توقتار تولەشوۆتىڭ ءتورت ايەلى سىرا زاۋىتىنان ميلليونداعان سومادا جالاقى الىپ وتىرعان
ال جۇمىس ورنىنا ەشقاشان كەلىپ كورمەگەن ايەلدەرىنە اي سايىن 2 ميلليون 282 مىڭ تەڭگە جالاقى بەرىلىپ تۇرعان. بۇل تۋرالى Otyrar.kz پورتالى حابارلادى. تىلشىلەر زاۋىتتا بولىپ، كاسىپورىننىڭ قازىرگى جۇمىسىمەن تانىستى.
«دارحان Group» ج ش س كادر جانە ەڭبەك قاتىناستارىن باسقارۋ ءبولىمىنىڭ باسشىسى نادەجدا ورتتىڭ ايتۋىنشا، ءبىراز ماماندى، ءبولىمدى قىسقارتۋعا تۋرا كەلدى. سەبەبى ولار تولەشوۆتىڭ وتاسىنا قىزمەت كورسەتىپ كەلگەن ءبولىم دەۋگە بولاتىن ەدى. «مىسالى، حيميالىق تازالاۋ، جەكە كولىكتەرى تۇراتىن گاراج، كولىك جۋۋ ورنى، وتباسىنا ارنالعان ۆيپ-اسحانا، ارنايى بولىنگەن كۇزەت اگەنتتىگى. وسىنىڭ ءبارى ءبىر وتباسىنا قىزمەت ەتكەن. زاۋىتتا تولەشوۆتىڭ تۋىستارى باسشىلىق قىزمەتتەردە تىركەلىپ، اقشا الىپ وتىرعان. ول شتاتتاردى قىسقارتتىق. 4 ايەلى كومپانيانىڭ باس ديرەكتورىنىڭ 4 باعىتتاعى ورىنباسارلارى رەتىندە قوماقتى ايلىق جالاقى الىپ وتىرعان. ولاردان باسقا بيزنەسمەننىڭ بالالارىنا ارنالىپ تا شتاتتىق بىرلىكتەر اشىلىپ قويعان. بارلىعى تەك قاعاز جۇزىندە جۇمىس ىستەگەن. ءبىراق زاۋىتقا كەلمەگەن. ولارعا اي سايىن تولەنگەن جالاقى 2,5 ميلليون تەڭگەدەن اسادى»، - دەيدى ءبولىم باسشىسى.
ال باس بۋحگالتەر سۆەتلانا ۆاسيليەۆنا لۋكينىح وسى تازارتۋ شاراسىنان كەيىن كومپانيانىڭ اي سايىن 40-60 ميلليون تەڭگە شاماسىندا قارجى ۇنەمدەگەنىن ايتىپ وتىر. «سول قارجى نەگىزىندە بۇگىندە ايلىق جالاقى قارىزىن جاپتىق. ەكى كومپانيا بويىنشا دا قازىر قارىزىمىز جوق. كەرىسىنشە، قازىر جۇمىسشىلاردىڭ ەڭبەكاقىسىن 25-30 پايىزعا، كەيبىرىنىڭ ايلىعىن 50 پايىزعا دەيىن كوتەردىك. ال جۇمىسشىلاردىڭ بىردە-ءبىرىن قىسقارتپادىق. قازىر بارلىعى ايلىقتى ۋاقتىلى الىپ ءجۇر»، - دەدى ول.
زاۋىت باسشىلىعى كاسىپورىندا سالىق اينالىمىنا قاتىستى دا تەكسەرۋ جۇرگىزىلگەنىن ناقتىلادى. سوعان بايلانىستى قوسىمشا قۇن سالىعى مەن پايدا سالىعى، اكتسيزدەرگە قاتىستى قوردالانعان 800 ميلليون تەڭگە كولەمىندە قارىز وتەلىپتى. ولار - زەينەتاقى جيناقتاۋ قورىنا بولىنەتىن قارجى جانە الەۋمەتتىك سالىق، تاعى دا باسقا تولەمدەر ەدى.
«كەشەندى تەكسەرۋدەن بەلگىلى بولعانى، تولەشوۆ بارلىق مەرەكەلىك ءىس-شارالارى مەن قىمبات كولىكتەردى ساتىپ الۋ، ءتىپتى، شەتەلدەردەگى دەمالىستارىن زاۋىت ەسەبىنەن جاساعان. زاۋىت كاسساسىنان 8,5 ميلليارد تەڭگە العان. ياعني، كاسىپورىن ۇجىمى ءبىر وتباسىعا جۇمىس ىستەگەن»، - دەدى سۆەتلانا ۆاسيليەۆنا لۋكينىح.
كەزدەسۋ سوڭىندا تىلشىلەردىڭ زاۋىتتىڭ ەندىگى تاعدىرىنا قاتىستى ساۋالىنا ناقتى جاۋاپ تا بەرىلىپتى. «مەنىڭ پايىمداۋىمشا، زاۋىتتى ا ت ف بانك الادى. زاۋىت بانكتە كەپىلدىكتە تۇر. ءبىراق، جاڭا باسشىلار كەلسە، ولارمەن كەلىسسوزدەر جۇرگىزۋگە دايىنبىز. سەبەبى، جۇمىسشىلاردىڭ قۇقىعىن قورعاۋعا نيەتتىمىز»، - دەدى باس ديرەكتوردىڭ مىندەتىن اتقارۋشى نۇرعالي دوسانبايەۆ.
«بۇل كەزدە زاۋىت اۋماعىندا كولىكتەرگە سىرا قۇيىلعان ۇلكەن قۇتىلار تيەلىپ، تاراتۋعا دايىن تۇردى. بۇل - زاۋىت جۇمىس ىستەپ تۇر دەگەن ءسوز»، - دەيدى باسىلىم ءتىلشى زاۋرە ورالبايەۆا.
«قازىرگى تاڭدا زاۋىت عيماراتىندا ايتارلىقتاي وزگەرىس جوق. بۇرىنعىسىنشا جۇمىس ءجۇرىپ جاتىر. كاسىپورىن جەتەكشىلەرى ءبىزدىڭ ءتۇسىرۋ توبىنا بىردەن ءوندىرىستىڭ ىشكى جۇيەسىن دە كورسەتە باستادى. زاۋىتتا ءبىرشاما ۋاقىت بويى توقتاپ تۇرعان سىرانى بوتەلكەلەرگە قۇيۋ جۇيەسى جاقىندا ىسكە قوسىلىپتى. ۋاقىتشا جۇمىسسىز قالعان ازاماتتار ىسىنە قايتا كىرىسكەنىن ايتادى»، - دەيدى تىلشىلەر.
ەسكە سالايىق، بەلگىلى كاسىپكەر توقتار تولەشوۆ 2016-جىلدىڭ 30- قاڭتارىندا شىمكەنتتە ارنايى وپەراتسيا كەزىندە ۇستالعان بولاتىن. ءتىنتۋ كەزىندە ۇيىنەن جانە جۇمىس ورنىنان قارۋ-جاراق، ەسىرتكى زاتى جانە وقۋ قۇرالدارى انىقتالىپ، تاركىلەنگەن ەدى. كاسىپكەرمەن بىرگە ءۇش ادام ۇستالدى.
