ءداججال پايدا بولعاندا.. . ءمادى جەردەن شىعىپ، يسا كوكتەن تۇسەدى
اللا ەلشىسى مەككەدەن مادينەگە قونىس اۋدارعان سوڭ، تۇيەسى شوككەن جەرگە ءوز قولىمەن ىرگەتاسىن قالاپ، تاس پەن كىرپىشتەن سالعان. ونىڭ ءبىر بۇرىشى ءۇيى بولعان. سول ۇيدە قايتىس بولىپ، دەنەسىن جانى ۇزىلگەن جەرگە جەرلەگەن. بۇل ءۇي قازىر پايعامبار مەشىتىنىڭ ءبىر بۇرىشىنداعى جاسىل كۇمبەز استىنداعى نۇرلى زيراتقا اينالعان، وندا اللا ەلشىسىنىڭ قاسىندا ەكى سەنىمدى سەرىگى، العاشقى ەكى حاليفا ابۋباكىر مەن ومار قاتار جاتىر.
پايعامبار زيراتىنىڭ قاسىندا تاعى ءبىر بوس قابىر بار. ول نە ءۇشىن بوس قالدىرىلعان؟ وعان بولاشاقتا كىم جەرلەنبەك؟ كوپتەگەن مۇسىلماندار مەن قۇران ساراپشىلارى ول جەرگە بولاشاقتا جالعىز كوزدى ءداججالدى ءولتىرىپ، جەر بەتىن قىرىق جىل باسقارۋ ءۇشىن كوكتەن تۇسەتىن يسا پايعامبار جەرلەنەدى دەگەن سەنىمدە.
يمام بۇحاري جەتكىزگەن قاسيەتتى حاديستە: «اللا تاراپىنان جىبەرىلگەن پايعامباردىڭ ءبارى ءوز قاۋىمىنا ءداججال (بيبليا بويىنشا انتيحريست) جايىندا ەسكەرتكەن» دەلىنسە، تاعى ءبىر حاديستە «ءداججال سەندەردىڭ ورتالارىڭنان شىعادى» دەلىنەدى. حاديسكە سۇيەنىپ ايتىلاتىن اڭگىمەلەر بويىنشا، كوكتەن يسانىڭ ءتۇسۋى، جەردەن ءمادىنىڭ شىعۋى جانە ءداججالدىڭ پايدا بولۋى - ءبىر مەزگىلدە بولاتىن ارەكەتتەر. ءداججالدىڭ وتە قۇپيا تۇردە ارەكەت ەتەتىنى ايتىلادى. سوعان قاراپ كوپتەگەن ءدىني زەرتتەۋشىلەر مەن ساراپشىلار ءداججالدى ماسونداردىڭ ءىس- ارەكەتىمەن بايلانىستىرادى. قازىر الەمدە بولىپ جاتقان عالامدىق تەرروريزم مەن ءتۇرلى زۇلىمدىقتارعا قاراپ « ءداججالدىڭ ۋاقىتى باستالدى، ول الەمگە كەلدى جانە عالامدىق پروتسەستەردىڭ ءبارىن سول باسقارۋدا» دەيتىن دىنگە سەنۋشىلەردىڭ قاتارى كوبەيۋدە.
حاديستەردە يسانىڭ ءداججالدى ىزدەيتىنى، ال ونىڭ بايتۋل- ماقديس (ءال- اقسا مەشىتى) ماڭىندا جاسىرىناتىنى، اقىرىندا سول جەردە ءداججالدى ولتىرەتىنى ەسكەرتىلگەن. بۇعان قاراعاندا، ءداججالدىڭ ءىس- ارەكەتىنىڭ ورتالىعى ءال- اقسا مەشىتى مەن ونىڭ ماڭىندا بولاتىنىن اڭداتقانداي. تاعى ءبىر حاديستە ءداججالدىڭ جارتاستى جارىپ شىعاتىنى ايتىلادى. ال قازاق اڭىزى بويىنشا، ازىرەت ءالى مەن ورتالىق ازيادان شىققان بالۋان داريعا قىز كۇرەسەدى. ءالى جەڭىپ، داريعا ەكەۋىنەن ءمادى (ماھدي) تۋادى. كەيىن ءمادى تۋعان اكەسىن تانىماي، ازىرەت الىمەن كۇرەسىپ، اكەسىمەن بەلدەسكەنىنەن ۇيالىپ، قاتتى قىسىلعاننان جەر استىنا ءتۇسىپ كەتەدى. مىنە، وسى ءمادى اقىر زاماندا جەر استىنان شىعىپ، كوكتەن تۇسكەن يسامەن بىرگە ءداججالدىڭ كوزىن جويادى.
