اسكەري قىزمەتشى- اۆياتورلار وتان الدىندا ادال بولۋعا انت قابىلدادى - فوتو
جاس جاۋىنگەرلەر اسكەري قىزمەتىن وتكەرۋ ءۇشىن اتىراۋ وبلىسىنان كەلدى. انت قابىلداۋ ارنايى باعدارلامادان، اتاپ ايتقاندا كونستيتۋتسيانى، قازاقستان رەسپۋبليكاسىن قورعاۋ ماسەلەسى تۋرالى زاڭنامانىڭ تالاپتارىن زەردەلەۋدەن باستالدى.
«سەندەردىڭ الدارىڭدا ارميانىڭ قاۋىرت كۇندەرى تۇر، اسكەري ءىستى ادال ۇيرەنىڭدەر، وجەت، ەرجۇرەك بولىڭدار، ەڭ باستىسى - بىرلىكتەرىڭ مىقتى بولسىن. ءبىر- ءبىرىڭدى قولداپ، قول ۇشىن بەرىڭدەر. قازاقستان رەسپۋبليكاسى قارۋلى كۇشتەرىنىڭ اسكەري قىزمەتشىسى اتاعىنا لايىقتى ابىرويمەن قىزمەت اتقارىڭدار»، - دەدى اسكەري- اۋە كۇشتەرى قولباسشىسىنىڭ تاربيە جانە يدەولوگيالىق جۇمىستار جونىندەگى ورىنباسارى، پولكوۆنيك ەركەن جۇماعاليەۆ.
ءىس- شاراعا قارۋلى كۇشتەردىڭ ارداگەرلەرى، جاس ساربازداردىڭ تۋىستارى مەن جاقىندارى كەلدى. سونىمەن قاتار جاس ساربازداردى ءبولىم باسشىلىعى، تۋىستارى مەن دوستارى قۇتتىقتادى.
انت قابىلداۋدان كەيىن تۋىستارى مەن جاقىندارىنا ساربازداردىڭ قىزمەت وتكەرەتىن جاعدايىن تانىستىرۋ ءۇشىن وقۋ- جاتتىعۋ كورپۋسى، كازارما، اسحانا، سپورت زال كورسەتىلدى.
اتالعان ءىس- شارانىڭ ەستە قالارلىعى، ارنايى ماقساتتاعى بولىمشەنىڭ قويان- قولتىق كۇرەس ەلەمەنتتەرىن كورسەتكەن ءساتى بولدى. 30153- اسكەري ءبولىمنىڭ باسشىلىعى جاس جاۋىنگەرلەر وتان الدىنداعى بورىشىن ابىرويمەن اتقاراتىندىعىن جانە ءبىر جىلدان سوڭ امان- ەسەن ەلگە ورالاتىندىعىن زور سەنىممەن ايتتى.
