سەنات قازاقستان مەن رەسەيدىڭ كاسپي تەڭىزىنىڭ سولتۇستىگىندەگى كەن ورنىن بىرلەسە زەرتتەۋ تۋرالى كەلىسىمىن قارايدى
وندا «1998-جىلعى 6- شىلدەدەگى قازاقستان رەسپۋبليكاسى مەن رەسەي فەدەراتسياسى اراسىنداعى جەر قويناۋىن پايدالانۋعا ارنالعان ەگەمەندىك قۇقىقتاردى جۇزەگە اسىرۋ ماقساتىندا كاسپي تەڭىزىنىڭ سولتۇستىك بولىگىنىڭ ءتۇبىن مەجەلەۋ تۋرالى حاتتاماعا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى تالقىلاندى.
اتالعان كەلىسىم قازاقستان مەن رەسەيدىڭ، ولاردىڭ ۋاكىلەتتىك تۇلعالارى اراسىنداعى «قۇرمانعازى» (قازاقستان) كەن ورنىن، «سەنترالنىي» جانە «حۆالىنسكوە» (رەسەي) كەن قۇرىلىمدارىن، كاسپي تەڭىزىنىڭ سولتۇستىك بولىگىنىڭ ءتۇبىن بىرلەسىپ يگەرۋ بويىنشا قىزمەتتىڭ قۇقىقتىق نەگىزدەرىن بەكىتەدى.
ەنەرگەتيكا ۆيتسە-مينيسترى اسەت ماعاۋوۆتىڭ ايتۋىنشا، 2015-جىلى ەكى ەل باسشىلارى سەنترالنىي گەولوگيالىق قۇرىلىمىن جەتە بارلاۋ قۇقىعىن ءبولۋ جونىندەگى وزگەرىستەردى قامتىعان حاتتاماعا قول قويعان بولاتىن. سەنترالنىيدىڭ قۇرىلىمى كاسپي تەڭىزىنىڭ سولتۇستىك بولىگىندە، اقتاۋ قالاسىنىڭ وڭتۇستىك باتىسىنا قاراي 150 شاقىرىم، استراحان قالاسىنان 440 شاقىرىم قاشىقتىقتا رەسەي سەكتورىندا ورنالاسقان.
جۇمىس ۋچاسكەسىندەگى سۋ تەرەڭدىگى 350-500 مەتردى قۇرايدى. رەسەي تاراپىنىڭ الدىن الا دەرەكتەرى بويىنشا قۇرىلىمدا 90 ميلليون توننا مۇناي، سونىڭ ىشىندە س-1 ساناتى بويىنشا - 6 ميلليون توننا، س-2 ساناتى بويىنشا 84 ميلليون توننا مۇنايدى قۇرايدى.
«كەلىسىمدەگى وزگەرىستەر رەسەيدىڭ جەر قويناۋىن پايدالانۋ جونىندەگى فەدەرالدىق اگەنتتىگىنىڭ بىرلەسكەن كاسىپورىنىنا «نەفتەگازوۆايا كومپانيا سەنترالنايا» ج ش ق جەتە بارلاۋ جۇرگىزۋگە ليتسەنزيا الۋعا ۋاجدەمەلىك باس تارتۋعا قاتىستى بولىپ وتىر. رەسەي زاڭناماسىنا سايكەس، جەتە بارلاۋ بولىگىندە شەكتەۋلەر بەلگىلەنگەن.
اتاپ ايتقاندا، گەولوگيالىق زەرتتەۋلەرگە قاتىستى جالپى مەرزىمى مەن بارلادى ۇزارتۋ مۇمكىندىگىن قاراستىرمايدى جانە بەس جىل مەرزىمگە بەرىلەدى. وسىعان بايلانىستى حاتتاماعا وزگەرىستەر ەنگىزىلىپ وتىر. تۇتاستاي العاندا، سەنترالنىي قۇرىلىمىن يگەرۋ كاسپي تەڭىزىنىڭ سولتۇستىك بولىگىن يگەرۋ كەزىندەگى گەولوگيالىق اقپاراتتار الۋعا، قازاقستاندىق كادرلار ءۇشىن جاڭا جۇمىس ورىندارىن قۇرۋعا مۇمكىندىك بەرەدى»، - دەدى ءا. ماعاۋوۆ.
زاڭ جوباسى الداعى ۋاقىتتا وتەتىن پالاتانىڭ جالپى وتىرىسىنا شىعارىلاتىن بولادى.
اۆتور: قانات مامەتقازى ۇلى
