شىعىس قازاقستاندىق يمام ءوز ۇيىندە قونجىق اسىراپ وتىر - فوتو
تۋعانىنا بىرنەشە اي بولعاندىقتان بۇل جانۋاردان تونەتىن قاۋىپ جوق ەكەن. ول تەك جۇگىرىپ، شاپقىلاپ، ويناپ قوجايىنىنىڭ نازارىن كۇتەدى، دەپ جازادى muslim.kz.
راۆشان زۋلفيەۆتىڭ ءۇيى سوڭعى ەكى اپتادا تۇرعىندار اراسىندا ەرەكشە تانىمالدىلىققا يە بولدى. بۇل، ارينە، ۇيدە قونجىقتىڭ اسىر سالىپ جۇرگەنىنە بايلانىستى. مۇنى كورۋگە ءتىپتى وسكەمەننىڭ وزىنەن ات ارىتىپ كەلۋشىلەر كوبەيگەن.
«بىرنەشە اپتا بۇرىن ءبىز بۇل قونجىقتى تاۋىپ الدىق. ونىڭ اناسىنا نە بولعانى بەلگىسىز. ءبىز قونجىقتى قۇتقارىپ، ۇيگە الىپ كەلدىك. ايەلىم قارسى بولعان جوق، ال سەگىز جاستاعى ۇلىم ءتىپتى قۋانىپ كەتتى. ينتەرنەتتەن بۇل جانۋاردىڭ قالاي تاماقتاناتىنىن قاراپ، جاعدايىن جاساۋعا كىرىسىپ كەتتىك»، - دەيدى يمام.
ونىڭ ايتۋىنشا اتىن قويۋعا كوپ ويلانىپ جاتپاي، ميشكا دەپ اتاي سالىپتى. ارپا، قاراقۇمىق، بالىق، سۇتپەن تاماقتانادى. ال ونىڭ سۇيىكتى اسى، ارينە - بال.
«باسىندا ول ءبىراز قورىققان، قازىر ۇيرەنىسىپ، ويناپ كەتتى. كەيدە ءتىپتى ەركەلەپ كەتەدى. ۇيىقتايتىن ورىن رەتىندە باقشالىقتان كىشكەنتاي ۇيشىك جاساپ بەردىك. كەشكىسىن جاقسىلاپ تاماقتانىپ العان سوڭ تاڭعا دەيىن تىپ-تىنىش ۇيىقتايدى»، - دەيدى راۆشان زۋلفيەۆ.
يەسىنىڭ ايتۋىنشا، «كەرەك ەمەس»، «تيىسپە» دەگەن جانە باسقا دا تۇرمىستىق سوزدەردى تۇسىنەدى ەكەن. ەكى كۇن سايىن وزەن جاعاسىنا بارىپ سەرۋەندەپ قايتادى.
يمامنىڭ سوزىنشە، ميشكا ەكى اپتادا 5 كەلى سالماق قوسىپ، جىلدام ءوسىپ كەلە جاتىر دەيدى.
«ءبىز ونىڭ ءوسىپ، ۇلكەيگەن سوڭ ەركە قونجىقتان جىرتقىش ايۋعا اينالاتىنىن بىلەمىز. سول سەبەپتى مەن قالالىق زووباقپەن كەلىسىپ، ول وسكەندە تورعا سالىنىپ، سوندا كەتەتىن بولدى. ارينە، ونىمەن قوشتاسقىمىز كەلمەيدى، ءبىراق امال نە. ۇنەمى بارىپ تۇرامىز»، - دەيدى قوجايىن.
