ىلەسپە اۋدارما نەگە ىلگەرىلەمەي تۇر؟
وسىدان ءتورت جىل بۇرىن، V استانا ەكونوميكالىق فورۋمىنا كەلگەن تۇركيانىڭ سول كەزدەگى پرەمەر-ءمينيسترى رەدجەپ ەردوعان ءوز انا تىلىندە سويلەپ، اۋدارماشىسى ونى ادەتتەگىدەي قازاق تىلىنە اۋداردى. سول كەزدە زالدا قازاق تىلىنەن ىلەسپە اۋدارما جاسايتىن ماماننىڭ جوقتىعىنان، بىرنەشە مينۋت بويى ونىڭ ءسوزىن قاتىسۋشىلاردىڭ باسىم كوپشىلىگى تۇسىنگەن جوق. ويتكەنى، مۇندايدا قازاق تىلىندە سويلەنگەن ءسوز اۋەلى ورىس تىلىنە، ودان ساتىلاپ باسقا تىلدەرگە ىلەسپە اۋدارما جاسالادى. ۇيىمداستىرۋشىلار زىر جۇگىرىپ ىزدەپ، زاتى قازاق بىرەۋدى ميكروفونعا وتىرعىزعانىمەن، قازاقشا «تۇرمىستىق دەڭگەيدە» عانا بىلەتىن ادام ساياسي ءسوزدى قايدان اۋدارسىن! حالىقارالىق دەڭگەيدە وتكىزىلەتىن ۇلكەن فورۋم وسىلايشا ۇلكەن «ۇيات» جاعدايمەن ەستە قالدى.
قاتىسۋشىلار جيىندا ىلەسپە اۋدارما جوق ەكەنىن تۇسىنە قويدى، ءسويتىپ ول قازاقشا سويلەنبەگەن فورۋم بولعاندىعىمەن دە ەرەكشەلەندى. وسى ساباق بولدى ما، ودان كەيىنگى جىلداردا جاعداي تۇزەلە باستاعان سياقتى. اسىرەسە، بىلتىرعى، 2015 -جىلعى فورۋم، قازاق ءتىلى بارىنشا مول پايدالانىلعان (ءو. شۇكەيەۆ جۇرگىزگەن زالدا)، تۇتاس پانەلدىك سەسسيالار (كاسىپكەرلىكتى دامىتۋ ماسەلەلەرى بويىنشا، قىمىز شارۋاشىلىعى بويىنشا) قازاق تىلىندە وتكەن جيىن بولدى. بۇل فورۋم قازاق ءتىلىنىڭ مەملەكەتتىك ءتىل رەتىندە قولدانىلۋ اياسىن كەڭەيتۋ ءۇشىن ىلەسپە اۋدارمانىڭ مۇمكىندىكتەرىن پايدالانا الماي جۇرگەنىمىزدى كورسەتتى.
قازاقشا- ورىسشا ىلەسپە اۋدارمانىڭ ماقساتى - قازاق ءتىلىنىڭ تەك قازاقي ورتانىڭ، توي- تومالاقتىڭ ءتىلى عانا ەمەس، بار وڭىردەگى مەملەكەتتىك ءمانى بار ماسەلەلەر قارالاتىن ءىرى جيىنداردىڭ، عىلىمي كونفەرەنسيالاردىڭ، كوپ تاراپتى كەزدەسۋلەردىڭ جۇمىس ءتىلى بولۋ دەڭگەيىنە جەتكىزۋ ءۇشىن قىزمەت ەتۋ. جوعارىدا ايتىلعان مىسالداردان كورىپ وتىرعانىمىزداي، جيىنداردا ىلەسپە اۋدارمانىڭ بولماۋى ءتىلىمىزدىڭ جالپى قولدانىلۋىن ازايتادى. بۇل - مەنىڭ جيىرما جىلدان استام ۋاقىت قىزمەت ەتە ءجۇرىپ، كوزىم جەتكەن جاي.
