قازاقستان پرەزيدەنتى سانكت-پەتەربورعا ساپارى جايىندا ايتىپ بەردى
وسى ساپار بارىسىندا ەلباسى ر ف پرەزيدەنتى ۆلاديمير پۋتينمەن كەزدەسىپ، XX پەتەربۋرگ حالىقارالىق ەكونوميكالىق فورۋمىنا قاتىستى.
«ۆلاديمير پۋتينمەن بولەك اۋقىمدى سەنىمگەرلىك كەزدەسۋ ءوتتى. ءبىز ەكىجاقتى، وڭىرلىك ماسەلەلەردى، گەوساياساتتىڭ پروبلەمالارىن، لاڭكەستىك ماسەلەسىن، ەۋرازيالىق ەكونوميكالىق وداقتىڭ دامۋىن تالقىلاپ، قازاقستان مەن رەسەيدىڭ ەكىجاقتى قاتىناستارىن قاراستىردىق. اتاپ ايتقاندا، 4- قازاندا استانادا اۋقىمدىق قازاقستاندىق-رەسەيلىك بيزنەس-فورۋم وتەدى دەپ ۇمىتتەنەمىن، وسى رەتتە جاڭا كەلىسىم-شارتتارعا قول قويۋعا ءمان بەرىلىپ وتىر. بۇگىندە بىرلەسكەن التى مىڭ كاسىپورىن جۇمىس ىستەۋدە جانە بۇل بايلانىستار وتە ماڭىزدى»، - دەدى مەملەكەت باسشىسى «روسسيا 24» تەلەارناسىنا بەرگەن سۇحباتىندا.
سونىمەن قاتار ن. نازاربايەۆ پەتەربور حالىقارالىق ەكونوميكالىق فورۋمى اياسىندا ر ف بيزنەسىنىڭ ۇزدىكتەرىمەن ماڭىزدى كەزدەسۋ بولعانىن ايتا كەلە، وندا قازاقستاننىڭ ينۆەستيتسيالىق مۇمكىندىكتەرى تۋرالى، ەۋرازيالىق ەكونوميكالىق وداق جۇمىسىن باستاعالى قول جەتكىزىلگەن ورتاق جەتىستىكتەر جونىندە پىكىر الماسۋلار وتكەنىن اتاپ ءوتتى.
ءسوز سوڭىندا ەلباسى سانكتسيالار مەن قيىندىقتارعا قاراماستان سانكت-پەتەربورعا باتىستىڭ، امەريكالىق ىسكەر ادامداردىڭ، ءىرى كومپانيالار باسشىلارىنىڭ، ب ۇ ۇ باس حاتشىسىنىڭ جانە وزگە دە تاراپتاردىڭ كەلۋى ەكونوميكالىق فورۋمنىڭ ءوزىنىڭ ماقساتىنا جەتكەندىگىن ءبىلدىرىپ وتىرعاندىعىن قاداپ ايتتى.
اۆتور: رۋسلان عابباسوۆ
