ريو وليمپياداسىنا باراتىن قازاقستاندىقتار ۆيزانى جەڭىل تارتىپپەن الادى
قازاقستان برازيليا ەلشىلىگىمەن وسىنداي كەلىسىمگە كەلگەن. بۇل تۋرالى بۇگىن حالىققا ەسەپ بەرگەن ق ر سىرتقى ىستەر مينيسترى ەرلان ىدىرىسوۆ ءمالىم ەتتى.
«ىشكى ماسەلەلەرىنە بايلانىستى برازيليا پارلامەنتى ءبىر جارىم جىل بۇرىن قول قويىلعان كەلىسىمدى راتيفيكاتسيالاي المادى. ياعني، برازيليامەن ۆيزاسىز رەجيم پروبلەماسى تۋىندادى. سوندىقتان، ءبىزدىڭ ازاماتتاردىڭ جاعدايىن ويلاستىرا وتىرا، وليمپياداعا باراتىن قازاقستاندىقتار ءۇشىن ارنايى رەجيم ەنگىزۋ بويىنشا كەلىسىمگە كەلدىك»، - دەگەن ە. ىدىرىسوۆ قازاقستاننىڭ كونسۋلدارى تاراتاتىن اقپاراتتى باقىلاپ وتىرۋعا كەڭەس بەردى.
مينيستر ناقتىلاعانداي، برازيليا ەلشىلىگىمەن جاسالعان كەلىسىم اياسىندا قازاقستان ازاماتتارى ۆيزانى جەڭىلدەتىلگەن تارتىپپەن الادى.
«بيلەت بولسا، ەش قيىندىقسىز ۆيزا بەرىلەدى. برازيليا ەلشىلىگىنىڭ سايتىندا بۇل تارتىپپەن تانىسا الاسىزدار»، - دەپ تولىقتىردى مينيستر.
ايتا كەتەيىك، 5-21- تامىز ارالىعىندا ريو-دە-جانەيرو قالاسىندا كەزەكتى جازعى وليمپيادا ويىندارى وتەدى.
اۆتور: كەنجەكەي توقتامۇرات قىزى
