جىل باسىنان بەرى شەتەلدىك وتباسىلار قازاقستاننان ون بالا اسىراپ العان

بۇگىن حالىق الدىندا ەسەپ بەرگەن ق ر سىرتقى ىستەر ءمينيسترى ەرلان ىدىرىسوۆ وسىنداي دەرەكتى ءمالىم ەتتى.

ال، بىلتىر قازاقستاننان 35 بالا شەت ەل اسقان ەكەن. ياعني، ەكى جىلدا 45 ءبۇلدىرشىن وزگە ەلدىڭ ازاماتى اتانىپ كەتكەن.

«تاۋەلسىزدىك العاننان بەرى شەتەلدىكتەر ەلىمىزدەن 9 مىڭداي بالانى اسىراپ الدى. 2011-جىلعا دەيىن بالالاردىڭ كوپشىلىگىن، ياعني 6 مىڭنان استام بالانى ا ق ش ازاماتتارى اسىراپ الدى. سونداي-اق، ەۋروپا ەلدەرى، اتاپ ايتقاندا يرلانديا، فرانسيا،  ۇلى بريتانيا، گەرمانيا ازاماتتارى قازاقستاننان كوپ بالانى پاناسىنا الدى»، - دەدى ە. ىدىرىسوۆ سۇراققا جاۋاپ بەرە وتىرىپ.

سىرتقى ىستەر ءمينيسترى حابارلاعانداي، قازاقستان قازىر بالا اسىراۋمەن اينالىساتىن اگەنتتىكتەردى تىركەپ، تەكسەرىپ جاتىر.

«2011-جىلى ءبىزدىڭ كونسۋلدار مەن ديپلوماتتار قازاقستاننان كەتكەن بالالار تۋرالى اقپاراتقا قول جەتكىزە المادى، سوندىقتان، ا ق ش ازاماتتارى ءۇشىن قازاق بالالارىن اسىراپ الۋعا تىيىم سالدىق. قازىرگى ۋاقىتتا ءبىزدىڭ بالالاردىڭ تاعدىرى، ولاردىڭ ءومىر ءسۇرۋ جاعدايى تۋرالى تولىققاندى اقپارات الۋ ءۇشىن جۇمىس ىستەپ جاتىرمىز. سونداي-اق، بۇگىندە بالا اسىراپ بەرۋمەن شۇعىلداناتىن شەتەلدىك اگەنتتىكتەردى تىركەپ جاتىرمىز. بۇل پروتسەسس - اشىق. وسى جۇمىستىڭ باستى ماقساتى دەلدالداردىڭ قىزمەتىن شەكتەۋ بولدى. جالپى، بالالاردى اسىراپ الۋ جۇمىسى بىرنەشە قاعيداعا نەگىزدەلەدى. بىرىنشى كەزەكتە، بالالاردىڭ مۇددەسى ەسكەرىلۋى كەرەك. ەكىنشىدەن، اتا-انالاردىڭ مۇددەسى ساقتالادى. شەتەلگە بالا بەرمەس بۇرىن، ءبىز ءبۇلدىرشىن اسىراپ العىسى كەلەتىن قازاق وتباسىلارىن ىزدەيمىز. تەك وسىدان كەيىن عانا، ياعني بارلىق مۇمكىندىكتەر قارالعاننان كەيىن شەتەلدىكتەردى قاراستىرامىز. بۇل - قوعامدىق رەزونانس تۋدىرعان ماسەلە...»، - دەدى ە. ىدىرىسوۆ.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى