بۇگىن ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەلەرى سايلانادى
ازيا-تىنىق مۇحيتى ايماعىنىڭ وكىلى رەتىندە قازاقستان بۇل ورىن ءۇشىن العاش رەت كۇرەسكە تۇسكەلى وتىر.
باتىس ەۋروپالىق جانە باسقا دا ەلدەر توبىنان 2- ورىنعا يتاليا، نيدەرلاندى جانە شۆەتسيا ەلدەرى تالاسادى. لاتىن امەريكالىق مەملەكەتتەر توبىنان 1- ورىنعا جالعىز ۇمىتكەر بار - بوليۆيا. افريكا ەلدەرى توبىندا دا تالاس بولمايتىن بولىپ تۇر. مۇندا 1- ورىنعا جالعىز ۇمىتكەر بار. ول - ەفيوپيا.
ال ازيا-تىنىق مۇحيتى ايماعى مەملەكەتتەرىنە كەلەر بولساق، مۇندا 1- ورىنعا 2 ۇمىتكەر ەل بار: قازاقستان جانە تايلاند. قازاقستان رەسپۋبليكاسى بۇعان دەيىن ب ۇ ۇ ق ك قۇرامىندا بولماعان. ال تايلاند ەلى 1985-1986-جىلدارى كەڭەس قۇرامىندا بولعان.
وتكەن جىلى ب ۇ ۇ قاۋىپسىزدىك كەڭەسىنىڭ 2016-2017-جىلدارداعى تۇراقتى ەمەس مۇشەلىگىنە مىسىر، سەنەگال، ۋكراينا، ۋرۋگۆاي جانە جاپونيا ەلدەرى سايلانعان بولاتىن.
وسى جىلدىڭ 31- جەلتوقسانىنان باستاپ انگولا، مالايزيا، ۆەنەسۋەلا، جاڭا زەلانديا جانە يسپانيا مەملەكەتتەرى قاۋىپسىزدىك كەڭەستەگى ورىندارىن بوساتادى.
ب ۇ ۇ قاۋىپسىزدىك كەڭەسىنە 15 مەملەكەت مۇشەلىك ەتەدى. ۇلى بريتانيا، قىتاي حالىق رەسپۋبليكاسى، فرانسيا، رەسەي فەدەراتسياسى جانە امەريكا قۇراما شتاتتارى - كەڭەستىڭ تۇراقتى مۇشەلەرى. ودان بولەك 10 تۇراقتى ەمەس مۇشە مەملەكەتتى باس اسسامبلەيا ەكى جىلعا سايلايدى. ءار جىل سايىن ونىڭ بەسەۋى جاڭارىپ وتىرادى.
