سەناتور تاسماعامبەتوۆتەن اسكەردەن تابىتپەن قايتىپ جاتقاندارعا قاتىستى تۇسىنىكتەمە بەرۋدى تالاپ ەتتى
باۋىر ەتى بالاسىنىڭ ءوز-وزىنە قول جۇمساعانىنا اتا-انالار نەگە سەنبەيدى، نەگە كۇمان كەلتىرەدى؟ ءالى دە بولسا اسكەري بولىمدەردەگى الىمجەتتىكتى جاسىرىپ، ءبىزدىڭ اسكەري شەندىلەرىمىز وزدەرىنىڭ مۇددەسىن، ابىرويىن عانا ساقتاپ قالىپ جۇرگەن جوق پا؟
وسى ساۋالداردى 23- ماۋسىم كۇنى سەنات دەپۋتاتى جابال ەرعاليەۆ قورعانىس ءمينيسترى يمانعالي تاسماعامبەتوۆكە جولدادى.
سوڭعى ۋاقىتتا ەلىمىزدە كونستيتۋتسيا بويىنشا وتان الدىنداعى ازاماتتىق پارىزىن وتەپ جۇرگەن ازاماتتارىمىزدىڭ بەيبىت كۇندە قازاعا ۇشىراۋى جيى ورىن الا باستادى. وسى جاعداي دەپۋتاتتى الاڭداتىپ وتىر.
«جۋىردا عانا اقمولا وبلىسىنداعى اقكول اۋدانى ترۋدوۆوە سەلولىق وكرۋگىنەن اسكەر قاتارىنا الىنىپ، جامبىل وبلىسى وتارداعى 82796 اسكەري بولىمىندە ءوزىنىڭ ازاماتتىق مىندەتىن اتقارىپ بىتۋىنە بەس اي قالعان 22 جاستاعى ايان ساتىبايەۆتى اسكەريلەردىڭ اتا-اناسىنىڭ قولىنا تابىتپەن اكەلىپ بەرۋى ۇلكەن قايعىلى وقيعا بولدى. اعايىن-تۋمالارى مەن ەل-جۇرتى تويىن جاساپ، باتاسىن بەرىپ، شىعارىپ سالعان قىرشىن جاستىڭ ءوز-وزىنە قول جۇمسادى دەگەن ساراپتاما قورىتىندىسىنا سەنبەگەن جاۋىنگەردىڭ تۋىستارى تابىتتى اشىپ كورگەندە، جانتۇرشىگەرلىك جاعدايدى كورىپ، ەستەن تانىپ قالا جازداعان. بۇل ارادا ءبىز ساراپتاما قورىتىندىسىنا كۇمان كەلتىرۋدەن مۇلدە اۋلاقپىز. دەگەنمەن، قايتا ساراپتاما جۇرگىزۋ بارىسىندا ءىستىڭ اق-قاراسى ءالى دە انىقتالۋى كەرەك دەپ سانايمىز»، - دەدى جابال ەرعاليەۆ.
دەپۋتاتتىڭ ايتۋىنشا، قازىرگى بەيبىت ۋاقىتتا قاتارداعى جاۋىنگەرلەردىڭ ءتۇرلى سەبەپتەرمەن اجال قۇشىپ، تابىتپەن ۇيىنە قايتارىلىپ جاتۋىنىڭ كوبىنەسە ءبىر عانا سەبەبى ايتىلىپ ءجۇر.
ول - «ەلدەن حات الىپتى، سونان سوڭ ءوز-وزىنە قول جۇمسادى». ال بۇعان قازىر قوعام سەنبەۋگە اينالدى.
«ءسويتىپ، ءبىز ونسىز دا وزدەرىنىڭ ارىستاي ۇلدارىنان ءبىر ايىرىلىپ، قايعىدان قان جۇتىپ، قارا جامىلىپ وتىرعان اتا-انانى ءبىر جەر قىلساق، «بالاڭىز وزىنە قول جۇمسادى» دەپ بۇكىل ءبىر اۋلەتتىڭ سۇيەگىنە قارا تاڭبا باسىپ، ەكىنشى ءبىر وتە اۋىر جاعدايعا قالدىرىپ جۇرگەندەيمىز. مۇنداي جاعدايعا تاپ بولىپ، قاسىرەت تارتىپ وتىرعان وتباسىلار قازىر ەلىمىزدە كوپ بولماسا دا بار. باۋىر ەتى بالاسىنىڭ ءوز-وزىنە قول جۇمساعانىنا اتا-انالار نەگە سەنبەيدى، نەگە كۇمان كەلتىرەدى؟ ءالى دە بولسا اسكەري بولىمدەردەگى الىمجەتتىك جاساۋ جايلارىن جاسىرىپ، ءبىزدىڭ اسكەري شەندىلەرىمىز وزدەرىنىڭ مۇددەسىن، ابىرويىن عانا ساقتاپ قالىپ جۇرگەن جوق پا؟ «اسكەرگە باراتىن بالامىز تەك وسى وتارداعى اسكەري بولەمدەرگە تۇسپەسە ەكەن» دەيتىن اتا-انالار بار قازىر. سوندا وتار شىنىندا دا جاستارىمىزدىڭ جاۋىنگەرلىك بورىشىن وتەۋدىڭ الدەبىر قاۋىپتى ايماعىنا اينالىپ وتىر ما؟»، - دەيدى سەناتور.
ونىڭ ايتۋىنشا، بۇل ارادا دەپۋتاتتار الدەبىر اسكەري ءبولىمنىڭ ابىرويىنا كولەڭكە تۇسىرەيىن دەپ وتىرعان جوق. تەك وسى ءبىر ۇرەي ەل ىشىندە نەگە بار دەگەن ماسەلەگە زەر سالىپ، اسكەردەگى ءتارتىپتى كۇشەيتۋ قاجەت.
«قازىرگى ۋاقىتتا قازاقستاننىڭ قارۋلى كۇشتەرىنىڭ قاتارىنا كوبىنەسە قاراپايىم وتباسىلاردىڭ ازاماتتارى الىناتىندىعىن ەسكەرسەك، سول قاراپايىم ادامداردىڭ اسكەر قاتارىندا ءوز بورىشىن ابىرويلى وتەپ، ءوز ۇيلەرىنە ءتىرى، امان-ساۋ ورالۋ ماسەلەسىنە ءالى دە بولسا ايىرىقشا ءمان بەرۋ كەرەك. اسكەردەگى ءتارتىپ ماسەلەسىن تاعى دا ءبىر ويلاستىرۋدىڭ ارتىقتىعى بولماس ەدى دەپ سانايمىز»، - دەپ تۇيىندەدى ءسوز سوڭىن دەپۋتات.
