ريو وليمپياداسىنىڭ ءۇمىتى: قىتايلىق زوۋ شيمين جوق، بيىل ءبىرجاننىڭ جولى اشىق

ارينە، ءبىرىنشى، كەزەكتە قازاق بوكسشىلارىنىڭ جولىنا ۇمىتپەن قارايتىنىمىز ايتپاساق تا تۇسىنىكتى. سەبەبى، قازاق بوكسى الەمدىك ارەنادا جوعارى بەدەلگە يە. قايسار مىنەزدى قازاقتىڭ جىگىتتەرى اۋەسقوي بوكس تا دا، كاسىپقوي بوكستا دا وزدەرىنىڭ شەبەرلىگى جوعارى، شوقتىعى بيىك ەكەنىن مويىنداتىپ كەلەدى. جاستاردىڭ دا بۇل سپورت تۇرىنە قىزىعۋشىلىعى جوعارى دەپ نىق سەنىممەن ايتا الامىز.

بۇگىندە شارشى الاڭدا نامىستى قولدان بەرمەيتىن قازاق جىگىتتەرىنىڭ قايسار مىنەزىنە تالايلار تاڭداي قاعىپ، قىزىعا دا، قىزعانا دا قارايدى. بيل ريو تورىندە ۇلت نامىسىن ۇران ەتكەن بوكسشىلارىمىز الەمگە قازاق جۇدىرىعىنىڭ قانداي بولاتىنىن تاعى ءبىر مارتە دالەلدەيدى دەگەن ۇمىتتەمىز. سوندىقتان بۇگىننەن باستاپ، وليمپيادا ويىندارىنا جولداما العان سپورتشىلارىمىزدى وقىرماندارىمىزعا تانىستىرۋدى الدىمەن بوكسشىلارىمىزدان باستاۋدى ءجون ساناپ وتىرمىز.

وسى ورايدا ايتا كەتەتىن تاعى ءبىر جاڭالىعىمىز - كۇرزى جۇدىرىقتى جىگىتتەرىمىز بيىل وليمپيادا ويىندارىنا تۇڭعىش رەت تولىق قۇراممەن بارا جاتىر. بۇعان دەيىن ءتورتجىلدىقتىڭ باستى سىنىنا 91 كەلى سالماق دارەجەسىنەن ەشبىر بوكسشىمىزعا جولداما بۇيىرماي كەلگەن-ءدى.

ءبىرجان جاقىپوۆ

تۋعان كۇنى: 07.07.1984

تۋعان جەرى: وڭتۇستىك قازاقستان وبلىسى، سوزاق اۋدانى، جارتى-توبە اۋىلى

جەتىستىكتەرى: الەم چەمپيوناتىنىڭ قولا جۇلدەگەرى (2005 ج.)، الەم كۋبوگىنىڭ قولا جۇلدەگەرى (2008 ج.)، ازيا ويىندارىنىڭ كۇمىس جۇلدەگەرى (2010 ج.)، وليمپيادالىق كۆاليفيكاتسيالىق قۇرلىقارالىق تۋرنيردىڭ جەڭىمپازى (2012)، الەم چەمپيونى (2013 ج. الماتى)

بويى: 168 سانتيمەتر

سالماعى: 49 كەلى

بوكسپەن اينالىسۋى: 14 جاستان

ايماق: وڭتۇستىك قازاقستان وبلىسى

ءبىرجان بيىل وسىمەن وليمپيادا ويىندارىنا ءۇشىنشى مارتە قاتىسپاق. ريو وليمپياداسىنىڭ جولداماسىن ا ي ب ا- نىڭ АРВ دەپ اتالاتىن جاڭا جۇيەسىندە سىنعا ءتۇسىپ، جەڭىپ الدى. АРВ رەيتينگىندە ءوز سالماعىندا 1-ورىندا تۇر.

العاش رەت ول 2008-جىلى بەيجىڭ وليمپياداسىندا ونەر كورسەتىپ، شيرەك فينالعا كەلگەندە سۇرىنگەن بولاتىن. ەكىنشى رەت لوندون وليمپاداسىندا دا تۋرا سول جاعداي قايتالاندى. ەكىنشى وليمپياداسىندا 1/8 فينالعا دەيىن القىنباي جەتتى. وكىنىشكە قاراي شيرەك فينالدا جولى تاعى جابىلدى.

ەكى وليمپيادادا دا ءبىرجاننىڭ جولىن قىتايلىق زوۋ شيمين كەستى

قىتايلىق زوۋ شيمين - ءبىرجان جاقىپوۆتىڭ وليمپيادا ويىندارىنداعى عانا ەمەس، سارى قۇرلىقتاعى باسقا دا حالىقارالىق باسەكەلەردەگى باستى قارسىلاسى.

زوۋ شيمين ءتورت ءىرى جارىستا قازاق بوكسشىنىڭ جولىن كەستى. 2007-جىلى چيكاگودا وتكەن الەم چەمپيوناتىندا ەكى بوكسشىنىڭ اراسىنداعى كەزدەسۋ 13:30 ەسەبىمەن اياقتالسا، بەيجىڭدە ءبىرجان قارسىلاسىنان 4:9 ەسەبىمەن ۇتىلدى. ال 2010-جىلى گۋانجوۋدا وتكەن ازيا ويىندارىنىڭ فينالىنداعى كەزدەسۋدە تاعى دا شيمين باسىم تۇسكەن ەدى. ال لوندوندا جەرلەسىمىز وسى كەتكەن ەسەلەرىن قايتارادى دەپ ۇمىتتەندىك. وكىنىشكە قاراي، 2012-جىلعى وليمپيادادا دا قىتايلىق بوكسشىنىڭ ايدارىنان جەل ەستى.

ەندى وليمپيادادا جولىن بوگەيتىن قىتايلىق بوكسشى جوق. ول لوندوندا ەكىنشى مارتە وليميپادا چەمپيونى اتاندى دا كاسىپقوي بوكسقا بەت بۇردى. بيىل ءبىرجان بارىن سالىپ، جۇلدەگە تالاسادى دەگەن ۇمىتتەمىز. سەبەبى، بۇل وليمپيادا ويىندارى - ءبىرجان ءۇشىن سوڭعى مۇمكىندىك. وسى جولى ول كەم دەگەندە جۇلدەگەرلەر قاتارىنا ەنۋگە ءتيىس.

ريودا ءبىرجاننىڭ باستى قارسىلاستارى دەپ مىنا بوكسشىلاردى اتاۋعا بولادى. ولار: كۋبالىق حوانيس ارگيلوگاس، رەسەيلىك ۆاسيلي ەگوروۆ، ۋكراينالىق دميتري زاموتايەۆ، وزبەكستاندىق حاسانباي دوسماتوۆ.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى