قازاقستاندىق بالالار كامەلەتتىك جاسقا تولماي جاتىپ ميلليونەر اتانۋى مۇمكىن

بۇل تۋرالى بۇگىن «اتامەكەن» ۇ ك پ الەۋمەتتىك سالا جانە الەۋمەتتىك سەرىكتەستىك كوميتەتىنىڭ ءتوراعاسى تالعات دوسكەنوۆ ءمالىم ەتتى.

ونىڭ اتاپ وتكەنىندەي، بۇل باعدارلامانى «نازاربايەۆ زياتكەرلىك مەكتەبى، «اتامەكەن» ۇلتتىق كاسىپكەرلەر پالاتاسىمەن، التىنسارين اتىنداعى ۇلتتىق ءبىلىم بەرۋ اكادەمياسىمەن جانە Almaty Management University ماماندارىمەن بىرلەسىپ جاساقتاۋدا. اتالعان باعدارلاما بويىنشا ءاربىر 11 سىنىپ وقۋشىسى مەكتەپ بىتىرگەندە ءوزىنىڭ جەكە بيزنەس جوبالارىن ۇسىنۋلارى ءتيىس.

مەكتەپ باعدارلاماسىنا وسىنداي ءپاننىڭ ەنگىزىلۋى قازاقستاندىقتاردىڭ بيزنەسكە دەگەن ماشىعىن مەكتەپ تابالدىرىعىنان باستاپ يگەرۋگە مۇمكىندىك بەرەدى، دەپ ەسەپتەيدى باستاماشىلار. بۇل ساۋال سوڭعى ەكى جىل بويى ۇلتتىق كاسىپكەرلەر پالاتاسىندا بەلسەندى تالقىلانىپ كەلگەن.

«ءبىز سىزدەرمەن بىرگە ءبىزدىڭ ەلدىڭ كاسىپكەرلىك سالاسىنىڭ بولاشاق دامۋىن جوبالاۋدامىز. وقۋشىلار ءوزىنىڭ بولاشاق ءومىرىن كاسىپكەرلىك بىلىمدەرى ارقىلى قۇراتىن بولسا، كامەلەتتىك جاسقا تولماي جاتىپ، ميلليونەر اتانىپ جاتسا، قانەكي، سەبەبى ءبىلىم، قۇزىرلىلىق، ماشىق، كاسىپكەرلىك شيراقتىق پەن رۋح ءومىردىڭ جوعارى ستاندارتتارىنا جاۋاپ بەرەدى. سوندىقتان مەكتەپ باعدارلاماسىنا كاسىپكەرلىك نەگىزدەرىن ەنگىزۋ، ءبىزدىڭ ويىمىزشا، نارىقتىق ەكونوميكا، مەكتەپ جاسىنان باستاپ، كاسىپكەرلىكتى جۇرگىزۋدى مەڭگەرگەن جاڭا جاس بۋىن وكىلدەرىن تاربيەلەپ شىعۋعا جول اشادى»، - دەپ اتاپ ءوتتى تالعات دوسكەنوۆ.

اتالعان ءپاندى 2019-جىلى بارلىق مەكتەپتەردە 10-11- سىنىپ باعدارلامالارىنا ەنگىزۋ جوسپارلانعان. جاڭا ءپان نەگىزىنەن پراكتيكالىق ماشىقتاۋعا ءمان بەرەتىن بولادى. جىل بويى وقۋشىلار وزدەرىنىڭ بيزنەس-يدەيالارىن جاساقتاپ، كەيىن ونى قورعايتىن بولادى. سونىمەن قاتار وقىتۋ بارىسىندا وقۋشىلار قارجىلىق ساۋاتقا، بانكتەردىڭ نەسيە-اقشا ساياساتىنىڭ نەگىزدەرىنە قانىق بولادى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى