س. بەردىقۇلوۆ اتىنداعى جۇلدەگە يە بولعان جۋرناليستەردىڭ ەسىمدەرى انىقتالدى - فوتو
ق ر مادەنيەت جانە سپورت مينيستىرلىگى جىل سايىن سپورت جۋرناليستەرى اراسىندا ۇزدىكتەردى انىقتاپ، جۋرناليست، جازۋشى، قوعام قايراتكەرى، قازاقستان سپورت جۋرناليستيكاسىنىڭ جارقىن وكىلى سەيداحمەت بەردىقۇلوۆ اتىنداعى جۇلدەنى تابىستاپ كەلەدى.
بۇگىن استانادا حالىقارالىق سپورت جۋرناليستەرى كۇنى قارساڭىندا «جىل جۋرناليسى-2015» سىيلىعىن تابىس ەتۋ ءراسىمى ءوتتى. سالتاناتتى شاراعا مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەلسيار قاناعاتوۆ، ق ر پارلامەنتى ءماجىلىسىنىڭ دەپۋتاتى ساۋىتبەك ابدراحمانوۆ جانە سپورت سالاسىنداعى قوعامدىق بىرلەستىكتەر مەن ۇيىمداردىڭ وكىلدەرى قاتىسىپ، ۇزدىكتەرگە سىيلىقتاردى تابىس ەتتى.
ۇزدىك جاريالانىم ءۇشىن نوميناتسياسى بويىنشا قازاقپارات اگەنتتىگىنىڭ باتىس قازاقستان وبلىسىنداعى ءتىلشىسى عايساعالي سەيتاق ماراپاتتالسا، ۇزدىك تەلەۆيزيالىق رەپورتاج نوميناتسياسى بويىنشا «حابار» تەلەارناسىنىڭ سپورت جۋرناليسى قانات بازىلحان ماراپاتتالدى. ال ۇزدىك فوتوجۇمىس نوميناتسياسى بويىنشا فوتو ءتىلشى الەكسەي فيليپپوۆ ماراپاتتالدى.
اۆتور: كۇنسۇلتان وتارباي