مەن - ىلەسپە اۋدارماشىمىن. بۇل ماماندىقتىڭ قانشالىقتى كۇردەلى، ونى مەڭگەرۋدىڭ قانشالىقتى قيىن ەكەندىگىن اۋدارما سالاسىندا تەر توگىپ جۇرگەن ازاماتتار جاقسى بىلەدى. ال قازاق تىلىنەن ورىس تىلىنە ىلەسپە اۋدارما جاساۋدىڭ قيىندىعىن مىنا مىسالدان-اق كورۋگە بولادى: قازىر قازاقستاندا رەسپۋبليكالىق دەڭگەيدە كونفەرەنسيالاردا قازاقشادان ورىسشاعا جانە كەرىسىنشە (قوس ءتىلدى) ىلەسپە اۋدارما جاساۋعا قابىلەتتى ماماننىڭ سانى 20 دان اسپايدى. بۇل سيفر مەنى ءبىر جاعىنان قىنجىلتادى، ەكىنشى جاعىنان... قۋانتادى.
قىنجىلتاتىنى - بۇل كورسەتكىشتىڭ قازاقستان سياقتى ەل ءۇشىن تىم از ەكەندىگى. ويتكەنى قازاق ىلەسپە اۋدارماسىنىڭ ميسسياسى قازاق ءتىلىنىڭ مەملەكەتتىك ءتىل رەتىندەگى مارتەبەسىن نىعايتۋ، ونىڭ بيىك دەڭگەيلى حالىقارالىق ءىس-شارالاردىڭ جۇمىس ءتىلى بولۋى ءۇشىن قىزمەت ەتۋ. بۇل ءۇشىن 20 ىلەسپە اۋدارماشى ەمەس، ودان ون ەسە كوپ مىقتى مامان كەرەك.
قۋانتاتىنى - قازىرگى كەزدە كەز كەلگەن دەڭگەيدەگى جيىنداردا بەلسەندى تۇردە ىلەسپە اۋدارما جاساپ جۇرگەن وسى توپتاعى مامانداردى تۇگەلدەي دەرلىك ءوزىمنىڭ تاربيەلەپ وسىرگەنىم. ىلەسپە اۋدارمانى مەڭگەرگەننەن كەيىن ونىڭ جاي عانا جينالىستا جاسالاتىن باياندامالاردى، سويلەۋشىلەردىڭ ءسوزىن اۋدارۋ ەمەس، ءتىلىمىزدى دامىتۋ ءۇشىن قۋاتتى قۇرال ەكەنىن تۇسىنگەنىمنەن وسى سالانى دامىتۋ قاجەتتىگىن ۇققانىمنىڭ ناتيجەسى بۇل. قازاقشا- ورىسشا ىلەسپە اۋدارمانى دامىتۋ - بۇل باستاپقى ساتى عانا، تۇپكى ماقسات - قازاق تىلىنەن تىكەلەي شەت تىلدەرىنە اۋدارما جاسايتىن مامانداردى دايىنداۋ كەرەك دەگەن مەجە قويىپ ەدىك جول باسىندا.
ءوزىم ءسابي شاعىمنان انا ءتىلدىڭ ءنارىن ەمىپ، قازىرگى فيلولوگ ستۋدەنتتەر، وكىنىشكە قاراي، جازىپ قالدىرعان كىتاپتارىنان عانا تانيتىن ءى. كەڭەسبايەۆ، ك. احانوۆ، ت. نۇرتازين، ا. داۋلەتوۆا، م. سەرعاليەۆ، ت. كاكىشەۆ، ز. قابدولوۆ، م. تومانوۆ، ر. نۇرعاليەۆ، تاعى باسقا عۇلاما عالىمداردىڭ الدىن كورگەندىكتەن، ومىردە تاڭداعان جولىم ءتىلىمىزدىڭ قولدانىلۋ ءورىسىن كەڭەيتۋمەن - ىلەسپە اۋدارما جاساۋمەن بايلانىستى بولعانى مەن ءۇشىن زاڭدىلىقتاي. رەسمي جينالىستاردا ىلەسپە اۋدارما جاساۋدى بىرگە باستاعان اعا تولقىن وكىلدەرى - ك. يۋسۋپوۆ، ە. سافۋاني، ب. شولان، د. مىڭباي، د. وماش ۇلى، ا. ىسىم ۇلى سياقتى ارىپتەستەرىمدى اتاي وتىرىپ، ءجۇسىپ بالاساعۇننىڭ جوعارىدا كەلتىرىلگەن «ءتىل - سەنىڭ ەسىگىڭدى كۇزەتكەن ارىستانىڭ، قاراساڭ - سەنى باعادى، قاراماساڭ - وزىڭە شابادى» دەگەن ءسوزىنىڭ اقيقاتىنا وسى ازاماتتاردىڭ ءومىرى مىسال دەگىم كەلەدى.
ءارقايسىسى ءوز دەڭگەيىندە تىلگە قىزمەت ەتكەن، ءتىل ءۇشىن شىرىلداپ، ءسوز سويلەپ، ماقالا جازىپ جۇرگەن ولاردىڭ ءبىرى - وسى سالاداعى بەلگىلى عالىم، ءبىرى بەلدى قىزمەتكەر، ءبىرى مىقتى اۋدارماشى رەتىندە ەلگە تانىلعان ازاماتتار.
دەگەنمەن، ىلەسپە اۋدارمانى دامىتۋ، شاكىرت تاربيەلەۋ، اۋدارما ارەناسىنان ءوزىمىز كەتكەندە ورنىمىزدى باسار ءىزباسارلارعا ماماندىقتىڭ قىر- سىرىن ۇيرەتۋ ىسىمەن پراكتيكالىق تۇرعىدا جالعىز اينالىسۋعا تۋرا كەلدى. ال «جالعىزدىڭ ءۇنى شىقپاسى» بەلگىلى عوي. كوپ بولىپ قولعا الساق، بىرەر جىلدا ەڭسەرىپ تاستايتىن شارۋانى قارعا ادىممەن جىلجىپ بىرنەشە جىل اينالدىرۋعا تۋرا كەلەدى. ءوز باستاماسىمەن جۇمىس ىستەگەن ءبىر ادام - قازاقستان رەسپۋبليكاسى پارلامەنتىنىڭ قوس پالاتاسى، قازاقستان ۇكىمەتى، ۇلتتىق بانك سياقتى مەملەكەتتىك ورگانداردىڭ، الەمدىك جانە ءداستۇرلى ءدىن ليدەرلەرىنىڭ سەزى، استانا ەكونوميكالىق فورۋمى، مەتاللۋرگتەر كونگرەسى سياقتى بيىك دەڭگەيلى جيىنداردى كاسىبي تۇردە ىلەسپە اۋدارمامەن قامتاماسىز ەتەتىن ماماندار دايىنداپ شىعارسا، كوپ بولىپ قولعا الساق - قانداي جەتىستىكتەرگە جەتەر ەدىك دەپ ويلايمىن.
ءتىلىمىزدى دامىتۋ ماسەلەسىنە بايلانىستى قانداي دا ءبىر ۇتىمدى امال بولسا، ايتتىق. تىلگە قاتىستى وزەكتى ماسەلەلەر كوتەرىلگەن تالاي ماقالا جازىلدى. ىلەسپە اۋدارما جاساۋدا جيناقتاعان تاجىريبەم نەگىزىندە ديسسەرتاتسيا قورعاپ، ادىستەمەلىك جاساپ، شاكىرتتەر تاربيەلەدىم. رەتى كەلگەندە، ىلەسپە اۋدارما تەوريا جۇزىندە ەمەس، ءىس جۇزىندە، اۋدارما جاساي ءجۇرىپ مەڭگەرىلەتىن ماماندىق ەكەندىگىن ايتا كەتكىم كەلەدى.
سوندىقتان، اۋدارماشى ميكروفونىنىڭ ماڭىنان ءجۇرىپ كورمەگەن كەيبىر ادامداردىڭ ىلەسپە اۋدارما جاساۋدىڭ قىر-سىرى تۋرالى كىتاپتار جازاتىنى («جيەندىك جاساپ»، رەسەيلىك ەڭبەكتەردەن اۋداراتىن بولسا كەرەك) - عىلىمداعى ادال ەڭبەك ناتيجەسى، تازالىق ۇعىمدارىنا كولەڭكە تۇسىرەدى دەر ەدىم. ەكىنشىدەن، سول ەڭبەك اۆتورلارىنان ۇيرەندىم دەپ ىلەسپە اۋدارما جاساپ جۇرگەن بىردە- ءبىر اۋدارماشىنى ءالى كۇنگە كەزىكتىرمەگەنىمىز دە كوپ جايدان حابار بەرمەي مە؟
تاعى ءبىر كولەڭكە تۇسىرەتىن جاي - ءتىل ءورىسىن كەڭەيتۋگە تيگىزەر پايداسىن كورە تۇرا، ءتىل دامىتۋ ماسەلەسىمەن مەملەكەتتىك دەڭگەيدە اينالىساتىن ازاماتتاردىڭ تاراپىنان ىلەسپە اۋدارمانى دامىتۋعا دەگەن قۇلشىنىستىڭ كەمشىندىگى. تىلدەردى دامىتۋ مەن قولدانۋدىڭ 2011-2020 -جىلدارعا ارنالعان مەملەكەتتىك باعدارلاماسىنىڭ ازىرلەنگەن باستاپقى رەداكسياسىندا ىلەسپە اۋدارماشىلاردى دايىنداۋ تۋرالى تارماقشا بولاتىن. بەكىتىلگەن نۇسقادا ىلەسپە اۋدارماشىلاردى دايىنداۋ تۋرالى تارماقشانىڭ ءتۇسىپ قالۋى دا، وتكەن شاقىرىلىم دەپۋتاتتارى پرەمەر-ءمينيستردىڭ اتىنا بىرنەشە قايتارا دەپۋتاتتىق ساۋال جاساسا دا، ىلەسپە اۋدارمانى ىلگەرىلەتۋ ىسىندە وڭ وزگەرىس بولماۋى، ءار جىلدارى پرەمەر-مينيستر ورىنباسارلارىنىڭ وسى ماسەلەگە قاتىستى بەرگەن تاپسىرمالارىنىڭ اياعى دا قۇردىمعا كەتكەنى... وسىنداي ويلارعا جەتەلەيدى.
2011-2020 -جىلدارعا ارنالعان مەملەكەتتىك باعدارلامادان تارماقشانى الىپ تاستاۋعا باعدارلامانى ىسكە اسىرۋعا قاجەتتى شىعىنداردى ازايتۋ ءۇشىن باردى دەۋ مۇلدە قيسىنسىز. ويتكەنى ىلەسپە اۋدارماشىلاردى دايىنداۋعا سونشالىقتى كوپ شىعىن شىقپايدى. ىلەسپە اۋدارماشىنى دايىنداۋ - جازباشا اۋدارماشى سياقتى بىرنەشە جىل وقىتىلاتىن، سونداي- اق جۇزدەگەن ادامدى جاپپاي دايىندايتىن وقۋدان مۇلدە باسقا. ىلەسپە اۋدارماشىلار اۋدارما جاساۋ داعدىسى بار ادامداردىڭ ىشىنەن ىرىكتەلىپ الىنىپ، قىسقا مەرزىمدى كۋرستاردا دايىندالادى. سونداي- اق، ىلەسپە اۋدارماشىلاردىڭ قازىرگى كەزدە قاجەت بولىپ وتىرعان سانى دا سونشالىقتى كوپ ەمەس. الماتى سياقتى ءىرى مادەني جانە قارجىلىق ورتالىقتا جانە ءتۇرلى حالىقارالىق جيىندار ءجيى وتكىزىلەتىن استانادا ءارقايسىسىندا ون شاقتىدان، وبلىس ورتالىقتارىندا 2-3 ىلەسپە اۋدارماشىدان بولسا، ازىرشە سول دا جەتكىلىكتى.
