بۇگىن عالىم سەيىت قاسقاباسوۆتىڭ تۋعان كۇنى
شىعىس قازاقستان وبلىسىندا تۋعان. اباي اتىنداعى الماتى مەملەكەتتىك ۋنيۆەرسيتەتىن بىتىرگەن.
قازاقستان رەسپۋبليكاسى ۇلتتىق عىلىم اكادەمياسى ادەبيەت جونە ونەر ينستيتۋتىنىڭ عىلىمي قىزمەتكەرى، قوعامدىق عىلىمدار بولىمشەسىنىڭ عىلىمي حاتشىسى، ك س ر و عىلىم اكادەمياسى الەم ادەبيەتى ينستيتۋتىنىڭ اعا عىلىمي قىزمەتكەرى، قازاقستان رەسپۋبليكاسى پرەزيدەنتى اپپاراتىنىڭ قىزمەتكەرى، قازاقستان رەسپۋبليكاسى مينيسترلەر كابينەتى جانىنداعى جوعارى اتتەستاتسيا كوميسسياسىنىڭ ءتوراعاسى، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى شىعىستانۋ فاكۋلتەتىنىڭ دەكانى، قازاقستان رەسپۋبليكاسى ۇلتتىق عىلىم اكادەمياسى ادەبيەت جانە ونەر ينستيتۋتىنىڭ ديرەكتورى قىزمەتتەرىن اتقارعان.
عىلىمي-زەرتتەۋ ەڭبەكتەرى قازاق فولكلورىنىڭ تەورياسى مەن تاريحىنا، ادەبيەت پەن ونەر ماسەلەلەرىنە، ەتنوگرافيا مەن اۋىز ادەبيەتى مۇرالارىنىڭ تەكستولوگياسىنا ارنالعان. قاسقاباسوۆتىڭ ميفولوگيا مەن پروزالىق فولكلوردىڭ شىعۋ تەگى مەن دامۋ جولدارى، فولكلورداعى ءار زامان بولمىسىنىڭ سيپاتتالۋ ەرەكشەلىكتەرى، فولكلوردىڭ كوركەمدىك ءادىسى تۋرالى تەوريالىق وي-پىكىرلەرى مەن تۇجىرىمدارى وزبەك، تاتار، تۇرىكمەن، قاراقالپاق، باشقۇرت عالىمدارىنىڭ زەرتتەۋلەرىندە قولداۋ تاۋىپ، نەگىزگە الىندى. ۆ. رادلوۆ جيناعان قازاق فولكلورى ۇلگىلەرى مەن اقىن-جىراۋلار شىعارمالارى ەنگەن «التىن ساندىق»، «ەل قازىناسى - ەسكى ءسوز» جيناقتارىن قۇراستىرۋشىلاردىڭ ءبىرى. جامبىلدىڭ ورىس تىلىندەگى تاڭدامالى جيناعىنىڭ العى ءسوزى مەن تۇسىنىكتەرىن جازىپ، قۇراستىرعان.
300 دەن اسا ەڭبەكتىڭ، سونىڭ ىشىندە فولكلور، ادەبيەت پەن ونەر بويىنشا 9 مونوگرافيانىڭ اۆتورى.
قازاقستان رەسپۋبليكاسى مەملەكەتتىك سىيلىعىنىڭ، قازاقستان رەسپۋبليكاسى ۇلتتىق عىلىم اكادەمياسىنىڭ ش. ءۋاليحانوۆ اتىنداعى سىيلىعىنىڭ، جامبىل اتىنداعى، ماحامبەت اتىنداعى سىيلىقتاردىڭ لاۋرەاتى.