سونىمەن، ءداججال دەگەن قانداي جاراتىلىس، يسانىڭ كوكتەن ءتۇسۋى، ءمادىنىڭ جەردەن شىعۋى قاشان پايدا بولادى؟ مۇنى ق م د ب- نىڭ استانا قالاسى بويىنشا وكىل يمامى ناۋرىزباي وتپەنوۆ بىلايشا تۇسىندىرەدى:
ءاسىلىن اللا تاعالا ەكى ءماسىحتى جاراتقان. ونىڭ ءبىرى - يسا (ا. س. ) پايعامبار، ەكىنشىسى - حاق تاعالانىڭ انىق سىناعى بولعان ءماسىح ءداججال. يسا مەن ءماسىح ءداججال - ءبىر- بىرىنە قاراما- قايشى جاراتىلىس. يسانىڭ كوكتەن ءتۇسۋى جانە ءماسىح ءداججالدىڭ پايدا بولۋى - قيامەت جاقىنداۋىنىڭ بەلگىلەرىنە جاتادى. عالىمدار « ءماسيح ءداججال» ءسوزىنىڭ ۇعىمىنا قاتىستى ەلۋدەن استام تۇسىنىكتەمە بەرگەن.
اللا تاعالانىڭ امىرىنە ساي پايعامبارىمىز (س. ا. ۋ. ) اقىرەت كۇنىنىڭ باستالۋ ۋاقىتىن ناقتى ايتپاعان. الايدا ونىڭ بەلگىلەرىن بايانداپ وتكەن. سول پايعامبارلىق حابارلاردىڭ نەگىزىندە عالىمدار قيامەت جاقىنداۋىنىڭ بەلگىلەرىن كىشى بەلگىلەر جانە ۇلكەن بەلگىلەر دەپ ەكى تۇرگە بولگەن.
سونىمەن قاتار، قيامەتتىڭ كىشى بەلگىلەرىنە قاتىستى ارداقتى اللا ەلشىسى (س. ا. ۋ. ) ءبىر سوزىندە: «اقىرزامان باستالۋىنىڭ شارتتارى - بىلىمنىڭ جوعالىپ، ناداندىقتىن تارالۋى، جەزوكشەلىكتىڭ جايىلۋى جانە ىشىمدىكتىڭ كوپ ىشىلۋى. ەلۋ ايەلگە ءبىر ەركەكتەن كەلىپ، ايەلدەر سانىنىڭ كوبەيۋى» ، - دەگەن.
قيامەت كۇنى ناقتى قاشان باستالاتىنىن تەك اللا تاعالا بىلەدى. دەگەنمەن قيامەت كۇنىنىڭ بەلگىلەرى جايىندا ايتىپ كەتكەن. قيامەتقايىم بەلگىلەرىنە - جەر ءجۇزىن ءبىر ءتۇتىننىڭ باسۋى، يمام ءماھديدىڭ شىعۋى، ءماسىح ءداججالدىڭ پايدا بولۋى، كوكتەن يسانىڭ (ا. س. ) ءتۇسۋى، ءبىر ۇلكەن حايۋاننىڭ پايدا بولۋى، كۇن باتىستان شىعىپ شىعىستان باتۋى، قۇراننىڭ كوككە كوتەرىلىپ كەتۋى، ءيااجۇج بەن ءمااجۇجدىڭ پايدا بولۋى جاتادى.
ءماسىح ءداججالعا كەلەر بولساق، ول جالعىز كوزدى جانە سول كوزى بولمايدى. ماڭدايى ءۇش ارىپپەن، ياعني «قوف» ، «فا» جانە «را» ارىپتەرىمەن مورلەنگەن بولادى. وسى ءمور ونىڭ كاپىر ەكەنىنە يشارا بولادى. الايدا بۇل جازۋدى تەك مۇميندەرگە كورۋ ءناسىپ بولىپ، كاپىرلەر ول جازۋدى بايقاي المايدى.
پايعامبارلار ادامزاتتى اللا تاعالاعا يمان كەلتىرۋگە ۇندەسە، ءماسىح ءداججال ادامداردان ءوزىن ءتاڭىر دەپ مويىنداۋىن تالاپ ەتەدى. وسى ماقساتتا ول، حاق تاعالانىڭ قالاۋىمەن، ءتۇرلى كەرەمەت كورسەتەدى. ول - ولگەن ادامدى ءتىرىلتۋ، قۋاڭ دالانى كوگەرتۋ، ت. س. س.
