الەكسەي ني: قانداي قۇراممەن بارساق تا، ريودا ءانۇرانىمىزدى شىرقاتامىز
دۇنيە ءجۇزىنىڭ كىل مىقتىلارىمەن بىرگە قازاق ەلىنىڭ سپورتشىلارى دا باق سىنايدى. قازىرگى تاڭدا جولداما العان قىز جىگىتتەرىمىز قىزۋ دايىندىق ۇستىندە. ريو وليمپياداسىنا باراتىن ەلدەر مەن ساراپقا سالىناتىن مەدالدار سانى رەكوردتىق كورسەتكىشكە جەتىپ وتىر. ياعني 4 جىلدا ءبىر كەلەتىن سپورتشىلار تويىنا تۇڭعىش رەت كوسوۆو مەن وڭتۇستىك سۋدان ەلدەرى قاتىسادى.
الەمنىڭ ءار بۇرىشىنان كەلەتىن سايىپقىراندار سپورتتىڭ 28 تۇرىنەن 306 مەدالدى ساراپقا سالادى. قازاقستان قۇراماسى سپورتتىڭ 25 تۇرىنەن 99 جولداما ۇتىپ الدى. وسىدان 4 جىل بۇرىن لوندون وليمپياداسىندا تالايعا تاڭداي قاقتىرعان ۇل قىزدارىمىز بيىل دا سول بيىكتەن كورىنە الا ما دەگەن ساۋال تۋىندايدى.
الدىمەن اۋىر اتلەتتەر جايلى. ويتكەنى جۇلدەنىڭ كوبىن زىلتەمىرشىلەردەن كۇتكەنىمىز انىق ەدى. ءبىراق كۇللى الەمدى شارپىعان دوپينگ داۋى بىزگە دە جەتىپ، سپورتشىلارىمىزدىڭ ساناسىنا سالماق ءتۇسىردى. الدىمەن مەدالدان ۇمىتكەر جاسۇلان مەن الماستى سپورتتان الىستاتتى. اقىرى بارلىق مىقتىلارىمىزعا تۇساۋ سالۋدى كوزدەدى.
«ريو وليمپياداسىنا 4 جىل بويى دايىندالدىق. جارىس تۋرا تاقالعاندا وسىنداي جاعداي بولىپ وتىر. ەندى شەشىمدى كۇتەمىز، ءبىراق جاتتىعۋدى توقتاتپايمىز. سوڭىنا دەيىن كۇرەسەمىز»، - دەيدى لوندون وليمپياداسىنىڭ چەمپيونى مايا مانەزا.
«قول قۋسىرىپ قاراپ قالاتىن ءبىز ەمەس. بىزدەر قانداي قۇراممەن بارساق تا ءبارىبىر مەدال الۋعا تىرىسامىز. ءانۇرانىمىزدى شىرقاتۋعا ۇمتىلامىز»، - دەدى اۋىر اتلەتيكادان قازاقستان قۇراماسىنىڭ باس باپكەرى الەكسەي ني.
اۋىر اتلەتتەردىڭ ماسەلەسى ءالى تولىق شەشىلمەدى. سوعان قاراماستان چەمپيوندارىمىز دايىندىقتارىن توقتاتقان جوق.