سوندىقتان ءبىز ايتىپ وتىرعان تارماقشانىڭ قىسقارتىلۋىنا باعدارلامانى كەلىسۋ راسىمدەرىنە قاتىسقان مەملەكەتتىك ورگاندارداعى لاۋازىمدى تۇلعالاردىڭ بۇل سالا ەرەكشەلىگىنەن ماعلۇماتى از ەكەندىگى اسەر ەتكەن بولۋى كەرەك دەگەن ويدامىز. ايتپەسە، وسىندايدا، ءتىل دامىتۋ تەتىگىن قولدا ۇستاپ وتىرعان ادامدار قۇزىرەتتى پىكىرىن ءبىلدىرىپ، تارماقشانى قورعاپ قالا الاتىن ەدى. ءبىز مۇنى شيرەك عاسىردان استام ەلىمىزدىڭ جوعارى مەملەكەتتىك ورگاندارىندا قىزمەت ەتە ءجۇرىپ، قۇجاتتاردىڭ قالاي كەلىسىلەتىنىنەن حاباردار بولعاندىقتان ايتىپ وتىرمىز.
تاعى ءبىر مىسال كەلتىرەيىك. ءبىر جىلدارى ءتىل كوميتەتىن «بولاشاق» باعدارلاماسىمەن وقىپ كەلگەن مامان باسقاردى. الدىنا بارىپ، سالانى دامىتۋ تۋرالى ويلارىمىزبەن بولىستىك. ول ماعان تاڭدانا قاراپ: «ا زاچەم ەتو نادو؟ سەيچاس ۆەس مير گوۆوريت نا انگلييسكوم يازىكە» (بۇنىڭ نە كەرەگى بار، قازىر بۇكىل الەم اعىلشىن تىلىندە سويلەيدى - رەد.) دەدى! «قوياننىڭ ءتۇرىن كورىپ، قالجاسىنان ءتۇڭىل» دەگەن عوي. مىنا سوزىنەن كەيىن مەن ءلام دەمەستەن، ورنىمنان تۇرىپ شىعىپ كەتتىم. اتىن اتاپ، ءتۇسىن تۇستەمەي وتىرعان سەبەبىم، تاياۋدا «جاڭالىقتاردان» بەرىلگەن ءبىر سۋىت حاباردا ول جىگىتتىڭ اتى-ءجونى تىلگە عانا ەمەس، باسقا دا قۇندىلىقتارىمىزعا دەگەن كوزقاراستارى رۋحاني ەمەس، ماتەريالدىق مۇددە دەڭگەيىندە بولعانداردىڭ قاتارىندا اتالدى. سول كەزدە ءجۇسىپ بالاساعۇننىڭ ءسوزى تاعى ەسكە ءتۇستى.
ودان كەيىن دە ءتىل كوميتەتىنىڭ تىزگىنى قازاق ءتىلىن شالا بىلەتىن ازاماتقا بۇيىردى. ءتىل ماسەلەسىن كوتەرەتىن كىسىلەردەن قورقادى-اۋ دەپ ويلادىق، ويتكەنى بىرنەشە رەت بارىپ تا، قابىلداۋ بولمەسىنە تەلەفونىمىزدى قالدىرىپ تا كوردىك - حابار بولمادى.
