بالقاشتا لاڭكەستىك جاساماقشى بولعان بەس كۇدىكتى تۇتقىندالدى

بۇل تۋرالى وبلىستىق سوتتىڭ باسپا ءسوز قىزمەتى حابارلادى.

«29- ماۋسىمدا بالقاش قالالىق سوتى ق ر ق ك 257-بابى 1-ءبولىمى، 287-بابى 5-بولىگى بويىنشا قىلمىس جاساعان ۋ. د. د.، ۋ. ك. د.، ۋ. ە. د.، ا. ب. د. جانە ك. ن. م. سىندى كۇدىكتى تۇلعالارعا قاتىستى ەكى ايعا قاماۋعا الۋ تۇرىندە بۇلتارتپاۋ شاراسىن سانكتسيالاۋ تۋرالى 5 ماتەريالدى قارادى»، - دەلىنگەن حابارلامادا.

سوت سانكتسياسىمەن بەس كۇدىكتى ەكى ايعا قاماۋعا الىندى. وبلىستىق سوتتىڭ اقپاراتىنا سايكەس ولار 26-37 جاس ارالىعىنداعى قاراعاندى وبلىسىنىڭ تۋمالارى، بۇرىن سوتتالعاندار.

«2016-جىلعى ساۋىردە ءداستۇرلى ەمەس اعىمداعى ءدىندى ۇستاناتىن بالقاش تۇرعىنى ۋ. ك. ب. قالادا لاڭكەستىك توپ قۇرادى، ولار بالقاش قالاسى مەن گۇلشات كەنتىنىڭ تۇرعىندارى. ولاردىڭ ماقساتى قولدان جارىلعىش زات جاساپ، قازاقستاندا تەررورلىق اكتى جاساۋ، ەلدە قىزمەتىنە تىيىم سالىنعان «دايش» حالىقارالىق لاڭكەستىك توبىنا جاردەمدەسۋ»، - دەپ ءتۇسىندىردى وبلىستىق سوت باسپا ءسوز قىزمەتىندە.

تەرگەۋ نۇسقاسى بويىنشا توپتى 36 جاستاعى بالقاش تۇرعىنى باسقارعان. «بۇل رەتتە ءار قاتىسۋشىعا ءرول بەرىلگەن، جارىلعىش زات ىزدەۋ، ونى قولدان دايىنداۋ، اۆتوكولىك پەن اقشانى قىلمىستىق قاجەتتىلىككە پايدالانۋ، لاڭكەستىك جاساۋ ورنىن ىزدەۋ»، - دەلىنگەن حابارلامادا.

لاڭكەستىك توپ مۇشەلەرى جارىلعىش زاتتى زاڭسىز يەلەنىپ، گۇلشات اۋىلىندا ساقتاعان. وق-ءدارىنى قايدان العانى ازىرگە بەلگىسىز. ونى تەرگەۋ انىقتايدى.

«26- ماۋسىمدا ساعات 21:10 دا گۇلشات كەنتىندە توپ قاتىسۋشىلارىنىڭ ءبىرى جارىلعىش زاتپەن ءوز-ءوزىن جارىپ جىبەردى»، - دەپ قوستى سوت باسپا ءسوز قىزمەتى.

بۇرىن حابارلانعانداي، بالقاش قالاسى مەن گۇلشات كەنتىندە جارىلىس جاساماقشى بولعان راديكالدىق توپ قىزمەتىنىڭ جولى كەسىلدى.

ۇستاۋ كەزىندە ءبىر لاڭكەس ءوزىن-ءوزى جارىپ جىبەردى. باسقا قۇرباندار مەن زارداپ شەككەندەر جوق.

قالعان توپ مۇشەلەرى ۇستالدى. زاتتاي ايعاقتار، قارۋ تاركىلەندى. سوت الدى تەرگەۋ جۇرگىزىلۋدە.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى