جاپونيالىق ساياحاتشىنى شىمكەنتتىڭ ادامدارى تاڭقالدىرعان - فوتو
ءبىراق، بۇل جاعداي ونى قۋانتپاسا ەش رەنجىتپەپتى.
بۇل تۋرالى otyrar.kz حابارلايدى.
28 جاستاعى فۋمي ۆەلوسيپەدكە ءمىنىپ الەمدى ارالاۋدى ءبىر جىل بۇرىن باستاعان. وسى ۋاقىت ىشىندە ول اۆستراليا، كامبودجا، يندونەزيا، سينگاپۋر جانە الماتى، استانا، تاراز قالالارىندا بولعان.
«ءبىزدىڭ اندرەي اپلەكيموۆ ەسىمدى دوسىمىز دوستارىمەن بىرگە موتوسيكلمەن ىستىقكولگە قىدىرىپ بارعان. ول جاقتا جاپوندىق ساياحاتشىنى كەزىكتىرىپتى. ول جالعىز ءوزى تاماقتانىپ وتىر ەكەن. اندرەي سوسىن بىزبەن، ياعني شىمكەنت ۆەلوقاۋىمداستىعىمەن حابارلاسىپ ونىمەن كەزدەسۋ جاسايىق دەدى. ءبىز ونىمەن تەز ارادا كەزدەسىپ، ونى بايجانسايعا اپاردىق. ول ءالى كۇنگە ءبىزدىڭ سونشالىقتى كومەك جاساعانىمىزدى تۇسىنە الماي ءجۇر. ءبىز بولساق بۇل قازاقستاننىڭ قوناقجايلىلىق قاسيەتى دەيمىز. ال شىمكەنتتىڭ قوناق كۇتۋ ءداستۇرى ول ەندى بولەك اڭگىمە»، - دەيدى زاحار اگافونوۆ.
فۋميدىڭ جوسپارى بويىنشا ول شىمكەنتتە بىرەر كۇن ايالداپ، ءارى قاراي وزبەكستانعا كەتپەكشى بولىپتى. الايدا ول جاقتا سامميت وتۋىنە بايلانىستى شەكارا جابىق. ءبىراق، فۋميگە شىمكەنتتە ساياحاتتاپ، كەرەمەت جەرلەردى ارالاۋ ۇناپ قالعان سىڭايلى. ال قالاداعى ۆەلوجولدىڭ جوقتىعى شەتەلدىكتى ءتىپتى دە قىنجىلتپاپتى.
«كوپتەگەن ەلدەردە، اسىرەسە، ازيادا ۆەلوجولدار جوق. ءتىپتى ءبىزدىڭ توكيودان دا تاپپايسىز»، - دەيدى فۋمي.
فۋميگە شىمكەنت قازاقستاننىڭ باسقا قالالارىنا قاراعاندا ەرەكشە ۇناپتى. تۋريست قالانى وتە ادەمى ءارى جايلى دەپ باعالاعان. ال شىمكەنتتە ونى ەرەكشە اسەرگە بولەگەن ادامدارى مەن تاماعى ەكەن.
«سىزدەردە ادامدار وتە كەرەمەت. ولاردىڭ نەلىكتەن كومەكتەسۋگە قۇشتار ەكەنىن تۇسىنە المايمىن. مەن وسىندا ناعىز دوستارىمنىڭ پايدا بولعانىنا قۋانىشتىمىن. سىزدەردىڭ اسحانالارىڭىزدا قاتتى كوڭىلىمنەن شىقتى، اسىرەسە لاعمان مەن كاۋاپ»، - دەيدى جاپوندىق جىگىت.
فۋمي شىمكەنتتەن سوڭ وزبەكستانعا، سوسىن تۇركىمەنستانعا اتتانادى. ءارى قاراي ول ءازىربايجان، گرۋزيا، تۇركيا، گرەكيا ەلدەرىن دە باسىپ وتۋگە نيەتتى. ال جاپونيادا ونى اناسى مەن قارىنداسى كۇتىپ وتىر. ول ءوز ەلىنە شامامەن كەلەسى جىلى تابان تىرەيدى.
