قازاقستان بالا قۇقىقتارىن قورعاۋ سالاسىندا نورۆەگيانىڭ تاجىريبەسىن زەردەلەدى
ساپاردىڭ باستى ماقساتى نورۆەگيالىق بالا قۇقىقتارى بويىنشا ۋاكىلدىڭ جۇيەسىندەگى تاجىريبەنى، بالالار قۇقىقتارىن قورعاۋ، بالالارعا قاتىستى كۇش قولدانۋدىڭ الدىن الۋ سالاسىنداعى بالالار ىستەرى بويىنشا ءبىلىم بەرۋ، قۇقىق قورعاۋ جانە سوت ورگاندارىنىڭ ماماندانۋىن، سوت ادىلدىگىمەن بالالاردى، قۇربان بولعان بالالار مەن زورلىق-زومبىلىقتىڭ كۋاگەرلەرىن سۇيەمەلدەۋ جونىندەگى الەۋمەتتىك-پەداگوگيكالىق قىزمەتتى، سونداي-اق بالالار، جاستار، وتباسى ىستەرى بويىنشا ۆەدومستۆولاردىڭ ءرولىن، قوعامدىق ۇيىمدارمەن ءوزارا جۇمىس ىستەۋدى قوسا العاندا، بالالارعا ارنالعان ادىلەت جۇيەسىندەگى جۇمىستاردى زەردەلەۋ بولدى.
ساپار بارىسىندا قازاقستاندىقتار نورۆەگيا كورولدىگى بالالار قۇقىقتارىن قورعاۋ بويىنشا ۋاكىل ەنن لينبومەن كەزدەستى، وسى ينستيتۋتتىڭ تاريحىمەن، جۇمىسىمەن تانىستى.
ز. باليەۆا قازاقستانداعى ادام قۇقىقتارى جونىندەگى ۋاكىلەتتى ينستيتۋت جۇيەسىنىڭ ەرەكشەلىكتەرى، زاڭدىلىق جانە تاۋەلسىزدىك قاعيداتتارى جايىندا ايتتى.
ساپاردىڭ ماڭىزدى ءساتى نورۆەگيا جوعارعى سوتى، پروكۋراتۋرا، ادىلەت مينيسترلىگى وكىلدەرىمەن كەزدەسۋى بولدى. كەزدەسۋگە قاتىسۋشىلار وتباسىلىق جانە يۋۆەنالدىق قۇقىق ماسەلەلەرى مەن ولاردى ىسكە اسىرۋ بارىسىن تالقىلادى. قازاقستاندىق دەلەگاتسيا بالالاردىڭ قۇقىقتارىن قورعاۋ زاڭىنىڭ ەرەجەلەرى تۋرالى جانە كامەلەتتىك جاسقا تولماعاندارعا سوت كومەگىن كورسەتۋ، سونداي-اق بالالاردىڭ مۇددەسىندە كورسەتىلەتىن الەۋمەتتىك قىزمەتتەردىڭ تەتىكتەرى جايلى ايتىپ بەردى.
قازاقستاندىق دەلەگاتسيا پوليتسيا جانىنداعى «بالالارعا ارنالعان ۇيگە» باردى. حالىقارالىق «بالالاردى قورعايمىز Save the Children » ۇيىمىنىڭ جۇمىسىمەن تانىستى.
كەزدەسۋ بارىسىندا ەكى ەل بالالارىنىڭ قۇقىقتارى جونىندە ومبۋدسمەندەر اراسىندا ودان ءارى ىنتىماقتاستىق تۋرالى ۋاعدالاستىققا قول جەتكىزىلدى.
