استانادا جۋرناليستەر اراسىندا شاعىن فۋتبولدان تۋرنير ءوتتى - فوتو
بايلانىس جانە اقپارات كۇنىنە وراي ۇيىمداستىرىلعان شاراعا بەلگىلى تەلەارنالاردىڭ، باسپا ءسوزدىڭ، اقپارات اگەنتتىكتەرىنىڭ وكىلدەرى قاتىستى. باس جۇلدەنى «قازاق راديوسىنىڭ» كومانداسى ەنشىلەدى، دەپ حابارلادى قالا اكىمىنىڭ رەسمي سايتى.
ستاديوندا ويىنشىلار مەن ولارعا قولداۋ كورسەتۋگە كەلگەن جانكۇيەر ارىپتەستەرىنىڭ كوڭىل- كۇيى ەرەكشە سەزىلدى.
شارا بارىسىندا «Kazsport» ، «حابار»، «قازاقستان» تەلەارنالارىنىڭ، «استانا اقشامى»، «ەگەمەن قازاقستان» گازەتتەرىنىڭ، سونداي-اق، «كازكونتەنت»، «جۋرناليستتەر ءۇيىنىڭ»، «قازاقپارات» اگەنتتىگىنىڭ، «قازمەديا ورتالىعىنىڭ»، «كوركەم» ستۋدياسىنىڭ، استانا قالاسى ىشكى ساياسات باسقارماسىنىڭ، «قازاق راديوسى» جانە «National Geographic قازاقستان» قىزمەتكەرلەرى شەبەرلىك بايقاستى.
- قۇرمەتتى ارىپتەستەر، سىزدەردى الداعى بايلانىس جانە اقپارات كۇنىمەن قۇتتىقتايمىن. سىزدەردىڭ بەلسەندى ازاماتتىق ۇستانىمدارىڭىز - وبەكتيۆتىلىكتەرىڭىز بەن جاڭالىققا، اقيقاتتى انىقتاۋعا دەگەن ۇمتىلىستارىڭىز - كاسىپتەرىڭىزدىڭ ەرەكشە قاسيەتى وسى. ءبىز باق وكىلدەرىمەن دوستىق ارىپتەستىك قارىم- قاتىناسىمىزدى جوعارى باعالايمىز. بارشاڭىزعا تابىس پەن جاڭا شىڭداردان كورىنۋدى تىلەيمىن، ءارقاشان دا كوزدەگەن ماقساتتارىڭىزعا جەتىڭىزدەر، - دەدى قالالىق ىشكى ساياسات باسقارماسىنىڭ باسشىسى ەرلان كاناليموۆ.
جەرەبە تاستالعاننان كەيىن كوماندالار ءتورت شاعىن توپقا ءبولىندى.
ستاديون الاڭى ەكىگە ءبولىنىپ، ءبىر ۋاقىتتا ەكى كوماندادان جارىستى. ءبىر تايم 10 مينۋتقا سوزىلدى.
تارتىستى وتكەن تۋرنيردە «قازاق راديوسىنىڭ» جۋرناليستتەرى باس جۇلدەنى جەڭىپ الدى.
- بۇگىن مەرەكە قارساڭىندا بارلىق جۋرناليستتەر ءوز جۇمىسىنىڭ قورىتىندىسىن شىعاردى. جارىسقا 13 كوماندا قاتىستى، سونىڭ ىشىندە امانگەلدى سەيتقان، زەيىن الىپبەك سىندى جۋرناليستيكا مايتالماندارى دا وينادى. وسىنداي ءىس- شارالاردىڭ ارقاسىندا ءبىز - جاس جۋرناليستەر ۇلگى الىپ، كاسىبي تۇرعىدان وسەمىز. بارىنە دە ساتتىلىك تىلەيمىن، كەلەسى مەرەكەدە كەزدەسكەنشە، - دەدى «قازاق راديوسىنىڭ» ديكتورى دوسىمجان ەرمۇرات.
جارىستا «كۇمىس» جۇلدە «حابار» تەلەارناسىنىڭ قىزمەتكەرلەرىنە، «قولا» «قازاقستان» تەلەارناسىنا بۇيىردى. «قازاقپارات» حالىقارالىق اقپارات اگەنتتىگى ءتورتىنشى ورىندا.
جۇلدەلى ورىن العان كوماندالار باعالى سىيلىقتارمەن ماراپاتتالدى.
