مەكتەپتە وقىماي- اق ميلليونەر اتانعان برايان ترەيسي باي بولۋدىڭ قۇپياسىن اشتى

قالا تۇرعىندارىمەن ءتۇرلى تاقىرىپتا وي الماسىپ، تاجىريبەسىمەن ءبولىستى.

بۇل تۋرالى Stan.kz حابارلايدى.

الدىن الا جارناماسى جاسالماسا دا، برايان ترەيسي مىرزانىڭ الماتىعا كەلەتىنىن ەستىپ، ترەنينگكە بيلەت الۋعا اسىققاندار كوپ. ولاردىڭ قاتارىندا Stan.kz ءتىلشىسى دە بار. ۇيىمداستىرۋشىلار ماۋسىمنىڭ 21- كۇنى تۇنگى ساعات ەكىگە دەيىن بيلەت ساتقاندارىن ايتتى. ناتيجەسىندە رەسپۋبليكا سارايىنا 400 گە جۋىق ادام جينالعان ەكەن.

زالعا كىرۋگە اسىققان ءار قوناققا برايان مىرزانىڭ جۇمىس داپتەرى مەن بىرنەشە تىلگە اۋدارىلعان كىتاپتارى جازىلعان فلەشكا تارتۋ ەتىلدى. مۇنىمەن قاتار، كەلۋشىلەر جەكە كۋالىكتەرىن كەپىلدىككە قالدىرىپ، اۋدارمانى تىڭداۋعا ارنالعان ارنايى قۇلاققاپتار الدى.

قوناقتار ورىندارىنا جايعاسقان سوڭ ساحنا تورىنە ۇيىمداستىرۋشىلاردىڭ ءبىرى شىعىپ، ميلليونەردى ورتاعا شاقىردى. نەگە ەكەنى بەلگىسىز، برايان مىرزا شىقپاي ءبىراز كىدىردى. ارتىنشا ورنىنا كومەكشىسى شىعىپ، ورتادا تۇرعان ورىندىقتاردى ءبىر تۇزەپ كەتتى. ۇيىمداستىرۋشى گۇلنار حانىم ساحنا سىرتىنا بارىپ جاعدايىن سۇراعاندا تولقىپ تۇرعانىن ايتقان ەكەن. ءتورت ءجۇز ەمەس، سان مىڭداعان ادامدى سوزىمەن باۋراپ اكەتەتىن بيزنەس جاتتىقتىرۋشىنىڭ بۇل ارەكەتىن كوپشىلىك تۇسىنبەي قالعان-دى. دەسە دە، ونىڭ بۇل قاراپايىمدىلىعىن جۇرت قۇپ كوردى.

ايگىلى ميلليونەر مۇنداي ترەنينگتەردى وسى ۋاقىتقا دەيىن كوپتەگەن مەملەكەتتە وتكىزىپ ۇلگەرگەن. بۇل ونىڭ قازاقستانعا العاش كەلۋى. ەل تۇرمىسىن كوزىمەن كورگەن برايان مىرزا ەلدەگى ەكونوميكالىق جاعدايدىڭ قيىن كەزەڭدى وتكەرىپ جاتقانىن جاسىرمادى. دەسە دە، ءبارى ءوز قولىمىزدا ەكەنىن ايتىپ، جارقىن بولاشاقتىڭ ءۇمىتىن سىيلادى.

ادەتتە ترەنينگتەرىن «باي بولعىسى كەلەتىندەر قول كوتەرسىنشى» دەپ باستايتىن برايان ترەيسي بۇل جولى وتىرعانداردان «كىمنىڭ ومىرىندە قيىندىقتارى بار؟»  دەپ سۇرادى. بۇل ساۋالدان كەيىن بارلىعى دەرلىك قول كوتەرۋگە اسىقتى.

«ەكونوميكالىق قيىندىق تەك قازاقستاندا ەمەس، بارشا الەم مەملەكەتتەرىندە بار. بۇل ءبىزدىڭ تۇلعا بولىپ قالىپتاسۋىمىزعا، ءوسىپ- وركەندەۋىمىزگە كەدەرگى جاساماۋى ءتيىس. ويتكەنى باقىت ادامنىڭ الەۋمەتتىك- تۇرمىستىق جاعدايىمەن ولشەنەدى. اقشا جەتكىلىكتى بولسا، ءسىز دە، وتباسىڭىز دا باقىتتى عۇمىر كەشەرى انىق. مىسالى، ءسىز بارلىق دۇنيە- مۇلكىڭىزدى ساتىپ شەتەلگە كەتتىڭىز دەلىك. سول ساتىلىمنان تۇسكەن اقشا ءسىزدىڭ الەۋمەتتىك- تۇرمىستىق جاعدايىڭىزدىڭ دارەجەسىن كورسەتەدى. ەندى وزدەرىڭىز ەسەپتەپ كورىڭىزدەر»، - دەدى برايان ترەيسي.

زالدا وتىرعان ادامدار مۇلكىنىڭ قانشا ەكەنىن ەسەپتەگەندەي بولىپ دۋ كۇلدى.

برايان مىرزا سەمينار بويى تابىستىڭ كىلتى بىلىمدە ەكەنىن تۇسىندىرۋگە تىرىستى. دەسە دە، ءوزىنىڭ ءتىپتى ورتا ءبىلىم الماعانىن جاسىرمادى. وتباسىندا كوپتەگەن قيىنشىلىق كورىپ، مەكتەپتەن شىعىپ كەتكەن ەكەن.

«مەن ءوزىمدى بەرەكەلى وتباسىندا تاربيەلەندىم دەپ ايتا المايمىن. اكەم جالقاۋ، ال انام ۇنەمى تاعدىرىنا لاعنەت ايتىپ جۇرەتىن. جاقىن دوستارىم دا بولمادى. ولار مەنەن تەرىس اينالىپ، مەكتەپتەن شىعىپ كەتتىم. ارتىنشا قارا جۇمىس ىستەپ، ەدەن دە، ىدىس- اياق تا جۋدىم. ايەلىم ءالى كۇنگە دەيىن «ىدىستى سەن جاقسى جۋاسىڭ» دەپ تارەلكە جۋدىرىپ قويادى. (كۇلدى.)

ساتۋشى بولىپ جۇرگەنىمدە ءبىر ارىپتەسىمنىڭ بارلىعىنان 10 ەسە ارتىق تاۋار ساتاتىنىن بايقادىم. ودان كەڭەس سۇراپ جانىنا باردىم. بارلىق تەحنيكانى ءتۇسىندىرىپ بەردى. ءسويتىپ نەبارى 26 جاسىمدا مەنىڭ قول استىمدا 92 ادام جۇمىس ىستەدى. ەكى جىل بويى كيىم- كەشەك تە المادىم. ال 30 جاسىمدا قايتادان وقۋىمدى جالعاستىردىم»، - دەيدى برايان ترەيسي.

بۇدان كەيىن ميلليونەر الدىن الا تاراتىلعان جۇمىس داپتەرى بويىنشا جاتتىعۋلار جاساتۋعا كىرىستى. كەلۋشىلەرگە نەبارى 30 سەكۋند ىشىندە ەڭ ماڭىزدى دەگەن ءۇش ماقساتتارىن جازدىردى. ارتىنشا وسى ماقساتتارعا جەتۋ ءۇشىن قانداي قادامدار جاساۋ كەرەكتىگىن جازدىردى. بۇدان كەيىن قاتار وتىرعان جاندار داپتەرگە جازىلعان ماقساتتارى تۋرالى ويىن ءبولىستى.

ميلليونەر ادەتتە تابىسقا جەتۋ ءۇشىن 10 جىل قاجەت ەكەنىن ايتادى. دەسە دە، كەزىندە ونىڭ سوزىنە قۇلاق اسقاندار بۇل سوزدەرىنىڭ جالعان ەكەنىن تىلگە تيەك ەتىپ ءجۇر ەكەن. سەبەبى، ولار مول تابىسقا نەبارى 5-7 جىلدىڭ ىشىندە كەنەلگەن.

سەمينار بويى بيزنەس جاتتىقتىرۋشى ءبىلىمنىڭ ماڭىزدىلىعىن مەڭزەپ قانا قويماي، تومەندەگىدەي كەڭەستەر ۇسىندى:

1. اپتاسىنا بەس كۇن 2 ساعاتتان جاڭا كىتاپ وقىڭىز؛

2. كەدەيلەردىڭ كۇنىنە 7-8 ساعات، ال باي ادامداردىڭ كۇنىنە ءبىر ساعات قانا تەلەديدار قارايتىنىن ۇمىتپاڭىز؛

3. ۋاقىتىڭىزدى ۇنەمدەڭىز. تايم مەندجمەنت ەرەجەلەرىنە جۇگىنىڭىز؛

4. اي سايىن تابىسىڭىزدى %2 عا، جىلىنا %25 عا ارتتىرىپ وتىرىڭىز؛

5. پروبلەمالارىڭىز تۋرالى ەمەس، جەتكىڭىز كەلەتىن جەتىستىكتەرىڭىز تۋرالى كوبىرەك ويلاڭىز؛

6. قانداي جاعداي بولماسىن وپتيميست بولىڭىز. ءاربىر ساتسىزدىكتەن ساباق الىڭىز. ءومىر تاجىريبەدەن قۇرالادى.

«بىلەسىزدەر مە، مەن تابىستى ادامدارمەن اڭگىمەلەسىپ وتىرعان كەزدە، ولاردىڭ اقشا تۋرالى مۇلدەم ايتپايتىنىن بايقايمىن. ولار تەك وتباسىلىق قۇندىلىقتار تۋرالى ءسوز قوزعايدى. جاۋاپكەرشىلىك سەزىمىنىڭ ماڭىزدى ەكەنىن ايتادى. تاعدىرعا لاعنەت ايتىپ، قول قۋسىرىپ قاراپ وتىرا بەرۋ دە، العا جىلجىپ الدىڭعى قاتارعا قوسىلۋ دا ءبىزدىڭ قولىمىزدا. مەن ادام بالاسىنىڭ وزىنە بەلگىلى ءبىر قاتاڭ ءتارتىپ قويسا، تابىسقا جەتەتىنىنە كوزىم جەتتى. ەڭ باستىسى، ەش ۋاقىتتا بەرىلمەۋ، تاباندىلىق تانىتۋ»، - دەپ برايان ترەيسي كوپشىلىككە ساتتىلىك تىلەدى.

ميلليونەر، بيزنەس- بەستسەللەرلەردىڭ اۆتورى مەن جەتەكشىسى برايان ترەيسي ادام سەنگىسىز تابىسقا جەتكەن تۇلعالاردىڭ ءبىرى. ول ءوزىنىڭ جەكە كومپانياسىنىڭ الەمدە 32 فيليالىن اشىپ، 200-دەن استام كومپانيانىڭ نارىققا شىعۋىنا كومەكتەسكەن.

IBM، Bank of America, BMW، Mobil, Glaxo, McDonnell Douglas سىندى كومپانيالارمەن جۇمىس ىستەپ، جەكە كەڭەسشىسى بولعان. 52 كىتاپتىڭ، جاتىقتىراتىن 500 اۋديو جانە ۆيدەو باعدارلامالاردىڭ اۆتورى جىل سايىن ءارتۇرلى مەملەكەتتە سەمينارلار وتكىزەدى.

دايىنداعان: قارلىعا بۇيەنباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى