ەلوردا اكىمى ايەلدەر اراسىنداعى بوكستان الەم چەمپيوناتىنىڭ جەڭىمپازدارىن قۇتتىقتادى
ءلاززات كۇنگەيبايەۆا مەن ۆالەنتينا حالزوۆانى استانادا وتكەن AIBA الەم چەمپيوناتىندا جوعارى جەتىستىككە قول جەتكىزۋلەرىمەن قۇتتىقتادى، دەپ حابارلادى قالالىق اكىمدىكتىڭ باسپا ءسوز قىزمەتى.
ەسكە سالايىق، ءدۇبىرلى دودادا قازاقستان ءوز تاريحىندا العاش رەت جالپى كوماندالىق ەسەپتە ءبىرىنشى ورىنعا تابان تىرەدى. وتاندىق بىلعارى قولعاپ شەبەرلەرى ءتورت التىن مەن ەكى قولا جۇلدە ەنشىلەدى. سونىڭ ىشىندە ەلوردالىق ەكى سپورتشى جەڭىس تۇعىرىنا كوتەرىلدى.
«قالا اكتيۆىنىڭ كوزىنشە سىزدەردى شىن جۇرەكتەن قۇتتىقتايمىن، سپورتتا دا، جەكە ومىردە دە جەتىستىكتەرگە جەتە بەرۋلەرىڭە تىلەكتەسپىن»، - دەدى ءا. جاقسىبەكوۆ چەمپيوندارعا «قازاقستان رەسپۋبليكاسىنىڭ ەڭبەك سىڭىرگەن سپورت شەبەرى» قۇرمەتتى اتاعىن تابىستاي وتىرىپ.
اكىم قىزدارعا وتاندىق سپورتتىڭ تابىستىلىعىنا ۇلەس قوسقانى ءۇشىن العىس ايتىپ، قالادا سپورتتى دامىتۋ ءۇشىن بارلىق جاعدايلار جاسالىپ جاتقانىن، سونىڭ ىشىندە ەلوردالىق سپورتشىلاردىڭ تۇرعىن ءۇي-تۇرمىستىق ماسەلەلەرى شەشىلىپ جاتقاندىعىن اتاپ ءوتتى. سونىمەن قاتار، استانادا وتكەن الەم بىرىنشىلىگىنىڭ ۇيىمداستىرىلۋىنا جوعارى باعا بەرىلدى، ونى AIBA حالىقارالىق ۇيىمىنىڭ وكىلدەرى دە راستادى.