ءبىرازىراق بۇرىن جاڭا باسشى كەلگەن ەكەن، جاقسى باستامالارىمەن، ناقتى ىستەرىمەن تۋعان ءتىلىنىڭ كوسەگەسىن كوگەرتەر تۇلعا بولسا ەكەن دەپ تىلەپ ءجۇرمىز. باسشىلارعا بارعاندى ۇناتا بەرمەيتىن باسىم، بالكىم كوزىنە تۇسەر دەپ وسى ماقالانى جازۋعا بەل بۋدىم.
ۇزاق جىلدار بويى اۋدارما سالاسىندا قىزمەت ەتىپ، ءتىل ماسەلەلەرىن ارقاۋ ەتكەن ءىرىلى-ۇساقتى جيىندارعا قاتىسىپ جۇرگەندە قازاق ءتىلىنىڭ جاي-كۇيىن جاقسارتۋعا قاتىستى تالاي باستامالار كوتەرىلىپ، يگىلىكتى ءىس-شارالار وتكىزىلگەنىنە كۋا بولدىق. ءتىل جاناشىرلارىنىڭ انا ءتىلىمىزدىڭ دامۋىنا بايلانىستى تالاي ۇسىنىستارىن، رەنىشتەرىن، ارمان-قيالدارىن ەستىدىك. سولاردىڭ ءبىرى - ەلىمىزگە رەسمي ساپارمەن كەلگەن باسقا مەملەكەتتەر وكىلدەرىنىڭ ءوز تىلدەرىندە سويلەيتىنىن كورگەن ءبىزدىڭ ادامداردىڭ «ءبىزدىڭ ازاماتتار دا ەلىمىزدەن تىس جەرلەردە وتەتىن جيىنداردا انا تىلىمىزدە سويلەسە عوي» دەگەن ارمانى. ول ارمان ورىندالۋى ءۇشىن دە ىلەسپە اۋدارما جاسالۋى كەرەك ەكەندىگىن ايتقىم كەلەدى.
وتكەن جىلدى قازاق ءتىلى جاناشىرلارىنىڭ سول ارماندارى ورىندالعان جىل دەۋگە بولادى. 2015 -جىلعى 27 -قىركۇيەك كۇنى ەلباسى باسقا ەمەس، بىرىككەن ۇلتتار ۇيىمى باس اسسامبلەياسىنىڭ مىنبەرىنەن قازاقشا سويلەدى. كوزدەرىن تەلەديداردان الماي وتىرعان قاۋىم قازاق تىلىنەن ىلەسپە اۋدارما بولماعاندىقتان ەلباسى ءسوزىنىڭ ءبىرشاما ۋاقىتقا ۇزىلگەنىن كوزى كوردى. ۇيىمداستىرۋدان جىبەرىلگەن كەمشىلىكتەر جەر بەتىندەگى ەڭ ءىرى ۇيىم تورىنە شىققان ءتىلىمىزدىڭ جولىن كەس-كەستەدى. سول جەردە وتىرىپ، مەملەكەت، ازاماتتار تاراپىنان قولداۋ تاۋىپ، كەزىندە «قازاق تىلىنەن تىكەلەي شەت تىلدەرىنە اۋدارما جاسايتىن مامانداردى دايىنداۋ كەرەك» دەگەن مەجەم ورىندالعاندا، ەلباسى سوزىندە مۇنداي ىركىلىس بولمايتىن ەدى-اۋ دەپ ويلادىم.