راسۋلۋللاھ (س. ا. ۋ. ) : «مەنى سەندەر ءۇشىن ەڭ كوپ ۋايىمعا تۇسىرەتىن وسى ءداججال ەمەس. ويتكەنى ول مەن ارالارىڭدا بولعان ۋاقىتتا شىعاتىن بولسا، مەن سەندەر ءۇشىن ونىمەن ايتىسقا تۇسەمىن. الايدا ول مەن ارالارىڭدا جوق بولعان ۋاقىتتا شىعاتىن بولسا، وندا ءاربىر ادام ونىمەن جەكە باسى ءۇشىن ءوزى ايتىسقا تۇسەدى. ول كەزدە ءاربىر مۇسىلمان ءۇشىن مەنىڭ ورنىما اللا تاعالانىڭ ءوزى بولادى. ءداججال بۇيرا شاشتى، كوزى تاسىرايعان جىگىتتىڭ بەينەسىندە كەلەدى. سەندەردىڭ ارالارىڭنان بىرەۋ ءتىرى بولىپ، سول ۋاقىتتا ءداججال كەلەتىن بولسا، «كاھف» سۇرەسىنىڭ العاشقى اياتتارىن وقىسىن. ءداججال شام مەن يراكتىڭ ارالىعىنداعى جولدا دۇنيەگە كەلىپ، جان- جاعىنا جاماندىقتى تاراتا باستايدى. ەي، اللانىڭ قۇلدارى! دىندەرىڭدى مىقتى ۇستاڭدار!» دەدى.
ءماسىح ءداججال كىسەننەن بوساپ شىققاننان سوڭ جەر ءجۇزىن قىرىق كۇننىڭ ىشىندە اينالىپ شىعادى. ونىڭ ءبىرىنشى كۇنى ءبىر جىلعا (ياعني ءبىر كۇندە ءبىر جىلدىق ءىس اتقارادى) ، ەكىنشى كۇنى - ءبىر ايعا، ءۇشىنشى كۇنى - ءبىر اپتاعا، كەيىنگى كۇندەرى - ءبىر تاۋلىككە تەڭ كەلەدى.
«بىز: «ۋا، راسۋلۋللاھ! ول جەر بەتىندە قانشا ۋاقىت بولادى؟ » ، - دەپ سۇرادىق. سوندا پايعامبارىمىز (س. ا. ۋ. ) : «قىرىق كۇن. ول قىرىق كۇننىڭ ءبىر كۇنى ءبىر جىلعا، ال ءبىر كۇنى ايعا، ال ءبىر كۇنى اپتاعا، قالعان كۇندەرى سەندەردىڭ ءبىر كۇنىندەرىڭە تەڭ بولادى» ، - دەپ جاۋاپ بەردى.
- ۋا، راسۋلۋللاھ! ءبىر جىلعا تەڭ بولعان كۇنى بىز كۇندەلىكتى (ياعني بەس ۋاقىت) نامازىمىزدى وقىعانىمىز جەتكىلىكتى بولا ما؟
- جوق! ءبىراق سول كۇنى ۋاقىتتى دۇرىس بەلگىلەڭدەر.
- ۋا، راسۋلۋللاھ! ول جەر بەتىندە قانداي جىلدامدىقپەن قوزعالادى؟
- جەل ايداعان جاڭبىر بۇلتى ءتارىزدى. ول كەلىپ، وزىنە ءتاڭىر دەپ يمان كەلتىرۋىن تالاپ ەتكەندە، ادامدار ونىڭ تالابىنا جاۋاپ بەرەدى. سول ساتتە ونىڭ امىرىمەن جاڭبىر جاۋىپ، جەر ءونىم بەرەدى. ال كەشقۇرىم ورىستەن مال كەلەدى. ول مالدىڭ وركەشتەرى ءدال سول كەزگە دەيىن كوتەرىلمەگەندەي كوتەرىلىپ تۇرادى. جەلىندەرى ءدال سول كەزگە دەيىن تولماعانداي تولىپ تۇرادى. قارىندارى ءدال سول كەزگە دەيىن شىقپاعانداي شىعىپ تۇرادى. وسىدان سوڭ ءداججال باسقا ادامدارعا كەلىپ، ولاردان دا وزىنە ءتاڭىر دەپ يمان كەلتىرۋىن تالاپ ەتكەندە، ولار ودان باس تارتادى. سوندا ولاردىڭ جەرىن قۇرعاقشىلىق باسىپ، ولار بار مالىنان ايىرىلادى. ءداججال قۋاڭشىلىق باسقان جەرمەن ءوتىپ جەرگە: «بار قازىناڭدى شىعار» ، - دەيدى. جەردەن شىققان قازىنا ءداججالدىڭ ارتىنان ارا ءۇيىرى ءتارىزدى ەرەدى. وسىدان كەيىن ءداججال وزىنە جاسى كەمەلىنە تولعان جىگىتتى شاقىرىپ، ونى سەمسەرمەن ەكىگە ءبولىپ تاستايدى. دەنەنىڭ ەكى بولىگى ءبىرى-بىرىنەن جەبەنىڭ جەتەتىندەي قاشىقتىققا ۇشىپ كەتەدى. ءداججال جىگىتتى وزىنە قايتا شاقىرادى. سوندا قايتا تىرىلگەن جىگىت قۋانىشتان ءجۇزى جايناعان كۇيدە الدىنا كەلەدى» .
ءداججالدىڭ شىعۋ جەرىنە كەلەر بولساق، وعان قاتىستى ءتۇرلى ريۋاياتتار بار. ماسەلەن، ءبىر ريۋاياتتا ءداججال شىعىس تاراپتان، ياعني حوراسان وڭىرىنەن، ءبىر ريۋاياتتا ياھۋديلەر مەكەندەگەن اسباھان اۋماعىنان، ال ءبىر ريۋاياتتا شام- يراق جەرىنەن شىعادى دەلىنگەن.
كىسەنىنەن بوساعان سوڭ ءداججالدىڭ اياعى باسپاعان جەرى، شىقپاعان توبەسى قالمايدى. ول تەك ەكى ورىنعا اياق باسا المايدى. ول - مەككە مەن ءمادينا.
ءماديناعا كىرە المايتىنىن بىلگەن ءداججال ءۇش قايتارا جەردى تەپكەن ساتتە ءماديناداعى ەكىجۇزدىلەر وعان ەرىپ كەتەدى.
ءماسىح ءداججالدان بۇرىن يمام ماھدي شىعادى. يمام ماھدي ءنابيدىڭ (س. ا. ۋ. ) ۇرپاقتارىنان بولىپ، كەلبەتى ارابتارعا ۇقساعان بولادى. يمام ءماھديدىڭ زامانىندا جەر ءجۇزىن ادىلەتسىزدىك پەن بۇزاقىلىق باسقان بولادى. يمام ءماھديدىڭ كەلگەنىنە قۋانعان مۇسىلماندار وعان مەككەدەگى « ءال- حارام» مەشىتىندە ەرۋگە انت ەتەدى. وسىدان سوڭ يمام ماھدي كۋفاعا كەلىپ، سول جەردەن جان- جاققا مۇسىلمان اسكەرلەرىن جونەلتەدى.
عالىمداردىڭ ايتۋىنشا ءماسىح ءداججال يمام ماھديدەن سوڭ پايدا بولادى. يمام ماھدي شىققاننان سوڭ عالاماتتار پايدا بولا باستايدى. ول - ءماسىح ءداججال پايدا بولۋىنىڭ عالاماتى. دالىرەك ايتار بولساق، ءۇش جىل قاتارىنان جاڭبىر مەن جەر ءونىمى ازايادى. سول كەزدە ادامداردىڭ ازىعى تاكبير، ءتاھليل، تاسبيح بولماق.
ءماسىح ءداججالدىڭ شىعۋدىڭ ءمانىسى - ادامداردى سىناۋ. وسى ماقساتتا اللا تاعالا ءداججالعا ءتۇرلى عاجاپ ىستەردى اتقارۋ قۇدىرەتىن ءناسىپ ەتەدى. ماسەلەن، جەر جۇزىندە جەلدەي كەزىپ ءجۇرۋ، ءجاننات پەن توزاقتى كورسەتۋ، جاڭبىر جاۋدىرۋ، قۋاڭشىلىق باسقان جەردى كوگەرتۋ، جەر قويناۋىنداعى كەندەردى جەر بەتىنە شىعارۋ، ولگەن ادامعا جان بەرۋ، ازعىرۋ ىسىندە شايتانداردى قولدانۋ، ت. ب. ماسەلەن، ءداججالدىڭ تالاپ ەتۋىمەن ەكى شايتان بىرەۋگە ونىڭ مارقۇم بولعان اتا- اناسىنىڭ بەينەسىندە كەلىپ ءداججالعا نۇسقاپ: «مىناعان ەر! سەنىڭ راببىڭ وسى» ، - دەپ ايتادى. سوندا الگى ادام ءداججالعا تابىنا باستايدى.
ءداججال فيتناسى جەر بەتىنە جايىلعان ساتتە، حاق تاعالانىڭ قالاۋىمەن قيامەت كۇنى جاقىنداۋدىڭ كەلەسى بەلگىسى پايدا بولادى. ول - كوكتەن يسا (ا. س. ) پايعامباردىڭ ءتۇسۋى.
يسا (ا. س. ) كوكتەن داماسكىدەگى ۋمماۋي اۋلەتى سالعان مەشىتتىڭ مۇناراسىنا ەكى پەرىشتەنىڭ قاناتىنا سۇيەنگەن حالدە تۇسەدى. سول ساتتە يسانىڭ (ا. س. ) شاشىنان مارجانداي سۋ تامشىلارى تامىپ تۇرادى.
بۇل جايىندا يمام ءمۇسىلىمنىڭ ريۋاياتىندا بىلاي دەلىنگەن:
«ءدال سول ۋاقىتتا اللا تاعالا ادامدارعا ماريام ۇلى يسانى (ا. س. ) جىبەرەدى. ول اسپاننان داماسكىنىڭ شىعىس جاعىنداعى اق مۇنارانىڭ جانىنا، قولىن ەكى پەرىشتەنىڭ قاناتىنا قويعان حالدە تۇسەدى. ونىڭ سارى بوياۋمەن بويالعان ەكى كيىمى بولادى. ول باسىن تومەن ەڭكەيتكەندە، باسىنان سۋ تامادى. كوتەرگەن كەزدە ىنجۋگە ۇقساعان تامشىلار تامىپ تۇرادى» .
يسا (ا. س. ) جەرگە تۇسكەننەن سوڭ يمام ماھدي وعان يمامدىقتى ۇسىنادى. الايدا بۇل جولى يسا (ا. س. ) يمام ماھديگە ۇيىپ ناماز وقيدى. وسىدان سوڭ مۇسىلمان ۇممەتىنىڭ بيلىك مىنبەرى يساعا (ا. س. ) وتەدى.
جەر بەتىنە ەتەك جايعان كۇپىرلىكتى جويۋ ماقساتىندا يسا (ا. س. ) يەرۋساليمگە بەت الادى. سوندا، ياعني پالەستينادا يسا (ا. س. ) باستاعان مۇسىلماندار اسكەرى ءماسىح داججالمەن جۇزدەسەدى. حاديستەردىڭ بىرىندە يسا پايعامبارمەن (ا. س. ) كەزدەسكەن ساتتە ءماسىح ءداججال سۋدا ەرىگەن تۇز ءتارىزدى ەرىپ كەتەدى دەپ ايتىلعان. جالپى ءداججال يمام ماھدي جانە يسانىڭ (ا. س. ) قولىنان وپات بولادى.
«يسانىڭ (ا. س. ) دەمىنىڭ حوش يىسىن سەزگەن ءاربىر كاپىر، ونىڭ يىسىنەن جان ءتاسىلىم ەتەدى. يسانى (ا. س. ) دەمىنىڭ ءيىسى كوز جەتەتىن قاشىقتىققا جايىلىپ جاتادى. يسا (ا. س. ) ءداججالدى ىزدەپ، ونى ليۋد قاقپاسىنىڭ جانىندا قۋىپ جەتىپ، ولتىرەدى. وسىدان سوڭ يسا (ا. س. ) اللا تاعالا ولاردى ءداججالدىڭ ازعىرۋىنان قورعاعان ادامدارعا كەلىپ، ولاردىڭ بەتتەرىنەن سيپايدى. يسا (ا. س. ) ولارعا ولاردىڭ ءجانناتتا الاتىن دارەجەلەرى جايىندا ايتىپ بەرەدى» .
يسا (ا. س. ) ءوز قولىمەن ەڭ ءناجىس جاراتىلىستى، ياعني دوڭىزدى ولتىرەدى. ءماسىح ءداججالدىڭ فيتناسى بىتكەن سوڭ جەر جۇزىندە بەيبىتشىلىك ورنىعادى. بۇكىل ادامزات ءبىر دىندە بولادى. ول - يسلام ءدىنى. بەلگىلى ۋاقىت وتكەن سوڭ يمام ماھدي جان تاپسىرادى. سودان كەيىن قيامەت كۇنىنىڭ كەلەسى بەلگىسى، ياعني ءيااجۇج جانە ءمااجۇج پايدا بولادى. الايدا ول باسقا تاقىرىپ.
تورەعالي تاشەنوۆ
«ايقىن»
