اقمولالىقتار دينا جولاماندى ۇلت باتىرىنداي كۇتىپ الدى - فوتو
بىلعارى قولعاپ شەبەرى بۇگىندە اقمولا وبلىسىنىڭ ماقتانىشىنا اينالعان. ارينە ونىڭ جەتكەن جەتىستىكتەرى مەملەكەت كولەمىندە دارىپتەلۋدە. بوكسشى قىزدى جەڭىسىمەن قۇتتىقتاۋ ماقساتىندا وبلىستىڭ سپورت جانە دەنەشىنىقتىرۋ باسقارماسىنىڭ باسشىسى نادەجدا پاتيۋشكينا، «Astana Arlans» كاسىپقوي بوكس كلۋبىنىڭ باپكەرى اندرەي سپيريدونوۆ، بەلگىلى بوكسشى مەرەكە ءجۇسىپوۆا سىندى كوپتەگەن سىيلى ازاماتتار كەلدى.
سپورتشى قىزدى ءوزى ءبىلىم العان ت. ۋاليەۆ اتىنداعى سپورت مەكتەبىنىڭ تاربيەلەنۋشىلەرى ۇيىمداستىرعان اۆتوشەرۋ كۇتىپ الدى. جاقسى اۋلىنىڭ كوشەلەرىن قازاقستاننىڭ تۋى بايلانعان كولىكتەر ارالاپ، سپورتشى جۇرت كۇتىپ وتىرعان مادەنيەت ۇيىنە جەتكىزىلدى.
دينا مەن ونىڭ باپكەرى الەكساندر ۆىسوسكيگە «جاقسى اۋدانىنىڭ قۇرمەتتى ازاماتى» اتاعى بەرىلدى.
وبلىستىق دەنەشىنىقتىرۋ جانە سپورت باسقارماسىنىڭ باستىعى دينا جولامانعا - بوكستان ەڭبەك سىڭىرگەن سپورت شەبەرى، زارينا سولويەۆاعا - حالىقارالىق دارەجەدەگى سپورت شەبەرى، الەكساندر ۆىسوسكيگە- بوكستان ق ر ەڭبەك سىڭىرگەن باپكەرى اتاعى بەرىلدى.
سپورتشىنىڭ باپكەرى باحتيار تۇرعىمبايەۆقا قازاقستاننىڭ ەڭبەك سىڭىرگەن باپكەرى اتاعى بەرىلدى.
ال ءوڭىر جاستارىنا سپورتپەن اينالىسۋعا مۇمكىندىكتەر بەرىپ، قولداۋ كورسەتىپ جۇرگەن باتىربەك ۋاليەۆكە «قۇرمەتتى سپورت قىزمەتكەرى» اتاعى بەرىلدى.
باتىربەك ۋاليەۆ ءوز كەزەگىندە ديناعا اۆتوكولىك سىيعا تارتتى. ول ءوڭىر جاستارىن سپورتقا باۋلۋ ماقساتىندا 2002 -جىلى ت. ۋاليەۆ اتىنداعى سپورت مەكتەبىن سالىپ بەرگەن ەدى. بۇگىندە ءوڭىر جاستارى سوندا تاربيەلەنىپ، جاتتىعۋلارىن جاساپ ءجۇر.
ەستە بولسا، ايەلدەر اراسىندا بوكستان الەم چەمپيوناتى استانا قالاسىندا وتكەن ەدى. وندا الەمنىڭ 67 ەلىنەن كەلگەن 285 سپورتشى باق سىناعان ەدى.
دينا جولامان وندا 54 كەلىگە دەيىنگى سالماقتا ونەر كورسەتكەن ەدى. باعى مەن بابى قاتار كەلىپ ول الەم چەمپيوناتىنداعى ەكىنشى التىن مەدالىن جەڭىپ الدى. جالپى كوماندالىق ەسەپ بويىنشا قازاقستاندىق سپورتشىلار ءبىرىنشى ورىن يەلەندى. قازاقستان قىزدارى ءتورت التىن، ەكى قولانىڭ جۇلدەگەنى اتاندى.
stan.kz
