استانادا قازاق، ورىس، اعىلشىن، قىتاي تىىلىندە مۋنيتسيپالدى اۋديوجۇيەمەن جابدىقتالعان ەكسكۋرسيالىق اۆتوبۋستار جۇرەدى
قازىرگى كەزدە ەسىل وزەنىنىڭ سول جاعالاۋىندا ۇزىندىعى 20 شاقىرىمنان ارتىق ارنايى تۇيىق مارشرۋت ازىرلەندى.
2014-جىلى ەلوردادا جەكە مەنشىكتى كومپانيا وسى سياقتى اۆتوبۋستاردى پايدالانعان بولاتىن. بۇگىندە جوبانى «استانا كونۆەنشن بيۋرو» ج ش س جەكە مەنشىكتى ينۆەستور «Sightseeing tours» ج ش س ەسەبىنەن جۇزەگە اسىرۋدا، دەپ حابارلايدى ەلوردا اكىمدىگىنىڭ رەسمي سايتى.
ەكسكۋرسيالىق اۆتوبۋس ەلوردانىڭ كوپتەگەن كورىكتى جەرلەرىنىڭ جانىنان وتەدى، جانە قوزعالىس بارىسىندا مىنا ايالدامالارعا توقتايدى:
- «دۋمان» ويىن ساۋىق ورتالىعى،
- «حان شاتىر» ساۋدا ويىن ساۋىق ورتالىعى،
- «قازاق ەلى» مونۋمەنتى جانىنداعى الاڭ،
- «استانا بايتەرەك» مونۋمەنتى.
سونىمەن قاتار، ەسىل وزەنىنىڭ وڭ جاعالاۋىن دا قامتىپ، مارشرۋتتى ۇزارتۋ كوزدەلگەن، وندا كەلەسى ايالدامالار بولادى:
- استانا پارك - تۇران داڭعىلىنداعى ورتالىق كىرەبەرىس؛
- ەسىل وزەنىنىڭ جاعالاۋى، جاياۋ جۇرگىنشىلەر كوپىرىنىڭ جانىندا؛
- اباي داڭعىلى، ورتالىق الاڭ؛
- رەسپۋبليكا داڭعىلى يمانوۆ كوشەسىنىڭ بۇرىشى؛
- ق ر قارۋلى كۇشتەرىنىڭ اسكەري-تاريحي مۋزەيى.
ەسىل وزەنىندەگى مارشرۋتتىڭ ۇزىندىعى - 80-100 مينۋت، اۆتوبۋستاردىڭ ينتەرۆالى 30-40 مينۋت، جۇمىس ۋاقىتى - ساعات 10:00-20:00. بيلەتتەردى الدىن الا ءوتىنىم بەرۋ ارقىلى جانە اۆتوبۋستىڭ ىشىندە ساتىپ الۋعا بولادى. ەگەر ەكسكۋرسياعا قاتىسقىڭىز كەلسە مىنا تەلەفون بويىنشا حابارلاسۋعا بولادى: 87772222838.
بيلەتتىڭ قۇنى ساناتقا (بالالار، ەرەسەكتەر، زەينەتكەرلەر، ستۋدەنتتەر، ەرەكشە قاجەتتىلىكتەرى بار تۇلعالار) بايلانىستى ءارتۇرلى بولادى.
مۇنىمەن قوسا، «Hop-on/Hop-off» بيلەت جۇيەسى قاراستىرىلعان، ياعني، جولاۋشى كەز كەلگەن ساتتە اۆتوبۋستان ءتۇسىپ، مۋزەي نەمەسە كورىكتى جەرلەردى ارالايدى، سودان كەيىن كەز كەلگەن ارنايى ايالداما كەشەنىنەن ەكسكۋرسيالىق اۆتوبۋسقا قايتا وتىرا الادى.
