ادەلينۋ دا سيلۆا: رونالدۋ قازاقستان قۇراماسىنا قارسى تاعى ءبىر ويناسا جاقسى بولار ەدى - فوتو

بۇل سايىستا جەڭىستەن دامەلى باستى ۇمىتكەرلەردىڭ ءبىرى پورتۋگاليا ۇلتتىق قۇراماسى دا جاسىل الاڭعا شىعادى.

الايدا ەۋرو 2016 توپتىق كەزەڭىندە ءۇش ويىن وتكىزىپ، بىردە بىرىندە جەڭىسكە جەتپەگەن كوماندا سوعىلعان دوپ سانىنىڭ ايىرماشىلىعىمەن عانا پلەي-وفقا جولداما العان. ح. كولۋمبتىڭ ءىزباسارلارى تۋرنيردەگى ءتورت گولدىڭ ۇشەۋىن ۆەنگريالىقتارمەن وتكىزگەن سوڭعى ماتچتا سوقتى. بۇل كەزدەسۋ ەۋروپا چەمپيوناتىنداعى ەڭ قىزىقتى ماتچ بولدى دەسەك قاتەلەسپەيمىز.

پورتۋگاليانىڭ ەلىمىزدەگى ەلشىلىگى جۋرناليستەر ءۇشىن ارنايى وسى ماتچتىڭ بىرلەسكەن كورسەتىلىمىن ۇيىمداستىردى. ماتچ قورىتىندىسى بويىنشا ب ا ق وكىلدەرى پورتۋگاليا ەلشىلىگىنىڭ باسشىسى، پورتۋگاليانىڭ قازاقستانداعى ىستەرى بويىنشا سەنىمدى وكىلى ادەلينۋ دا سيلۆادان سۇحبات الدى.

- ءسىز بارلىعىن جيناپ، ءوز كومانداڭىزعا قولداۋ كورسەتۋ تۋرالى مۇنداي شەشىمدى ءبىرىنشى رەت قابىلداپ وتىرسىز با؟

- ءيا، ۇيىمىزدەن جىراقتا جۇرسەك تە، بىرگە جينالىپ، ءوز كوماندامىزعا قولداۋ كورسەتۋدى ءجون كوردىك. ءبىز كوپ ەمەسپىز، ءبىراق ءبىزدىڭ تىلەكتەستىگىمىز كوماندامىزدىڭ ناتيجەلى ويىن كورسەتۋىنە كومەكتەستى، قاناتتاندىردى.

- وسى ويىننان العان اسەرىڭىزبەن، ويىڭىزبەن بولىسسەڭىز؟

- ارينە، پورتۋگاليا كومانداسىنىڭ ەۋرو-داعى ناتيجەسى كوڭىل قۋانتارلىق ەمەس. دەگەنمەن ءبىز كوماندامىز ءۇشىن وسى ەۋروپا چەمپيوناتىنىڭ جاقسى وتەتىنىنە ءۇمىتتىمىز. توپتىق كەزەڭدە پورتۋگاليا قۇراماسىنا ساتتىلىك جەتىسپەگەن بولار. سەبەبى پورتۋگاليا جاقسى وينادى، گول سوعۋعا مۇمكىندىكتەرى دە بولدى. دەگەنمەن جەڭىس بىزگە بۇيىرمادى. الدا پلەي-وفف ويىندارى. ءبىزدىڭ كوماندانىڭ كەلەسى ويىنداردا جەڭىسكە جەتۋگە مۇمكىندىگى بار.

- ءسىزدىڭ ەلىڭىزدە وسى ماتچتارعا قانداي پىكىر ءبىلدىرىپ جاتىر؟

- كوپتەگەن جانكۇيەرلەرگە سوڭعى ۆەنگريالىقتارمەن وتكىزگەن كەزدەسۋ ۇنادى. ولار ءبىزدىڭ كوماندانىڭ وسى سارىندا، وسىنداي مانەردە ويناعانىن قالار ەدى دەپ ويلايمىن. ءبىز ءۇش گول سوقتىق، سونشا گول جىبەرىپ الدىق. ارينە، بىزگە قورعانىستى كۇشەيتۋ كەرەك. كەلەسى ويىندا وسىنى ەسكەرىپ، بۇدان جاقسى وينايمىز دەگەن ويدامىن.

- كوماندا كوشباسشىسى كريشتيانۋ رونالدۋدىڭ وينىنا كوڭىلىڭىز تولدى ما؟

- ءبىز ونىڭ ۆەنگريالىقتارمەن وتكىزگەن كەزدەسۋدەگى وينىنا ريزامىز. ول ءوزىنىڭ بار بىلگەنىن كورسەتىپ، ءبىزدى تاعى ءبىر مارتە قۋانتتى.

- قازاقستاندا رونالدۋدىڭ جانكۇيەرلەرى از ەمەس. ونىڭ ۇلتتىق قۇراما ساپىنداعى العاشقى ويىنىن قازاقستان كومانداسىنا قارسى وتكىزگەنىن دە ەرەكشە اتاپ كەتۋگە بولادى.

- شىنىمەن بە؟ مەن بۇل تۋرالى بىلمەپپىن. ەكى ەلدى مۇنداي قىزىقتى فاكتىنىڭ بايلانىستىرىپ تۇرعانى دا قىزىق. كريشتيانۋ - الەمدىك دەڭگەيدەگى جۇلدىز جانە ول بۇدان كەيىن دە بۇكىل الەمدەگى جانكۇيەرلەرىن قۋانتا بەرەدى دەگەن ۇمىتتەمىن. ول قازاقستان كومانداسىنا قارسى تاعى ءبىر مارتە ويناسا جاقسى بولار ەدى.

- سونىمەن، ءسىز ءوز قۇراماڭىزدىڭ مۇمكىندىگىن قالاي باعالايسىز؟

- ءبارى دە بولۋى مۇمكىن. كەلەسى ويىننىڭ قورىتىندىسىن ەشكىم بولجاي المايدى. ۆەنگريامەن وتكىزگەن ويىن وسىنى دالەلدەدى. ەگەر ءبىز شابۋىلدا بەلسەندى بولىپ، قورعانىستى نەعۇرلىم جاقسى ۇيىمداستىرساق نەگە جەڭە المايمىز؟ توپتىق كەزەڭدەگى ماتچتار بۇل تۋرنيردە ۇستەم تۇرعان فاۆوريتتەردىڭ جوقتىعىن كورسەتتى. ءبىزدىڭ پلەي-وفتاعى قارسىلاسىمىز حورۆاتيا قۇراماسى وتە جاقسى ويىن كورسەتتى جانە بىزگە كەلەسى ماتچتا وڭاي تيمەسى انىق.

- وسى ەۋرو بارىسىندا جانكۇيەرلەر كوپشىلىكتىڭ نازارىندا جۇرگەن جۇلدىزداردان بولەك جاڭا ەسىمدەر مەن كوماندالار تاپتى.

- فۋتبولدىڭ دامۋىنا ۇلەس قوساتىن جانە وسى ويىننىڭ كوز قۋانتار جاۋھارىنا اينالار مىقتى كوماندالار كوپ بولۋى كەرەك. بۇل مەنىڭ جەكە پىكىرىم.

     
اڭگىمەلەسكەن ءىلياس وماروۆ،

استانا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى