ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلى ريو-دە-جانەيرودا وتەتىن جازعى وليمپيادا ويىندارى قارساڭىندا ەل قۇراماسىمەن كەزدەسۋ وتكىزگەن.
«دوپينگپەن كۇرەس جانە قازاقستاندىق سپورتتىڭ يميدجىن قورعاۋ ماقساتىندا وليمپياداعا بارۋى ىقتيمال بارلىق اۋىر اتلەتتەردى دوپينگتىك تەستىلەۋدەن وتكىزۋ تۋرالى شەشىم قابىلداندى. سىنامالار دۇنيەجۇزىلىك دوپينگكە قارسى اگەنتتىك اككرەديتتەگەن شەتەلدىك زەرتحاناعا جىبەرىلەدى. سىناما ناتيجەلەرى ريو-دە-جانەيروعا سپورتشىلار ۇشىپ كەتكەنگە دەيىن بەلگىلى بولادى ءارى تەرىس ناتيجە انىقتالعان جاعدايدا كىنالى تۇلعالارعا ۇلتتىق دەڭگەيدە ەڭ قاتاڭ سانكسيا قولدانىلادى»، - دەلىنگەن حابارلامادا.
سونىمەن قاتار تاراتىلعان اقپاراتتا بەيجىڭ مەن لوندون وليمپياداسىنا قاتىسقان 4 اۋىر اتلەتىمىزدىڭ دوپينگ داۋىنا ۇرىنۋى جايتى دا تىڭعىلىقتى قارالعان. بۇل ورايدا ق ر ۇلتتىق وليمپيادا كوميتەتى مەن ق ر اۋىر اتلەتيكا فەدەراتسياسى تارابىنان اتالعان سپورتشىلارعا ولاردىڭ زاڭدى مۇددەلەرى مەن قۇقىقتارىن قورعاۋ ءۇشىن زاڭدىق قولداۋ كورسەتىلەتىن بولادى.
«دەگەنمەن، ق ر ۇلتتىق وليمپيادا كوميتەتى حالىقارالىق وليمپيادالىق كوميتەتتىڭ دوپينگكە قارسى ەرەجەسىنىڭ بۇزىلۋىن تەرگەۋ ماسەلەلەرىنە تولىقتاي قولداۋ بىلدىرەدى»، - دەلىنگەن اقپاراتتا.
اۆتور: مارلان جيەمباي
