ق ر قارۋلى كۇشتەرىنىڭ باسشىلىق قۇرامى ءبىر جىلدىق زاماناۋي اسكەري ونەر كۋرسىن ءبىتىردى - فوتو
ۇلتتىق قورعانىس ۋنيۆەرسيتەتىنىڭ بازاسىندا وتكەن كۋرس باعدارلاماسىن اياقتاعانى تۋرالى كۋالىكتى تابىس ەتتى، دەپ حابارلايدى مينيسترلىكتىڭ باسپا ءسوز قىزمەتى.
ۇلتتىق قورعانىس ۋنيۆەرسيتەتى باس شتابى فاكۋلتەتىنىڭ «اسكەري جانە مەملەكەتتىك باسقارۋ» ماماندىعى بويىنشا ماگيستراتۋراعا ارنالعان وقۋ باعدارلاماسىنىڭ نەگىزىنە سۇيەنگەن اسكەري ونەر كۋرسى قىركۇيەك پەن ماۋسىم ايلارى ارالىعىندا ءوتتى. باعدارلاما تەك ستراتەگيالىق جانە جەدەل-ستراتەگيالىق باسقارۋ توبىنىڭ باسشىلىق قۇرامىنا ارنالعان.
كۋرس بارىسىندا جاۋىنگەرلىك قۇرام، قارۋلى كۇشتەردىڭ قۇرىلىمى، قازاقستان رەسپۋبليكاسىنىڭ جانە شەتەلدىك مەملەكەتتەردىڭ اسكەري دوكتريناسى تۋرالى جالپىلاما تانىستىرۋلار تولىعىمەن قامتىلدى. «قۇرمەتتى گەنەرال جانە وفيتسەر مىرزالار، بۇگىن ەرەكشە جاعدايدا جينالىپ وتىرمىز. ءبىزدىڭ ۆەدومستۆونىڭ تاريحىندا تۇڭعىش رەت قورعانىس مينيسترلىگىنىڭ باسقارۋشى قۇرامىنا باس شتاب فاكۋلتەتىنىڭ كۋرستىق باعدارلاماسىن بىتىرگەنى تۋرالى كۋالىك تاپسىرۋدامىز. ولار جىل بويى اسكەري ءىستىڭ قىر-سىرىن مەڭگەرىپ، ونىڭ ەرەكشەلىگى مەن نەگىزگى باعىتتارىن ۇيرەندى.
بۇل ورايدا، قۇجاتتى تاپسىرماس بۇرىن بارشا تىڭداۋشىلار اتىنان وقىتۋشىلارعا ۇلكەن العىس بىلدىرەمىن. ءار ءدارىستىڭ تاقىرىبى مازمۇنى جاعىنان جانە كاسىبي تۇرعىدان وزەكتى بولدى. تاجىريبە جۇزىندە ءبىز وسىنداي وقىتۋ فورماتىن العاش رەت قولدانىپ وتىرمىز. ونىڭ ناتيجەسىنىڭ تيىمدىلىگىن ءتۇرلى باعىتتان اڭعارۋعا بولادى» - دەدى ق ر قورعانىس ءمينيسترى يمانعالي تاسماعامبەتوۆ.
كۋرستى ءتامامداعانى جونىندە كۋالىكتى ق ر قورعانىس ءمينيسترىنىڭ قولىنان قورعانىس ءمينيسترىنىڭ ءبىرىنشى ورىنباسارى - ق ر ق ك باس شتابىنىڭ باستىعى گەنەرال- پولكوۆنيك ساكەن جاسۇزاقوۆ، قورعانىس ءمينيسترىنىڭ ورىنباسارلارى گەنەرال-لەيتەنانت وقاس ساپاروۆ، گەنەرال-مايور تالعات مۇحتاروۆ، نۇرلان ساۋرانبايەۆ، بەرىك شولپانقۇلوۆ، ءبىلىم جانە عىلىم دەپارتامەنتىنىڭ باستىعى ايگۇل تولەمبايەۆا الدى.
اتالعان كۋرستاردا زاماناۋي اسكەري جانجالداردىڭ مازمۇنى مەن ءمانى، ولاردىڭ ستراتەگيالىق نەگىزى جانە ستراتەگيالىق ءىس-قيمىل فورماسى وقىتىلدى (قارۋلى كۇشتەردە قولدانىلۋى). سونىمەن قاتار، يراك، اۋعانستان، ۋكراينا، سيرياداعى اسكەري قاقتىعىستاردىڭ تاجىريبەسى نەگىزىندە سوعىستى جۇرگىزۋدىڭ جاڭا تاسىلدەرى، اسكەري سالاداعى زاڭناما زەردەلەندى. ەندىگى كەزەكتە وسىنداي كۋرستار باس شتاب باستىعىنىڭ ورىنباسارلارى، باس قولباسشىلار، قولباسشىلار، دەپارتامەنت جانە باسقارما باستىقتارى ءۇشىن وتكىزىلەتىن بولادى.
