پاريج: بريتانيا فرانسيا ۆوكزالدارىندا شەكارالىق باقىلاۋدى جالعاستىرادى
2003-جىلى فرانسيانىڭ لە-تۋكە-پاري-پلاج قالاسىندا بريتاندىق شەكاراشىلارعا بىرىككەن كورولدىككە باعىت العان جولاۋشىلاردىڭ تولقۇجاتىن تەكسەرۋگە رۇقسات بەرەتىن ەكىجاقتى كەلىسىمگە قول قويىلعان بولاتىن. سول كەزدەن باستاپ بريتانيانىڭ كوشى-قون قىزمەتى فرانسيا اۋماعىندا شەكارالىق باقىلاۋ جۇرگىزىپ كەلەدى.
تولقۇجاتتىق باقىلاۋ جونىندەگى وسىنداي كەلىسىم ۇلى بريتانيا مەن بەلگيا اراسىندا دا جاسالعان.
فرانسيانىڭ ەكونوميكا ءمينيسترى ەممانيۋەل ماكرون بيىلعى ناۋرىزدا بريتانيا ەۋرووداقتان شىققان جاعدايدا فرانسيا بيلىگىنىڭ بريتاندىق شەكاراشىلارعا فرانسيا اۋماعىندا شەكارالىق باقىلاۋ جۇرگىزۋگە مۇمكىندىك بەرەتىن كەلىسىم كۇشىن توقتاتۋى مۇمكىن ەكەندىگىن مالىمدەگەن بولاتىن.
كوشى-قون ماسەلەسى بريتانيانىڭ ەۋرووداقتان شىعۋىنا قاتىستى تالقىلاۋداعى ەڭ قيىن ماسەلەلەردىڭ ءبىرى بولدى. لوندون مەرى ەۋرووداقتان كەلەتىن يمميگرانتتاردىڭ بريتانيا استاناسىنىڭ دامۋىنا قوسار ۇلەسى زور ەكەنىن ايتتى. لوندون سايلاۋشىلارىنىڭ باسىم بولىگى بىرىككەن كورولدىكتىڭ ەۋرووداقتان شىقپاۋىن قولداپ داۋىس بەرگەن-ءدى. رەسمي دەرەكتەرگە سۇيەنسەك، لوندوندا ەۋرووداقتان كەلگەن ميلليونعا جۋىق يمميگرانت بار.