بيىلعى كوكتەمدە يران يسلام رەسپۋبليكاسىنا، تۇركياعا، وزبەكستانعا بارعان رەسمي ساپارلارىندا سول مەملەكەتتەر باسشىلارىمەن بولعان اڭگىمەلەرىندە دە ەلباسىنىڭ قازاقشا سويلەپ وتىرعانىن بايقاۋ قيىن ەمەس. تەلەرەپورتاجدى جۇرگىزگەن جۋرناليست سوزدەرىنىڭ اراسىنان قازاق ءسوزى ۇزىك- ۇزىك ەستىلىپ، ونى پروتوكول بويىنشا پرەزيدەنتتىڭ قالقاسىندا وتىرعان اۋدارماشى ىزبە-ءىز (پوسلەدوۆاتەلنىي) اۋدارما جاساپ وتىردى. ءسويتىپ، بۇل - ءتىلىمىزدىڭ جوعارى دەڭگەيدە قولدانىلىپ جۇرگەنىنىڭ تاعى ءبىر ايعاعى بولدى. ال ا ق ش ساپارىنان ورالعاننان كەيىن مەملەكەتتىك ارنالارعا بەرگەن سۇحباتىندا پرەزيدەنتىمىز قازاق تىلىندە بايانداما جاساۋىن «جاقسىلىقتىڭ نىشانى» دەپ ءتۇسىندىرىپ، «...مەن ايتقاننان كەيىن مەنەن كەيىنگى ءبىزدىڭ باسشىلار سولاي (قازاقشا) سويلەيدى دەپ سەنەمىن!» دەدى.
ولاي دەۋىنىڭ ار جاعىندا ەل تۇتقاسى بولىپ جۇرگەن ازاماتتاردان باستاپ، بولاشاقتا ەل تىزگىنىن ۇستايتىن جاستارىمىزعا دەيىن ارتىلار ۇلكەن سالماق جاتقانىن ءتۇسىنۋ قيىن ەمەس. ىلەسپە اۋدارما جاساي ءجۇرىپ، قازاقشا سويلەۋ ءىس-شاراعا قاتىسۋشىنىڭ قازاق ءتىلىن جاقسى دەڭگەيدە ءبىلۋ- بىلمەۋىنە عانا ەمەس، ولاردىڭ پاتريوتتىق بولمىسىنا تىكەلەي بايلانىستى دەگەن وي ءتۇيدىم. ونداي كىسىلەر زور قۇرمەتكە لايىق. ءوز باسىم انا تىلىمىزدە سوزدىك قورى ازدىق ەتىپ، قينالىپ سويلەپ تۇرعانداردى ىقىلاستانا اۋدارامىن. ولاردىڭ ايتار ويىن ىشكى ينتۋيتسياممەن سەزىنە وتىرىپ، اۋدارما جاسايمىن، شاكىرتتەرىمە دە سولاي دەپ ۇيرەتەمىن.
ىلەسپە اۋدارما - كەز كەلگەن جيىننىڭ قازاق تىلىندە جۇرگىزىلۋىنە، ونىڭ باياندامالاردان باستاپ ءجارىسسوز، پىكىرتالاس، سۇراق- جاۋاپقا دەيىن ەركىن پايدالانىلۋىنا مۇمكىندىك بەرەتىن ءتاسىل. «قازاق ءتىلى - تۇرمىستىق ءتىل» دەگەن ستەرەوتيپتى جويۋعا كومەكتەسەتىن، حالىقارالىق دەڭگەيدەگى بيىك مىنبەرلەردەن قازاق ءتىلىنىڭ ەستىلۋىنە جول اشاتىن دا - وسى ىلەسپە اۋدارما. ءبىز ىلەسپە اۋدارمانىڭ ءومىردىڭ بار سالاسىندا انا تىلىمىزدە سويلەپ، قازاق ءتىلىنىڭ مەملەكەتتىك مارتەبەسىن بەرىك ورنىقتىراتىن وسى الەۋەتىن پايدالانۋىمىز كەرەك.
كامال الپەيىسوۆا، فيلولوگيا عىلىمدارىنىڭ كانديداتى، رەسپۋبليكالىق «ۇزدىك اۋدارماشى» كونكۋرسىنىڭ جەڭىمپازى، ىلەسپە اۋدارماشى
zhasalash.kz
