ءۇندىستان مەن پاكىستاننىڭ شاڭحاي ىنتىماقتاستىق ۇيىمىنا كىرۋ كەلىسسوزدەرى وتە كۇردەلى ءوتتى - ي. كاريموۆ
بۇل تۋرالى شاڭحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ شاعىن قۇرامداعى وتىرىسىندا وزبەكستان پرەزيدەنتى يسلام كاريموۆ ءمالىم ەتتى.
«ش ى ۇ دامۋىنىڭ جاڭا كەزەڭى تاشكەنتتە ءۇندىستان مەن پاكىستاننىڭ ش ى ۇ- عا مۇشە مەملەكەتتەر مارتەبەسىن الۋ ماقساتىنداعى مىندەتتەمەلەرى تۋرالى مەموراندۋمدارعا قول قويۋى بولارى ءسوزسىز. جاسىرماي-اق قويايىن، بۇل قۇجاتتار بويىنشا كەلىسسوزدەر پروتسەسى بارىنشا كۇردەلى، قيىن بولدى. مۇنى ءبىلۋ قاجەت. دەگەنمەن، سوڭعى ناتيجەدە ءبىز بارلىق قيىندىقتاردى ەڭسەرە الدىق، كەلىسىمگە كەلدىك جانە ش ى ۇ- نىڭ جالپى ستراتەگيالىق ماقساتتارى مەن مىندەتتەرىن ساقتاي وتىرىپ، جەكەلەگەن قاراما-قايشىلىقتار بويىنشا ورتاق پىكىرگە توقايلاستىق»، - دەدى ي. كاريموۆ.
سونىمەن قاتار، ول ۇيىمعا وزبەكستاننىڭ ءتوراعالىعى كەزەڭىنە وراي بەكىتىلگەن جوسپارعا سايكەس، 50 دەن استام شارانىڭ وتكەندىگىن ەسكە سالدى. ۇلتتىق ۇيلەستىرۋشىلەر كەڭەسى، ۇكىمەت باسشىلارى كەڭەسى، سىرتقى ىستەر مينيسترلەرى كەڭەسى، ش ى ۇ قاۋىپسىزدىك حاتشىلارى كەزدەسۋى كەزىندەگى جۇمىستاردىڭ جەمىستى بولعاندىعىن باسا ايتتى.
«ءبىزدىڭ بىرلەسكەن كۇش-جىگەرىمىزدىڭ ارقاسىندا مەملەكەت باسشىلارىنىڭ قول قويۋىنا ەڭ الدىمەن ش ى ۇ 15 جىلدىعىنىڭ تاشكەنت دەكالارتسياسى، 2025-جىلعا دەيىنگى ش ى ۇ- نى دامىتۋ ستراتەگياسىن جۇزەگە اسىرۋ بويىنشا ءىس-قيمىل جوسپارى ەنگىزىلەدى. ول ۇيىمنىڭ نەگىزگى ماقساتتارى مەن باسىمدىقتارىن ومىردە جۇزەگە اسىرۋ، ونىڭ حالىقارالىق ارەناداعى مۇددەسىن ىلگەرىلەتۋ ءۇشىن ماڭىزدى باعدار، سەنىمدى ساياسي بازا بولۋعا يكەمدەلگەن»، - دەدى وزبەكستان پرەزيدەنتى.
اۆتور: مارلان جيەمباي
