ءسۇيىنباي اقىن ەسكەرتكىشى تۇركيانىڭ تورىنە قويىلدى
بىلتىرعى جىلى اقىننىڭ 200 جىلدىعىنا وراي وسى ەلدە ءسۇيىنباي ساياباعى اشىلعان بولاتىن.
ساياباقتىڭ اشىلۋ سالتاناتىندا ءسوز سويلەگەن كەچيورەن مۋنيسيپاليتەتىنىڭ مەرى مۇستافا اك «قازاق جەرى اتاجۇرتىمىز بولسا، تۇرىك جەرى اناجۇرتىمىز. بايلانىسىمىز جالعاسىپ، وتكەن جىلى اشىلعان ساياباقتىڭ ىشىنە بۇگىن شايىردىڭ ءمۇسىنىن قويىپ وتىرمىز. رامازان ايىمەن ءدوپ كەلىپ وتىرعان قۋانىش قۇتتى بولسىن!» - دەدى.
الماتى وبلىسى اكىمىنىڭ ورىنباسارى باقتيار ونەربايەۆ تا ءسوز الىپ، تاۋەلسىزدىكتىڭ 25 جىلدىعىنا وراي اتقارىلىپ وتىرعان شارا ەلباسىنىڭ سارابدال ساياساتىنىڭ ارقاسىندا جۇزەگە اسىپ وتىرعانىن جەتكىزدى. قازاق حالقىنىڭ، وبلىس باسشىنىڭ اتىنان تۇرىك باۋىرلارعا، وسى ءىستىڭ باسى- قاسىندا جۇرگەن ازاماتتارعا العىس ايتىپ، مۇنداي شارالاردىڭ تۇركى دۇنيەسىن بايىتا تۇسەتىنىنە، ماڭگىلىك ەلدىڭ ماڭگىلىك مۇرالارى بولاتىنىنا سەنىم ءبىلدىردى.
تۇركسوي باس حاتشىسى دۇيسەن قاسەيىنوۆ، قازاقستاننىڭ تۇركياداعى توتەنشە جانە وكىلەتتى ەلشىسى جانسەيىت تۇيمەبايەۆ، مەملەكەت جانە قوعام قايراتكەرى ءشامشا بەركىمبايەۆا، اقىننىڭ تىكەلەي ۇرپاعى عابيت سادىربايەۆ ەكى ەل اراسىندا ساياسي، ەكونوميكالىق بايلانىستارمەن قاتار التىن كوپىر بولىپ وتىرعان رۋحانيات الەمى - تۇركىلىك تۇتاستىق ەكەنىن اتاپ ءوتتى. ءسۇيىنباي ەسكەرتكىشىنىڭ اشىلۋىن سونىڭ ءبىر جارقىن كورىنىسىنە بالادى.
بيۋستىڭ اشىلۋ ءراسىمىن ءسۇيىنباي اتىنداعى وبلىستىق فيلارمونيا ونەرپازدارى ءان- كۇيمەن كومكەرىپ، انكارالىقتاردىڭ ىستىق ىقىلاسىنا بولەندى.
بيۋستىڭ اۆتورى - ءمۇسىنشى نۇرعالىم يسابايەۆ. وتكەن جىلى ن. يسابايەۆتىڭ جاساعان ءمۇسىنى اقىننىڭ تۋعان اۋىلى قاراقىستاققا قويىلعان بولاتىن. «بۇل بيۋست قاراقىستاقتاعىعا قاراعاندا كولەمى جاعىنان ۇلكەن. جانە بۇل جۇمىسىمدا قازاقتىڭ كيىمدەرىندەگى ويۋ- ورنەكتەرىن زەرتتەپ جۇرگەن عالىمدارمەن بىرلەسە وتىرىپ، باس كيىمى مەن شاپانىنداعى زەردىڭ مان- مازمۇنىنا جەتە ءمان بەردىم. ماسەلەن، قالپاعىنا بيلەرگە ءتان «بيلىك اعاشى» ويۋى سالىندى»، دەيدى اۆتور.
بيۋستىڭ تۇعىرىمەن قوسقانداعى جالپى بيىكتىگى 2,60 مەتر، يىق تۇسىنان ەنى 1,35 مەتر.
وسى كۇنى «كالابا كەنت» الاڭىندا جامبىل جىراۋدىڭ 170 جىلدىعىنا وراي وبلىستىق ءسۇيىنباي اتىنداعى فيلارمونيا مەن «التىناي» مەملەكەتتىك حالىق ءبيى انسامبلى قازاق ونەرىن پاش ەتىپ، حالىق اندەرى مەن بيلەرىن انكارالىق كورەرمەندەر نازارىنا ۇسىندى.
